Matewuzhu 4
4
Ozayiniwa wa Yinsa
1Aphano Yinsa khuthuuliwa ti Rooho Ttakatthiifu khweettaniwa n'yaara, yoori alawe azayiniwe ti Sheethwani. 2Paata ya ofuka siikhu arupayiini nthana na osikhu, khunkhola jala. 3Namazayini khumwaattama khumuuza yoori: “Nkhama weeyo o Mwaana wa Nnyizinku, orume mawe apo athatuwe eeye phaawu.”
4“Khahiyo phaawu paasi enimwinkhaaye ntthu ohaayi,
ila nttakhuzi looshi linlankhaaye nkhanyo wa Nluku.”
5Elottelanaka, Sheethwani khumweettana sitati ttakatthiifu, khunweza phantte yawiishela olepa ya Nyuupa Yoosifwiwamo, 6khumuuza yoori: “Nkhama o mwaana wa Nluku, ojeeselele vathi aphale.” Maana yaatikhiwa yoori:
“Ye ontta oruma malayikha awe awiinanele,
atthaapo antta wuukholelela na makhono aya
yoori ohikwakwanttuwe va liwe.”
7Yinsa khunjipu yoori: “Theenya yaatikhiwa yoori: ‘Ohimweeze Mbwana, Nluku awo.’ ”
8Sheethwani khunthuula theenya khumweettana vamwaako mmote woolepa venkivene khunthoonyeza ofwalume wooshi wa olumwenku na siifwa yaya. 9Khumuuza yoori: “Zooshi epi kiniwinkha amana okokhora okaaputu.” 10Yinsa khumuuza yoori: “Oleevo, Epiliisi! Maana yaatikhiwa yoori:
“ ‘Omwaaputu Mbwana, Nluku awo,
na onrumeyele othuuto paasi.’ ”
11Aphano Sheethwani khumwaattuwa, khuta malayikha oteela onrumeyela.
Yinsa onaaza khaazi yawe Kalileya
12Wakathi Yinsa asiiliyeevo yoori Yaahaya afukiwa, khurutela Kalileya. 13Khulaawo Nazareeti khulawa khwiikhala Kafwaranaawu, yaari nshini wa pahari, nti wa Zebulooni na Nafitaali, 14yoori erettikhane etile alupiyeeyo napiyu Ezaaya yoori:
15“Nti wa Zebulooni, na nti wa Nafitaali,
tarikhi ya pahari, kaapu ya Yorotaani,
Kalileya ya amalapo!
16Atthu aari wiikhalaaye n'yiiza
oona nuuru khuluyeene;
khwa apale aari wiikhalaaye miti za mwiivuuli wa ofwa,
amwasikheliwa ti nuuru.”
17Waaza attaapho Yinsa khwaaza olaleya hapari alupaka yoori: “Mwithupwiye, maana ofwalume wa pinkuuni ori kharipu.”
Yinsa oniwaakhuwela anakhiyoni amwanzo
18Eettaka weettetta shiini ya Pahari ya Kalileya, Yinsa khuwoona attwi awiri: Simawu, aniitthiwaaye Pheeturu, na ttwiiye Antere. Yo aari weeselela matthavi aya mpahari, maana yo aari anamajiya. 19Yinsa khuwooza yoori: “Mwikilotte, miiyo kintta wuurettani o namajiya wa a atthu.” 20Nasaapiru yo khulikha matthavi aya khusala anlotta. 21Eettaka olawa etthiipile khuwoona attwi akina awiri: Tiyaaku, mwaana wa Zepeteewu, na Yaahaya, ttwiiye. Yo aari mmwaatiya na papaaya Zepeteewu, attalelaka matthavi aya. Yinsa khuwaakhuwela, 22nasaapiru yo khunlikha papaaya na mwaatiya, khunlotta.
Yinsa ontafusiri Kalileya yooshi na owaavonisa alwele enkeene
23Yinsa eettettiye Kalileya yooshi asomisaka mmasinakooka, atafusiraka hapari zooshapweya za ofwalume na avonisaka marati ooshi vakatthi wa atthu. 24Hapari monkoni wa ye khumwazeyela Siiriya yooshi, atthu khusala awaatiisa ooshi apale aarina marati na aari woonaaye olwaaza, anamajini, anatutu na anamarakala; ye noowaavonisa. 25Atthu enkeene khusala anlottelela oolankha Kalileya, Tekapooli, Yeruzaleemu, Yudeya na a nti wa phantte kiina ya muuttho Yorotaani.
Currently Selected:
Matewuzhu 4: eko
Highlight
Share
Copy
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.