LUKA 21
21
Eshihaanwa shiomukhasi omulekhwa
(Mrk. 12:41-44)
1Yesu yahenga nalola abayinda nibaretsanga ebihaanwa biabwe mwisanduku elia muhekalu, 2khandi nalola omukhasi omulekhwa khandi omumanani naretsangamwo amang'ondo kabili. 3Mana naboola ari, “Emuboolela toto mbu, omukhasi omulekhwa khandi omumanani uno areelemwo amanji okhushila abandi boosi. 4Okhuba abandi boosi bahaanile khubitong'anga khubuyinda bwabwe; nebutswa ye, mubumananibwe, ahaanile koosi akabele ninako, niko konyene akayeletilekhwo mubulamubwe bwosi.”
Yesu aboola khukokhulikululwa khwihekalu
(Mat. 24:1-2; Mrk. 13:1-2)
5Abandi khubeechi bali nibaboolanga khu keihekalu, shinga olwa yali niyang'oonwa nende amachina kobukusi nende khukebihaanwa ebiahaanungwa khu Nyasaye. Yesu naboola ari, 6“Mulolanga ihekalu yino, tsinyanga tsitsanga olwa kata lichina elala shililitong'akhwo khulindi tawe, buli lichina liakhasasibwe.”
Amanyakhano nende obusandibwi
(Mat. 24:3-14; Mrk. 13:3-13)
7Kho nibamureeba bari, “Omwechesia amakhuwa kano kalikholekha liina? Ne nishilolelo shiina eshilibaho olwa kaliba nikali ahambi okhwikholekha?”
8Yesu naboola ari, “Mube meeso, omundu aleshe okhumukosia. Okhuba abandu abanji bakhetse muliira lianje nibaboola bari, ‘Isie nisie Kristo!’ Khandi mbu, ‘Ebise biulile!’ Mulabalondakhwo ta. 9Olwa mulahulila akamahe nende indiri, mularie ta, okhuba ako kakhoyile karanjilile okhwikholekha, nebutswa eshihesi shishiletsa lwangu tawe.”
10Mana nameeta okhuboola ari, “Okhuba lihanga lilalwana nende lihanga lindi, nabwo oburuchi bulaseera oburuchi bundi. 11Ne khulabaho okhurenga okhukhongo khweshialo, inzala nende olumbe buli habundu. Khandi indiri eyokhurisia nende ebilolelo biamakana okhurula mwikulu. 12Ne ako koosi nikashili okhwikholekha, mulatiilwa nende okhusandibwa; balamuyila mutsisinagogi okhumuyaasia nende okhumura mumbohe; balamureera imbeli wabaruchi nende abaami khulwa eliira lianje. 13Kho nilwo olwa muliba nimunyoolile obwiyangu obulayi bwokhuyaala Injiili yanje. 14#Luka 12:11,12Nebutswa nimushili okhutsia imbeli weshiina okhuyaasibwa, mulahende omwoyo nimuyililisia shinga olwa mutsia okhukalusia amareebo mushina tawe, 15shichila ndalamuhelesia amakhuwa nende amachesi akokhuboola, kho mbu kata abafukuli benywe shibalanyala okhukaana noho okhufukula amakhuwa ako tawe. 16Khandi mulakhobwa nabebusi benywe nende abaana benywe, abekho benywe nende abetsa benywe, kata abandi khwinywe muleerwa. 17Abandu boosi balamusila inywe khulwa isie. 18Kata kario mulalindwa obulayi, kho mbu kata liswi elala shililakorakhwo okhurula khumirwe chienywe tawe. 19Nebutswa mulafwa emioyo ta, okhuba mulihonia obulamu bwenywe khulwa okhwisimilisia khwenywe.
