Matthai 9
9
Zingsuv Ta A pakyapapaa A Patluo Sa
(Mar 2:1-12; Luk 5:17-26)
1Zingsuv ca sawkawpalaw chung luo kha kie te riyliy kha va te pakhaa te a khy luo kha a pha. 2A pakyapa pakha kha a pangphaa hne a vya puvle yite amaa luo amaa vaw khyi. Zingsuv ta khatluv tama ama zang tapa kha a hmung tiy yi ta a pakyapapaa kha, “I sapaa, na palung a cahra sa, na suena ca a ngiethe pata a cuo tli,” a ta.
3Cakhutaa phungbie saya tie chekha ta iema hne iema kha, “Hingpapaa hing Khazing ese patana bie a ri,” amaa ta.
4Cuorasala Zingsuv ta khaapama ama rue tapa kha a pachang nakawta, “Khaapanakawma hmang pha lipa ca nama rue? 5“Na suenapa ca a ngiethe pata na cuo tli,” tapa ma a na vie, a cuo li kie, ‘Thu la cakuo tie,’ tapa ma? 6Cuorasala Cawsaa Saacapaa ta hing chuelyi lie hing sue a ngiethe khuna naw a hnyi tapa kha nama pachang the na riypatana a cuo ta te a pakyapapaa kha, “Thu, na pangphaa kha a la lah ing luo cakuo,” a ta.
7Cawsaapapaa ca thu te ing luo a cakuo. 8Cawsaazaapuv ca ama kha ama hmung tiyta, ama nang ta uosa te, cawsaapa zaw'a lieta hinghaapa nawhnyina a pipa Khazing kha ama pathuosa.
Zingsuv Ta Matthai A Ku
(Mar 2:13-17; Luk 5:27-32)
9Zingsuv ca a vya cakuole pa khata Matthai ama tapapaa ngukhyina zung lie aa tu nguoluo pakha hmung te, “Na ziy tie,” a ta. Matthai ca thu te ama kha a ziy.
10Cakhutaata sa ning riypata ingchung lie aa tu ning kha, ngukhyituv hluvpuv, hne a suepa tie kha a vaw yite Zingsuv hne ziytuv tie'a lie kha amaa tu ra. 11Farasi tie ta ama hmung ca ziytuv tie kyihuo khata, “Khaapanakawma nama sayapa hing ngukhyituv tie'a nata a suepa zaw hneta sa a ning?” ama ta.
12Zingsuv ta a thyi tiyta, “A tluopa cawsaa ca siybyi a hu vayi, a pasapa dyina a hu yi, a ta. 13Cakuo ungla, ‘Hriykhung a rina laata cawsaa nangdue thena khana i khingpa ta a cuo,’ a tapa Caapathepa bie ta a ri khingna kha va rue tie ung. Cawsaa aa dangpa ku riypata a vaw va ang, a suepa ku riypatana i vaw,” a ta.
Sa-uvna Kaw
(Mar 2:18-22; Luk 5:33-39)
14Cakhutaata Johan a ziytuv tie kha Zingsuv'a luo a vaw yite, “Khaapanakawma kiema hne Farasi ming hing sa maa uv lawmaw pata nama caa ziytuv tie hing sa uv li pata ama aw?” ama ta. 15Zingsuv ta, “Nungchiyna pyi luo kupa tie ca napuv a chiytuvpapaa iema'a lie a aw kalie chung ca ngiechi pata ama aw the'a ma? Nung a chiytuvpapaa kha iema'a taata aa chena cuo kha vya tlung'a te cathue cata sa kha ama uv thluo'a lie. 16Ahungtahmuo cawhlungpa kha cawthaapa ta abie thla buo vayi, a pangbie khata tlaa khyi hryly'a te a khue kha a ku hryly aa. 17Cahaa cata savang ungthyi hlungpa chung luo kha mingsuv tiy ahrang raw buo vayi, ama raw kieca savang kha kyi'a te mingsuv tiy kha a zuv diy aa, savang ungthyi zaw a ra diy puo aa. Calaacata savang thaapa chung luo kha mingsuv tiy ahrang ama raw kieca a suohning ta amaa bang hne aa,” a ta.
