ZEKHARIAH 1
1
Bawipa naw a chang gui ami law ba vai ah khü gui ci
1Darius cu Persia ghangpughang ah a kyak nak, a kum goi nak, a cha cheit nak ung Iddo ah tu, Berechiah ah hta, prophet Zekhariah am Bawipa naw shin ah ng’thu cu pek ci. 2Zekhariah naw a chang gui am, am thein ba gui vai ah M’gäi ciah Bawipa ah thu m’thein cu, “Kei Bawipa cu na pupa gui ah khan ah ang htei ah ka m’lungshe ci, 3cun ung phi tuhbäi ka pyen cu, ‘Kei ah law ba vä, kei phi nangmi ah ka law ba khai. 4Nami pupa gui ah mäih ah kä nami kyak vai, cau pui prophet gui naw ak she ah kä ami om ba vai, kä ami cheishoh ba vai ah kei ah ng’thu cu m’thein gui ci gui. Cun ung phi ngami naw kä ngai u ne kä na läk ci gui. 5Nami pupa gui lacun ah prophet gui cu kä om ba ci gui. 6Kei naw ka chang gui prophet gui ung nami pupa gui am thumkhän la m’cäi nak cu ka pe gui ci. Cun ung phi ngami naw a i ah kä ngai u ne, acun ah amawng ma ung yaica ci gui. Cun kawn ah ngami cu ng’yu ba u neta, kei M’gäi ciah Bawipa naw ka pyen ah mäih ah ka m’kyuk gui ciah pyen ci gui.’ ”
Prophet naw Amang ung a Hmuh ah ng’se gui
7Darius cu ghangpughang ah a kyak nak, akum goi nak ah a cha lei ät nak (shebat cha), a hnüüp m’ku lei phli hnüüp ung Bawipa naw khawmü ah ka ng’mang ung thu na m’thein ci. 8Kei naw ng’se asen ng’cuum ciah chang tumat cu ka hmuk ci. Ani cu m’htai ghing gui ah hmu khaw ng’nawi ung düi ci. Ani ah hmu ah ng’se gui — asen, amvo la a bawk gui om ci gui. 9Kei naw, “Saya aw, shin ah ng’se gui cu a i gui ang?” cine ka ng’shik ci.
Ani naw, “A i ah ami kyak cu kei naw ka ning m’hnuh khai nei, 10ngami cu hteit ne khomdek ng’shi k’thäh khai gui ah Bawipa naw a tüih gui nei.”
11Ngami naw khanchang am ami m’thein law ba ci, “Keimi cu khomdek avan ung hteit u ne, khomdek khan avan cu amgein kaa ah ng’yaai ne om sei kami hmuk ci nei.”
12Khankho chang naw, “M’gäi ciah Bawipa, nang cu Jerusalem la Judah mang gaw gui ah khan ah tuhbäi güt khawkum chihkip ung na m’lungshe ci nei. Nam’gein nak gui na m’dang vai cu khaw a i güt sho ba khai ang?” cine ng’shik ci.
13 Bawipa naw khanchang cu ng’thuni awn m’shang tuba ci, 14Khanchang naw M’gäi ciah Bawipa ah ng’thu ka shä vai ah ana m’thein cu, “Theingcim ciah Jerusalem ka mang gaw cu, kei naw ak thuuk ah m’hni ne ka ng’ä nak ci nei. 15Zeikyai ding gei ciah pakhui gui ah khan ah anghtei ah ka m’lungshe ci nei. A i ah kyaseici ung kei naw ka chang gui ah khan ah ka m’lungshe nak ka m’dang law vai ung, cun ah pakhui gui naw, ka chang gui ani geinvai vai ah akshe ah bik ci gui nei. 16Cun ah kyasei ka m’gein nak ka m’dang khai ah Jerusalem mang gaw ah ka lawk ci nei. Ka Taigüim cu m’thawh ba vai, ka mang gaw phi cawh ba vai nei.”
17Khanchang naw shäu vai ah kei am ana m’thein cu, “M’gäi ciah Bawipa naw a pyen cu, a mang gaw gui cu bühmang ba khai gui, ani naw Jerusalem cu m’htei ba khai, a mang gaw cu ka nab a khai” ciah kyak ci.
A ng’mang ung a Hmuh ah Puuk gui
18Cun kawn ah kei naw ka ng’mang ung seiki phli cu ka hmu ba ci. 19Kei awn kani ng’thu ciah khanchang cu, “Shin ah seiki gui cu a i gui ang?” cine ka ng’shi ci.
Ani naw, “Cän gui cu Juda, Israel, Jerusalem ung chang gui püi pawng sak gui ciah huham ah kyak ci nei” cik ci.
20Cun kawn ah Bawipa naw ng’ki kawt ciah bii k’bi chang phli cu na m’hnuh ci. 21Kei naw, “Shin ah chang gui a i bik khai gui ah lawk ci gui ang?” cine ka ng’shik ci. Ani naw, “Ngami cu Judah khaw m’shiu ne, chang gui püi pawng sak gui ciah pakhui gui cu, tuh ne k’täm gui khai gui ah lawk ci gui nei” cik ci.
Currently Selected:
ZEKHARIAH 1: CBC
Highlight
Share
Copy
Want to have your highlights saved across all your devices? Sign up or sign in
Cho Bible Common Language © Bible Society of Myanmar, 2016.