Yesu arumbula khukokhusasibwa khwelitookho lia Yerusalemu
(Mat. 24:15-21; Mrk. 13:14-19)
20“Ne olwa mulilola litookho lia Yerusalemu nilibotokhanwe nende abelihe, nolwa mulimanya mbu lili ahambi okhusasibwa. 21Kho abali Yudea belushile mubikulu, nabo abali hakari mwitookho barulemwo, kata abali elwanyi welitookho baleshe okhwinjila mukari, 22#Hos. 9:7okhuba etsio tsiliba ‘Tsinyanga tsieshinyaasio,’ kho mbu akahandikwa koosi kahesibwe. 23Kaliba akamasila khubakhasi abaliba nibali tsinda nende abaliba nibanuninjia abaana. Okhuba amasila amakhongo kalibaho khushialo khandi eshinyasio shia Nyasaye shiliitsa khubandu abo. 24Abandi baliirwa nolukanga, nabo abandi baliyilwa mubuhambe mumahanga kandi; nalio litookho lia Yerusalemu lilisenachilwa nende abandu abamahanga, okhuula olwa ebise ebia abamahanga ako okhuruka biliba nibihwele.”
Okhwitsa khwomwana womundu
(Mat. 24:29-31; Mrk. 13:24-27)
25 #
Isa. 13:10; Ezek. 32:7; Yoe. 2:31; Obufw. 6:12,13 “Khulibaho nebilolelo biamakana, ebililolekha khuliuba, khumwesi nende khutsing'ining'ini. Ne abokhushialo boosi balitiilwa noburi nibahenda omwoyo khulwa okhuhoola khweinyanza nende amarunda kayo amakhongo. 26Abandu balifwa emioyo khulwa oburi nibalindilila aketsa okhwikholekha khushialo shiosi, okhuba ebilonje biamaani biomwikulu bilitechesibwa nibirusibwa mubwikhalo bwabio. 27#Dan. 7:13; Obufw. 1:7Ne nilwo olwa balilola Omwana womundu niyetsanga mwileesi nobunyali nende oluyali olukhongo. 28Ne olwa amakhuwa kano kalichaaka okhwikholekha, mulihenga ikulu nimuchinguula emirwe chienywe, shichila obununulwi bwenywe buliba nibuli ahambi.”
Eliechesio eliokhumukhuyu
(Mat. 24:32-35; Mrk. 13:28-31)
29Mana Yesu nababoolela oluchelo luno ari, “Lolele khumukhuyu nende emisaala chindi chiosi; 30olwa mulolanga nichisebukha, mumanyanga abeene mbu tsinyanga tsieshiubwe tsili ahambi. 31Kho olwa mulilola amakhuwa ako nikachachile okhwikholekha mulimanya mbu, obwami bwa Nyasaye buli ahambi okhwitsa.
32“Emuboolela toto mbu, olwibulo luno shilulihwaho ta, okhuula olwa kano koosi kaliba nikamalile okhuusibwa. 33Likulu nende eshialo bilihwaho nebutswa amakhuwa kanje shikalihwaho tawe.
Mube meeso
34“Ne mube meeso! Muleyinjisia mubulangu, obumeesi nende okhuhendela akobulamu bweshialo shino tawe! Nebutswa mulitsukhana inyanga eyo niyulile. 35Shichila yilitsa shinga omubero khuboosi abamenyanga khushialo. 36Kho mubetsenje meeso buli shise, nimusaaya mbu mube namaani akokhuhula nende okhwihonokosia okhurula mumakhuwa kano koosi nende akokhusinjila imbeli ewa Omwana womundu.”
37 #
Luka 19:47
Kho mutsinyanga etsio, Yesu yechesinjia muhekalu mushiteere, ne mushilo yatsitsanga mushikulu eshia Miseituni. 38Ne mumabwibwi abandu boosi bahunanga muhekalu okhutsia okhumurecheresia.
Currently Selected:
LUKA 21: OLUPR
Highlight
Share
Copy
Want to have your highlights saved across all your devices? Sign up or sign in