YOHANA 13
13
Yesu yosia ebilenje biabeechibe
1Bulano yali niyishile inyanga ndala okhuula khunyanga yelisabo lia Pasaka. Yesu yamanya mbu eshiseshie shiokhurula mushialo nakalukha ewa Samwana shiulile. Yali niyaheela abo abali mushialo abali abebe, ne yali niyabaheelela elala.
2Yesu nende abeechibe bali nibaliitsanga eshiokhulia eshia hamukoloba. Setani yali namalile okhura mu Yuda, omwana wa Simoni Isikarioti amapaaro kokhukhoba Yesu. 3Yesu yamanya mbu, yahebwa obunyali bwosi nende Nyasaye khandi yarula khu Nyasaye, ne akalukhanga khu Nyasaye. 4Kho yasinjila, nafwalula ikanzuye nachira hasi, ne niyebohela itawulo mushishienjeshie. 5Mana natsukha amaatsi khulukaraya, ne nachaaka okhwosia ebilenje biabeechibe. Nabieya neyitawulo eya yali niyebohele mushishienje eyo. 6Mana niyola khu Simoni Petero, ne Simoni namuboolela ari, “Omwami, toto mwene wenyanga okhwosia ebilenje bianje?” .
7Yesu namukalusia ari, “Iwe shionyala okhumanya bulano eshia isie ekholanga ta, habula olamanyilisia olunyuma.” 8Petero naboola ari, “Shikanyalikha kata nahatuutu iwe okhwosia ebilenje bianje tawe!”
Yesu namukalusia ari, “Nindalakhwosia ebilenjebio ta, kho shiolaba omwechi wanje khandi tawe.”
9Simoni Petero namukalusia ari, “Omwami, olanzosia butswa ebilenje bionyene ta! Habula wunzosie amakhono nende omurwe.”
10Yesu naboola ari, “Omundu yesi yesi oumalile okhwisinga abetsanga nalabiile elala, ne shiakhoyile okhwisinga khandi ta, habula okhwosia ebilenjebie bionyene. Inywe mwesi muli abasiiyikhu halali mulala khwinywe shiali omusiyikhu tawe.” 11Yesu yali namanyile owali natsia okhumukhoba; nishio eshiachila naboola mbu, “Mwesi shimuli abasiiyikhu ta.”
12 #
Luka 22:27
Olwa Yesu yali niyakhoosia ebilenje biabeechibe boosi, yefwale ikanzu mana nakalukha niyekhala. Ne nabareeba ari, “Mumanyile eshiandakhakhola khwinywe bulano? 13Munanganga isie mbu, Omwechesia khandi mbu Omwami, ne muli habwene, okhuba nolwa endi. 14Kho nikaba isie ouli Omwami khandi Omwechesia wenywe, ndakhosia ebilenje bienywe, mwesi khandi, mukhoyile okhwosanie ebilenje murio. 15Ekholile eshia mukhoyile okhulolelakhwo, kho nenywe mwesi mukhole murio shinga olwa emukholeele. 16#Mat. 10:24; Luka 6:40; Yoh. 15:20Emuboolela toto mwene mbu, abulaho omukhabani ouli omukhongo okhushila omwamiwe tawe, khandi shialikhwoho omurumwa ouli omukhongo okhushila owamuruma tawe. 17Ne okhuba inywe bulano mumanyile amakhuwa kano, mulaba abeikhabi nimuba nimukakhola.
18 #
Tsits. 41:9
“Shimboolanga khukenyu mwesi ta, isie emanyile abo abandalobola. Nebutswa Amahandiko okhuula kosibwe akaboolanga mbu, ‘Omundu owandalia ninaye ebiokhulia bianje niye oungalukhanekhwo.’ 19Isie emuboolela kano nikashili okhwikhola, mbu olwa kaba nikakhekholekha, mulasuubila mbu, ‘Isie Nisie.’ 20#Mat. 10:40; Mrk. 9:37; Luka 9:48; 10:16Emuboolela toto mwene mbu, owinjisia omundu yesi yesi owa isie eruma, yanzinjisia isie, ne owinjisia isie amwinjisia oyo owaruma isie.”
