MATAYO 13
13
Oluchelo lwomumiitsi
(Mrk. 4:1-9; Luka 8:4-8)
1Khunyanga yene eyo, Yesu yarula munzu natsia khuluchinga lweinyanza ne niyekhala hasi nachaaka okhwechesia. 2#Luka 5:1-3Emikanda emikhongo chiabandu nichikhung'anila aha yali, nikachila niyenjila muliaro niyekhalamwo, ne abemikanda abo nibasinjila khuluchinga. 3Yababoolela amakhuwa amanji mutsinjelo naboola ari, “Omumiitsi yatsia okhumiitsa imwo. 4Ne olwa yali namiitsanga, imwo yindi yakwa khunjila, ne amanyonyi niketsa nikachibootsa. 5Imwo yindi niyikwa khwiloba liokhulwanda, niyilaba neliloba elihela ta, niyimela lwangu okhuba liloba shiliali elinji tawe. 6Nebutwa lwomubasu kwasamba, yaniala ne olunyuma niyuma. 7Neyindi niyikwa hakari mumahwa, amahwa ako nikakhula lwangu nikachilundia. 8Nebutswa imwo yindi niyikwa khwiloba lilayi, mana niyama ebiamo ebinji; eyindi yama ebiamo eshikhumi shilala, eyindi amakhumi kasasaba, neyindi amakhumi kataru.”
9Mana Yesu namalilisia naboola ari, “Ouli namarwi ahulile!”
Lichoomo lietsinjelo
(Mrk. 4:10-12; Luka 8:9-10)
10Mana abeechi nibetsa khu Yesu nibamureeba bari, “Mbushiina noboolanga ninabo mutsinjelo?”
11Yesu nakalusia nababoolela ari, “Inywe mwahebwa obumanyilisi bwokhumanya amabiso kobwami bwomwikulu, nebutswa bo shibahebwa tawe. 12#Mat. 25:29; Mrk. 4:25; Luka 8:18; 19:26Okhuba omundu ouli nebindu alaheebwa ebinji, kho mbu bishilaane, nebutswa omundu oulalikhwo neshindu ta, alanuulwa kata shitiiti eshiali ninashio. 13Emboolanga ninabo mutsinjelo shichila, bahenganga, ne shibalola ta; khandi bahulilanga, ne shibamanyilisia tawe. 14#Isa. 6:9,10Kho obulakusi bwa Isaya busibwe khubo, obwa yalakula naboola ari,
‘Okhuhulila balahulila, nebutswa shibalatiila khushisina ta,
balahenga, nebutswa shibalalola ta,
15shichila emioyo chiabwe nemisiro,
amarwi kabwe kekaale khandi tsimoni tsiabwe tsiatimba,
kho mbu bakhetsukhana nibalola netsimoni tsiabwe, nikahulila namarwi kabwe,
ne emioyo chiabwe nichimanyilisia
nabo nibangalushila isie,
nasi nimbahonia.’
16 #
Luka 10:23,24 “Nebutswa inywe muli neikhabi muno! Shichila tsimoni tsienywe tsilolanga khandi amarwi kenywe kahulilanga. 17Emuboolela toto mbu, abalakusi abanji nende abandu abalunjishi abanji, bekoomba okhulola aka inywe mulolanga, ne shibakalola ta; khandi beekomba okhuhulila aka inywe muhulilanga, ne shibakahulila tawe.
