MATTHE 8
8
Bawipa Jesuh naw Kheilei ung Gaw ci Theek Sak Ci
(Mk 1:4-45; Lk 5:12-16)
1 Bawipa Jesuh cu m’htung khan ah kaa kyum law ba khätah, chang khli naw läk lawk ci gui. 2Cun sang ung kheilei ung gaw ciah chang tumat cu, Bawipa ah ma ah m’kuukdoong netah, “Bawipa na ng’yak hlü a om ung kei ah gaw nak cu na theek sak ä,” cik ci.
3 Bawipa Jesuh naw a kut k’phiaat ne hei tawn netah, “Ka ng’yak hlü om ci nei, theingthap sä,” cik ci. Acun vai-am cun ah chang cu theek ne gai ba ci. 4Bawipa Jesuh naw, “Shin ah mawng cu a u-am kä nam thein-en vai, cun ung phi taigü ng’vai ah hteit ne na pumsa cu nam hnuh vai, cun kawn ah na gai nak ah mawng ang dang vai ah Moses ah thukhän ah mäih ah peit taak nak na bi vai,” cine pyen nak ci. #Tgt 14:1-32
Roman Gabawi ah Changshäm A Gai Sak ah Mawng
(Lk 7:1-10)
5 Bawipa Jesuh cu Kapernaum gawnu ah a gawk law yah ung, Roman gabawi cu a pei ah law netah, 6“Bawipa, kei ah ka chang tumat cu ang htei ah gawpai ne, a ih phak ung ng’yän ci nei,” cine ng’hui paa nak ci.
7 Bawipa Jesuh naw, “Kei naw law ne ka gai sak khai nei,” ci khätah;
8Gabawi naw, “Nang cu kei awn kä ni khin ciah kyak sei, ka im kyong ah na law vai ah kä khin pang ci nei, m’khüt näng nak thu bäng na pyein ung ka chang cu gai ba khai nei. 9Kei cu kang vai ah ng’thu ka ngai ci, kei ah kaa ah phi gakap gui om ci gui. Gakap tumat cu hteit ä, ka ci ung hteit ci, law ä, ka ci ung lawk ci, ka changshäm cun phi cun bi ä, ka ci ung bik ci,” cine pyein ci.
10Cun a ciah thu cu Bawipa Jesuh naw ng’ya ne cäicat netah, chang gui-am, 11Kei naw akcang ka pyein cu, shin ah mäih yum nak cu Israel chang gui ung kä ka hmu man ci. Chang akda cu hni law lam la hni kiaak lam ah ka Law u ne, Abraham ni, Isaak ni, Jakob ni gui awn a täng ah vunvai ne ei auk khai gui. #Lk 13:29 12Cun ung phi uknak kho ung khai shi ah chang gui läi cu thüi kyah nak, ha htui ne geinvai nak ah ak pung lam kho hmüp khui ah k’täm gui khai,” cine pyein ci. #Mt 22:13; 25:30; Lk 13:28 13Cun kawn ah Bawipa Jesuh naw, gabawi-am, “Na im ah hteit ba ä, na yum ah mäih ah kyak khai nei,” cine pyen nak ci. Acun yah ung gabawi ah chang cu gai ba pyii ci.
Chang Akda A Gai Sak ah Mawng
(Mk 1:29-39; Lk 4:38-41)
14 Bawipa Jesuh cu Peter ah im ah hteit netah, Peter ah kawinu gaw ne ih phak ung ng’yän sei hmuk ci. 15Bawipa naw cun ah hnumi ah kut cu tawn khätah, ani cu acun vai-am gai ba ne, Bawipa Jesuh cu khin nak ci.
16Khomü lam ah chang gui naw khoshe ah kai, chang akda law püi u sei, khoshe gui cu k’de ne k’täm gui ci. 17Cun ah abi gui cu profet Isaiah ah ng’thu ung, “Kami gaw nak gui näng ne, kami nat nak gui hteh püi yawp ci nei” cicu a khüm nak ah kyak ci. #Isa 53:4
Bawipa Jesuh ah Khahpüi ah kya Hlük Ciah Chang Gui
(Lk 9:57-62)
18 Bawipa Jesuh naw a pei ung ah om ciah chang gui teng gui netah, tuili nu hei gaa ah vah kai vai ah, ang düihpüi gui cu khü gui ci. 19Thukhän saya tumat cu law netah, “Bawipa na hteh nak päng ah ka ning läk tuk khai nei,” cine kyak ci.