Yesu aranjilila okhurumbula akokhukhobwakhwe
(Mat. 26:20-25; Mrk. 14:17-21; Luka 22:21-23)
21Olwa Yesu yamala okhuboola amakhuwa ako, yanyakhana muno mumwoyokwe, ne naboola habulafu ari, “Emuboolela toto mbu, mulala khwinywe alakhoba isie.”
22Abeechibe nibahengana abeene khubeene nibahuka muno, nibalamanya owa yali naboolangakhwo tawe. 23Mulala khubeechi abo, owa Yesu yali niyaheela muno, yali niyekhaale ahambi nende Yesu. 24Simoni Petero namukhomola ne namuboolela ari, “Muureebe mbu niwiina owaboolangakhwo.”
25Kho omwechi oyo nasita ahambi khu Yesu, mana namureeba ari, “Omwami, niwiina owoboolangakhwo?” 26Naye Yesu namukalusia ari, “Owa ndalahelesia eshitonye shiomukaate eshietonjile mushikaye, niye omwene oyo.” Mana nabukula eshitonye shiomukaate, natong'a mushikaye ne nahelesia Yuda, omwana wa Simoni Isikarioti. 27Ne olwa Yuda yalia eshitonye shiomukaate eshio, Setani yamwinjilamwo. Kho Yesu namuboolela ari, “Khola bwangu elia wenya okhukhola!” 28Abulaho khu abali nibaliitsanga ebiokhulia abo, owamanyilisia eshiachila Yesu namuboolela ario tawe. 29Ne shichila mbu, Yuda niye owachinganga omufuko kwamapesa, balala khubeechi bapaara mbu, Yesu yali namubooleele okhutsia okhukula ebienyekha khulwa lisabo, noho okhuhaanakhwo eshindu khubamanani.
30Olwa Yuda yamala okhulia eshitonye shiomukaate eshio, yarula lwangu natsia elwanyi. Ne shiali eshilo.
Lilako liyia
31Olunyuma lwa Yuda okhutsia, Yesu yaboola ari, “Bulano oluyali olwa Omwana womundu lulafwimbulwa, nalwo oluyali lwa Nyasaye lufwimbuliilwe muye. 32Ne oluyali lwa Nyasaye niluba nilufwimbulilwa muye, kho Nyasaye alafwimbulila oluyali olwa Omwana womundu muye omwene, ne alakhola ario lwangu. 33#Yoh. 7:34Baana banje, shienzia okhuba ninenywe eshise eshiraambi tawe. Mulakhaaba, nebutswa emuboolela bulano akandaboolela abemilisi ba Abayahudi endi, ‘Shimunyala okhutsia aha isie enzitsanga tawe.’ 34#Yoh. 15:12,17; 1 Yoh. 3:23; 2 Yoh. 1:5Ne bulano emuhelesia inywe lilako liyia mbu, muheelanenje abeene khubeene. Shinga olwa isie ndamuheela inywe, kho nenywe okhuula muheelanenje abeene khubeene. 35Nimwakhaheelana abeene khubeene, abandu boosi balamanya mbu, muli abeechi banje.”
Yesu aranjilila okhuboola mbu, Petero namwikaane
(Mat. 26:31-35; Mrk. 14:27-31; Luka 22:31-34)
36Simoni Petero nareeba Yesu ari, “Omwami, otsitsanga hena?” Yesu namukalusia naboola ari, “Shionyala okhunondakhwo bulano ewa isie enzitsanga tawe, nebutswa olunyumakhwo olanondakhwo.”
37Petero namureeba ari, “Omwami, nishiina eshichila endeshe okhukhulondakhwo bulano? Isie ndirecheeshe okhufwa khulwa iwe!”
38Yesu namureeba ari, “Iwe toto wirecheshe okhufwa khulwanje? Ekhuboolela toto mbu, itaywa niyishili okhulakula, olaba niunzikaanile akhandi khataru.”
Currently Selected:
YOHANA 13: OLUPR
Highlight
Share
Copy
Want to have your highlights saved across all your devices? Sign up or sign in