YOHANA 9
9
Yesu ahonia omundu owebulwa nali omubofu
1Ne olwa Yesu yali nabiranga, yalola omundu owebulwa nali omubofu. 2Mana abeechibe nibamureeba bari, “Omwechesia, nobwonooni bwa wina ebwachila niyebulwa nali omubofu? Nobwonoonibwe omwene, noho obwa abebusibe?”
3Yesu nabakalusia ari, “Shibuli obwonoonibwe omwene, noho obwa abebusibe, obwachila naba omubofu tawe. Yebulwa nali omubofu kho mbu, obunyali bwa Nyasaye bulolesibwe muye. 4Olwa shishili eshiteere shiri, khukhoyile okhukhola emilimo echia oyo owaruma. Okhuba eshilo shiitsanga lwomundu yesi yesi alanyala okhukhola emilimo tawe. 5#Mat. 5:14; Yoh. 8:12Olwa emba neshili mushialo, nisie obulafu bweshialo.”
6Olunyuma lwa Yesu okhuboola amakhuwa ako, yafuutsa amare hasi, nakaasia litoyi namare ako, ne nabakha litoyi elo khumoni tsiomundu oyo. 7Mana namuboolela ari, “Tsia wiyosie mwitiba lia Siloamu.#9:7 Siloamu: Eshisina mbu, “Owarumwa”.” Mana omundu oyo natsia niyeyosia mumonimwe ne nakalukha nalolanga.
8Mana abamenyanibe nende abandu abamulolanga khale nasabasabanga ebindu, nibareeba bari, “Uno shiali niye omundu owayekhalenje khunjila nasabasaba ebindu?”
9Abandi nibafuchilila nibaboola bari, “Niye!” Nabo abandi nibakaana nibaboola bari, “Tawe, afwanana butswa ninaye.” Naye omwene naboola ari, “Nisie omwene nomwene.”
10Kho nibamureeba bari, “Kho kali karie mbu, bulano onyala okhulola?”
11Naye nabakalusia naboola ari, “Omundu oulangwa mbu, Yesu, niye oukaasiye litoyi, niyambakha khumoni tsianje, mana niyamboolela mbu, enzie mwitiba lia Siloamu ndiyosiemwo. Kho emalile nenzia, ne olwa ndiyosiye butswa, ne nenjaaka okhulola.”
12Nabo nibamureeba bari, “Owatsana ali hena?” Naye nabakalusia naboola ari, “Shiemanyile tawe.”
Abafarisayo bareebelesia okhumanya akokhuhonibwa khwomundu omubofu oyo
13Kho nibayila omundu owali omubofu oyo khu Abafarisayo. 14Ne inyanga ya Yesu yakaasia litoyi ne nahonia omubofu oyo, yali inyanga eya Isabato. 15Abafarisayo nabo nibareeba omundu oyo shinga olwa yali nanyaliilwe okhulola khandi. Naye nababoolela ari, “Abashile litoyi khumoni tsianje, ne nindiyosia mumoni, mana bulano enyala okhulola.”
16Mana abandi khu Abafarisayo abo nibaboola bari, “Omundu oukholile amakhuwa ako shianyala okhuba niyarula wa Nyasaye ta, shichila shialondanga amalako aka Isabato tawe.”
Abandi nabo nibaboola bari, “Mana omundu omwonooni anyala okhukhola ebikhole biamakana shinga bino?” Kho obwahukhani nibubaho mubo.
17Kho Abafarisayo nibareeba omundu oyo khandi bari, “Oboolanga mbu, akhuhoniye obubofubwo, nobulayi, nawe bulano oboolakhwo orie khuye?”
Omundu oyo nakalusia naboola ari, “Nomulakusi.”
18Kata kario, abemilisi ba Abayahudi shibasuubila mbu, toto omundu oyo yali omubofu ne bulano anyala okhulola ta, okhuula olwa balaanga abebusibe 19nibabareeba bari, “Uno nomwana wenywe? Muboolanga mbu, yebulwa nali omubofu? Ne kabeele karie mbu, bulano anyala okhulola?”