Yesu yenoosia eshisina shi oluchelo lwomumiitsi
(Mrk. 4:13-20; Luka 8:11-15)
18“Bulano, rechelesie mumanyilisie eshisina shioluchelo lwomumiitsi. 19Olwa omundu yesi yesi ahulilanga likhuwa liobwami bwomwikulu, ne nalalimanyilisia ta, ali shinga imwo eyakwa khunjila. Omumayanu oyo yetsa lwangu nayinia likhuwa tsana eliamiitswa muye. 20Ne imwo eyakwa khulwanda, yili shinga oyo oufuchililanga likhuwa elo lwangu nobusaangaali olwa alihulila. 21Nebutswa shilinjila muye ta, mana ahunzukha nalekha obusuubilibwe. Kho lwobutinyu noho obusandibwi bwitsa khulwa likhuwa, nakosia obusuubilibwe lwangu. 22Ne imwo eyakwa mumahwa yili shinga oyo ouhulilanga likhuwa, nebutswa okhuhendela akobulamu bweshialo nende okhuchama obuyinda bweshialo, birusia muye likhuwa elo, ne shiyaama ebiamo tawe. 23Ne imwo eyakwa mwiloba lilayi yili shinga oyo ouhulilanga likhuwa nende okhulimanyilisia. Omwenoyo yama ebiamo, ebihela kata eshikhumi, amakhumi kasasaba, noho amakhumi kataru.”
Oluchelo lwelibanze mungano
24Yesu yababoolela oluchelo lundi ari, “Obwami bwa Nyasaye buli burinanwa; omundu yamiitsa imwo indayi mumukundakwe. 25Ne eshilo, abandu nibali mundoolo, omusuku yetsa namiitsa libanze mungano eyo, ne narulamwo natsia. 26Mana olwa ingano eyo yamela, niyikhula niyichaaka okhufumbara, nolwa libanze lialolekha nililimwo. 27Abakhalabani ba mwene mukunda nibamwitsila nibamuboolela bari, ‘Omwami, shiwamiitsa imwo indayi mumukundakwo; ne libanze nalio lilimwo lirie?’ 28Nakalusia naboola ari, ‘Omusuku niye owakhola ako.’ Nibamureeba bari, ‘Wenya mbu khutsie khwiye nikhurusiamwo libanze elo noho?’ 29Naye nabakania ari, ‘Tawe, mwakhetsukhana mwakhung'asilia ingano mwibanze elio olwa muba nimuliyanga. 30Leshe ingano nende libanze biosi bikhulile halala okhuula khwichesa. Ne khundukho yelichesa, ndiliboolela abachesi mbu, baranjilile okhwiya libanze nibalikhung'asia nibaliboha tsing'anda nibalisamba. Nayo ingano bakhung'asie nibachira mushiachi shianje.’ ”
Oluchelo lwolufwa lwomutarakwe
(Mrk. 4:30-32; Luka 13:18-19)
31Yesu nababoolela oluchelo lundi ari; “Obwami bwa Nyasaye buli buri nanwa: Omundu abukulanga olufwa lwomutarakwe namiitsa mumukundakwe. 32Olwene nolutuutu muno nochelaasia khubufwa bundi bwosi, nebutswa olwa lusebukha nilukhula, nilwikhola omusaala omukhongo okhushila echindi chiosi, khandi kata amanyonyi kombakha ebitsu mumasaka kakwo.”
Oluchelo lwelimela
(Luka 13:20-21)
33Yesu nababoolela khandi oluchelo lundi ari; “Obwami bwa Nyasaye buli shinga limela eliomukhasi yabukula natsokaasia mubusie obuhela ebimwelo bitaru okhuula lwobusie bwosi bwafiimba khulwelimela.”
Yesu yekhoonyela tsinjelo mukhwechesiakhwe
(Mrk. 4:33-34)
34Amakhuwa ako koosi Yesu yaboolelanga abemikanda mutsinjelo. Shiyababoolelakhwo likhuwa liosi liosi halali mutsinjelo tawe. 35#Tsits. 78:2Yakhola ario okhuusia akomulakusi yali niyaboola mbu;
“Ndakhekhoonyele tsinjelo olwa emboola ninabo;
ndakhabafwimbulile amakhuwa akabalaamanyakhwo okhurula khukhulongwa khweshialo tawe.”
Yesu yenoosia eshisina shioluchelo lwelibanze
36Ne olwa Yesu yali nalekhaane nabemikanda yenjila munzu, abechibe nibamwitsila nibaboola bari, “Okhwinoosie eshisina shioluchelo lwelibanze liomumukunda.”