20 Bawipa Jesuh naw, “Sa-ui cu a khui om ne, kha cu ang bu om ci, cun ung phi chang ah Htapa cu ang düm nak vai a i kä om ci,” ci ne pyen nak ci.
21Ahei ang düihpüi tumat naw, “Bawipa, kapa ah gook ka va htüm ba cang khai,” cine pyein ci.
22Cun ung phi Bawipa Jesuh naw, “Ka hnu ah na läk ä, ak si cu ak si gui naw htüm u sä,” cine pyen nak ci.
Bawipa Jesuh Naw Puikho Khi Ci Ng’düm Sak Ci
(Mk 4:35-41; Lk 8:22-25)
23 Bawipa Jesuh cu hleiko khan ah hang kai ba sei, ang düihpüi gui cun phi hteit tu ba ci gui. 24Tuilinu ung akten ah puikho khinu ng’pheet ne khi ne, hleiko cu tui ng’hnawk naw k’plüm lawk ci. Cun ung phi Bawipa Jesuh cu abü ah ip ci. 25Ang düihpüi gui naw Bawipa Jesuh cu m’tho u netah, “Bawipa na hun gui ä, kami si lawk khai kyak ci nei,” cine pyein ci gui.
26 Bawipa Jesuh naw, “A i ah kyasei nami kyih aih ang? Nami yum nak ken aih ci nei,” cine kyak na gui netah, khokhi tui ng’hnawk cu k’de ne ng’düm sak sei, acun vai-am khokhi cu ng’düm yawp ci.
27Ang düihpüi gui cu cäicat u netah, “Shin ah chang cu a i chang leng leng ang, khokhi tui ng’hnawk naw phi ang thu ngai ci nei,” cine kyak ci gui.
Chang Sing Goi ung Kaa Khoshe Aktäm Nak
(Mk 5:1-20; Lk 8:26-30)
28Cun kawn ah Bawipa Jesuh cu tuilinu ah vang-gaa, Kadra kho lam ah vah kai ci. Cun yah ung khoshe ah kai chang sing goi cu, ng’cim hmun ungka lut law ni ne, Bawipa Jesuh cu hmu lawk ci goi. Ngahni cu ngetngawng aih ni sei cun ah lam ung a u kä hteit ba ci. 29Ngahni naw, “Khanpughi ah Htapa, Bawipa, nang naw keini cu a i ah na na ci goi hlük ci ang? Akhin kä gawk law pha sei keini cu, na nam kat goi khai ah na lawk ci ma?” cine m’lau ci goi.
30Cun ah chang goi awn api ang shawng nak ung, vawk mak ät cu ei ei ne om ci gui. 31Khoshe gui naw, “Bawipa, keimi na na k’täm gui vai ung, vawk gui ung kami luh vai ah nam gein gui ä,” cik ci gui.
32 Bawipa Jesuh naw, “Hteit vä,” ci khätah, khoshe gui cu chang goi ungka lut law u ne, vawk gui ung lut ci gui. Vawk gui mak ät lüng cu, tuikam yung ah ng’täm tu ne dawng u ne, tuili ung lut ne si yawp ci gui.
33Vawk shäm ci gui cu gawnu kyong ah dawng ba u netah, khoshe ah kai ah chang goi ah mawng la ami hmuh nüng avan cu pyein ne ngak ci gui. 34Cun ah kyasei pigaw ah chang avan cu Bawipa Jesuh ah om nak ah gawk lawk ci gui. Bawipa Jesuh cu hmuh law u netah, ami kho ung kä a om ba lä vai ah ng’ge püi ci gui.
Currently Selected:
MATTHE 8: CBC
Highlight
Share
Copy
Want to have your highlights saved across all your devices? Sign up or sign in
Cho Bible Common Language © Bible Society of Myanmar, 2016.