20Abebusibe nabo nibakalusia bari, “Toto khumanyile mbu, uno nomwana wefwe, khandi khumanyile mbu, yebulwa nali omubofu. 21Nebutswa shikhumanyile shinga kali mbu, bulano anyala okhulola tawe. Kata shikhumanyile omundu oumuhoniye tawe. Mumureebe omwene, shichila nomundu oukhulile, omwene anyala okhuboola.” 22Abebusibe baboola bario, shichila bali nibariire abemilisi ba Abayahudi, okhuba Abayahudi bali nibamalile okhufuchilisania mbu, omundu yesi yesi oufuchilila mbu, Yesu niye Kristo, okhuula alondwe arule musinagogi. 23Nishio eshifune shiachila abebusi abo nibaboola bari, “Mureebe omwene, nomundu oukhulile.”
24Kho nibalanga omundu owalinji omubofu oyo olwakhabili, ne nibamuboolela bari, “Boola obwatoto imbeli wa Nyasaye! Ifwe khumanyile mbu, omundu oukhuhoniiye oyo nomwonooni.”
25Omundu oyo nakalusia naboola ari, “Shienyala okhumanya naba nali omwonooni tawe. Eliemanyile nilikhuwa elala lionyene mbu, ndali omubofu, ne bulano enyala okhulola.”
26Nibamureeba bari, “Akhukholeele shiina? Akhuhoniiye arie obubofubwo?”
27Naye nabakalusia naboola ari, “Emalile khale okhumuboolela, nenywe shimwenyile okhuhulila tawe. Nishiina eshichila nimwenya okhukahulila khandi olwa khabili? Mwesi mwakhaba nimwenya okhuba abeechibe noho?”
28Nabo nibamunyeka nibaboola bari, “Iwe niwe omulondiwe, nebutswa ifwe khuli abalondi ba Musa. 29Khumanyile mbu, Nyasaye yaboolanga nende Musa, nebutswa ifwe shikhumanyile kata ewomundu oyo yarula tawe.”
30Omusaatsa watsana oyo nakalusia ari, “Kano nakohuchisia! Inywe shimumanyile ewa arulanga ta, nebutswa yakholile isie okhulola! 31Khumanyile mbu, Nyasaye shiarecheresinjia amakhuwa akabandu abonooni ta, habula arecheresinjia abandu abamuhelesinjia oluyali nende okhukhola aka yenya. 32Okhurula mukhuchaaka khweshialo khushili okhuhulilakhwo mbu, omundu atimbusiye tsimoni tsiomundu, owebulwa nali omubofu tawe. 33Omundu uno naba mbu, shiyarula wa Nyasaye ta, shiyakhanyaliilwe okhukhola likhuwa liosi liosi tawe.”
34Nabo nibakalusia nibaboola bari, “Iwe webulwa mubwonooni khandi nokhusilibwa mubwo, ne bulano oteemanga okhwechesia ifwe?” Kho nibamulonda okhurula musinagogi.
Obubofu bwomumioyo
35Olwa Yesu yahulila mbu, balondile omundu oyo okhurula musinagogi, yamukhaaba ne namunyoola, kho namureeba ari, “Osuubilanga mu Omwana womundu?”
36Naye nakalusia naboola ari, “Omwami, mboolela niye wina, siesi esuubile muye!”
37Yesu namuboolela ari, “Omalile okhumulola, khandi niye ouboolanga ninawe bulano.”
38Naye naboola ari, “Omwami, esuubiile.” Mana nasikama hasi niyenamila Yesu.
39Naye Yesu naboola ari, “Isie ndetsa mushialo okhukhalachila abandu eshiina, kho mbu ababofu banyalilwe okhulola, nabo abalolanga babofusibwe tsimoni tsiabwe.”
40Mana abandi khu Abafarisayo abaliho ninaye, nibahulila naboolanga amakhuwa ako, ne nibamureeba bari, “Oboolanga mbu, kata ifwe fwesi khuli ababofu noho?”
41Naye Yesu nakalusia naboola ari, “Nimuba nimwakhabeele ababofu shimwakhabeele neshikha shiobwonooni ta, nebutswa shichila muboolanga mbu, munyala okhulola kho mushili butswa neshikha.”
Currently Selected:
YOHANA 9: OLUPR
Highlight
Share
Copy
Want to have your highlights saved across all your devices? Sign up or sign in