37Yesu nababoolela ari, “Omundu owamiitsa imwo indayi, niye Omwana womundu; 38omukunda nikwo eshialo; imwo indayi niyo abandu abalayi abomubwami bwa Nyasaye; libanze nilio abandu abalondi aba Omumayanu oyo. 39Ne omusuku owamiitsa libanze, niye Setani. Nalio lichesa, nishio eshihesi eshieshise shino, ne abachesi, nibo abamalaika. 40Kho shinga olwa libanze likhung'asibwa nilisambwa mumulilo, nolwa kakhabe kario, olwa eshihesi shieshise shino shiakhoole. 41Omwana womundu yakharume abamalaikabe nabo bakhakhung'asie ebisichirasio biosi nende abo abonoonanga. 42Yakhabasukune mumulilo, ne ebweneyo bakhalile nibalimasia ameeno. 43Mana abandu abalunjishi bakhaashe shinga eliuba mubwami bwa Sabwe. Abali namarwi bahulile.
Oluchelo olwelibishilo eliabiswa
44“Obwami bwa Nyasaye buli shinga libishilo eliabiswa mumukunda, eliomundu yanyoola ne nalibisa; ne khulwa okhwikhoya yatsia nakusia ebia yali ninabio biosi, mana nakula omukunda okwo.
Oluchelo lweyinyuma yobukusi
45“Khandi Obwami bwa Nyasaye buli shinga omundu oukhabanga tsinyuma tsindayi. 46Ne olwa anyoola yinyuma ndala yobukusi obunji, atsia okhukusia buli shindu eshiali ninashio, ne akula yinyuma eyo.
Oluchelo lwolukhanda lwetsinyeni
47“Khandi Obwami bwa Nyasaye buli shinga olukhanda lwetsinyeni, olwasukunwwa munyanza mana nilutiila tsinyeni tsietsimbia tsiosi. 48Olwa olukhanda olwo lwetsula, abanaabi balukalusia khulukuku nibekhala hasi nibatoola tsinyeni; tsindayi nibara mubibwelo, natsio tsimbi nibasukuna. 49Nolwa kaliba kario olwa eshihesi eshieshise shino shiliula; abamalaika bakharule nibakhung'asia abandu abamayanu okhurula mubalunjishi. 50Ne bakhabasukune mumulilo; ebweneyo bakhalile nibalimasia ameeno.”
Amechesio amayiakha nende omakhulu
51Yesu yareeba abeechibe ari, “Mumanyile eshisina shietsinjelo tsino?” Nibamukalusia bari, “Khumanyile.” 52Kho nabakalusia ari, “Kano kamanyisia mbu, buli omwechesia wamalako owekhola omwechi wobwami bwa Nyasaye, ali shinga omwenengo ouyininjia mwibishilolie ebindu ebiyia nende ebikhulu.”
Yesu alobwa mwitaala lia Nazareti
(Mrk. 6:1-6; Luka 4:16-30)
53Olwa Yesu yamala okhuboola tsinjelo etsio yarulaho natsia, 54ne nakalukha mwitaala liabwe lia Nazareti. Niyechesia musinagogi okhuula, olwa abandu bahuka nibareeba bari, “Yanyoola heena obuchesi burio nende akamakana kano? 55Uno shiniye omwana owomubaatsi? Nyina shiali Mariamu? Ne shiali omwana wabwe Yakobo, Yosefu, Simoni nende Yuda? 56Ne abakhaana babwe boosi shibamenyile ninefwe? Kho yanyoola heena amachesi kano?” 57#Yoh. 4:44Mana nibamuloba.
Yesu nababoolela ari, “Omulakusi shiabulanga oluyali ta, okhuyiniakhwo abomushialoshie nende abolwibulolwe beene, nibo abalamuhelesinjia oluyali tawe.” 58Ne okhuba shibaali nobusuubili ta, shiyakholakhwo akamakana amanji ebweneyo tawe.
Currently Selected:
MATAYO 13: OLUPR
Highlight
Share
Copy
Want to have your highlights saved across all your devices? Sign up or sign in