A Hring Pakhaapa Haatiy Nung Hne Patluosapa Canung Nung
(Mar 5:21-43; Luk 8:40-56)
18Zingsuv ta capa bie iema'a lie a ri nguoluo ning kha apungna-ing#9:18 Gk lieca apungna-ing tapa hing aw vyi. uvthyi pakha a vaw te, a hmiekunglie kha a pakhuv pane te, “Ata bala hingna i sacanungnung a thiy, cuorasala a vaw la a cunglie na kuv na khang kieca a tluo aa,” a ta. 19Zingsuv ca thu te ziytuv tie hne khata ama kha ama paziy. 20Capa ning cata kung hraa hlyihning chung thiylang pasana ta a pasapa canungnung pakha ca Zingsuv hnang luo taakhata a vaw te a pangpeta kha a taw. 21Amaa na ama ta, “a pang hing i taw khu kieca i tluo aa,” aa ta. 22Zingsuv ca a vya pali te capa nung ca a hmung. “I sacanung, na palung a cahra sa, na zangna na caa patluo,” a ta. Capahnecata canungnung ca a tluo.
23Zingsuv ca Judah ming uvthyipapaa ingchung luo kha a ngie tiyta khang hne daa hne tung yite cawsaa amaa kalaa patlawpa kha a hmung ca, 24“Pya diy ung, hingpa haatiynung hing thiy vyi, aa hmung nguoluo,” a ta. Ama bangkhuo ta ama pahnyisue. 25Cuorasala cawsaa ama pya diy pahne ta Zingsuv ca haatiynung khuo luo kha a ngie te, a buo ta va patuv te a kya thu. 26Capa thuohlaa ca a cahriy ruo bangkhuo ta a pathuo diy.
Zingsuv Ta Mingcuepa Pahning A Patluo Sa
27Zingsuv ca capa hmang taacata pya te a cakuole pa khata mingcuepa pahning ta vya paziyle yite, “David Saacapaa, ngie malie chi thi tie,” ta yite ama khi. 28Zingsuv ca ing chung luo a ngie tiyta mingcuepa pahning ca ama'a luo kha amaa vaw. Zingsuv ta, “Kama hingta ica patluo sa khu yi tapata nama zang ma?” a ta yi. “Abyipa, ma zang,” ama ta. 29Zingsuv ta ama ming kha hrie te, “Nama zangnapa haata cuose!” ta yite, 30ama ming ca a vuo pakhaa. Zingsuv ta, “Hingpa kaw hing ahunghmuo pachang sa'a va ungciy,” ta te iema kha a cusa pata a thlu yi. 31Cuorasala cakuo yite Zingsuv thuohlaa kha capa pe bangkhuo khata ama pathyi.
Zingsuv Ta Bie A Ri The Lipa A Patluo Sa
32Iema ama cakuo khu taata khuevuo a hnyi nakawta bie a ri the lipa pakha kha Zingsuv'a luo amaa vaw khyi. 33Khuevuo a papya khu pahne ta, cawsaapapaa ca bie a ri khu. Cawsaa bangkhuo ama kharue ta haasa te, “Israel ming chunglie hinghaapa hmang hing hmung buo va puv,” ama ta. 34Cuorasala Farasi ming ta, “Khuevuo tie byipa ming tana khuevuo a papya khu,” ama ta.#9:34 Hluo vie caa-uv lieca 9:34 hing aw vyi.
Sa Hrie Riypa A Hluv, A Hrietuv Ama Caw
35Zingsuv ca khypuv khyta bang-khuo kha tlawle te, apungna-ing chunglie kha vuoruo pena thuophaabie kha pacuv yite, pasanapa phangting ta a pasapa zaw kha a patluo sa yi. 36Cawsaazaapuv kha a hmung tiy yi ta iema cunglie kha kawpacuona a hnyi, tahematapakieca khietuv a hnyi lipa tuv haata riethyi vuosuo pata ama aw nakawta a cuo. 37Cacuonakaw ziytuv tie kha, “Sa hrie riypa a hluvsa a aw raalaa pata a hrietuv ca a cawta dyina a aw yi; 38cacuonakaw sa hrie riypa a hnyituv Abyipa'a luo kha sa a hrietuv a hluvsa a za pathlie riypata thlaa chuo tie ung,” a ta.
Currently Selected:
Matthai 9: LNT1
Highlight
Share
Copy
Want to have your highlights saved across all your devices? Sign up or sign in
New Testament in Chin Lautu © Bible Society of Myanmar, 2015.