Matthai 5
5
Thluechiy Bie
1Zingsuv ta cawsaazaapuv kha a hmung tiy yi ta tluocung luo kha kie te aa tu khu taata ziytuv tie kha ama'a luo amaa vaw. 2Bie ri kha pathu te a pacuv yi:
3Thlaapa luota a siy a pasapa tie ca thluechiypa tana ama cuo, tahema-tapakieca vuoruo pena ca iema huopa tana a cuo.
4Ngiechi pacuorung pata a caapa tie ca thluechiypa tana ama cuo, tahematapakieca Khazing ta ama hnaa a panguo'a yi.
5A nang a nepa tie ca thluechiypa tana ama cuo, tahematapakieca alyi ru na ama cu aa.
6A dangna kha nangdiy tiyhriepa haata a khingpa ca thluechiypa tana ama cuo, tahematapakieca ama khingna kha patling sapa ama cuo aa.
7Nangduena a hnyipa tie ca thluechiypa tana ama cuo, tahema-tapakieca Khazing ta iema kha nang a due ra'a yi.
8A palung a pathepa tie ca thluechiypa tana ama cuo, tahematapakieca Khazing na ama hmung aa.
9Arena a tuepa tie ca thluechiypa tana ama cuo, tahematapakieca Khazing ta i saata a ta'a yi.
10A dangnapa kawlieta hrisaa-thieruena a angpa ca thluechiypa tana ama cuo, tahematapakieca vuoruo pena ca iema huotana a cuo.
11Kama kawlieta cawsaa ta ca pachie yite, ca hrisaathierue yite, a pha lipa a phangphang kha aa hmuo lipa ta aca thawsue kie yi ca thluechiypa tana nama cuo. 12Nama palung tluo sala nama thaa pha se, tahematapakieca vuoruo lieta nama lawmuo a lesa aa. Hinghaahingtana niema hluo taapa profet tie zaw kha za ese yite ama za hrisaa.
Paciy Hne Khena
(Mar 9:50; Luk 14:34-35)
13Niema ca chuelyi paciy tana nama cuo. Cuorasala paciy ca a iena kha a vie kieca tuokhaatama pa-ie sa pakhaa khu pata a cuo aa? Thlahnena a hnyi li tli nakawta thaw pata tlawpuo riypa dyina a cuo tli.
14Niema ca chuelyi khena tana nama cuo. Tluocung lie tlapa khypuv ca khaapatahmuo pakhuo khu vyi. 15Ahunghmuo myi-ing ama vuo tiyta beke khaakhung buo vayi. Cuorasala myivuona cunglie kha khang yite ingchung bangkhuo kha a khe diy. 16Cahaa cata nama khena ca cawsaa hmielie kha khe se; tahematapakieca hmangpha nama tuepa kha hmung'a yite vuoruo lie nama Paa ming kha ama pathuosa aa.
Phungbie Hne Profet Tie
17Moses phungbie hne profet tie pacuvnapa kha para riypatana aa zuv tapata na rue kha ung. Para riypata a zuv va ang, patling sa riypa tuv tana i zuv. 18Biehmisi tana ica chang yi: Alyi hne vuoruo a ra hluo li phungbie lie a cawcepa caasuo suokha#5:18 Gk iota ama tapa Gk caa lieta a cawcepa caasuo a cuo zaw, phungbie chung taata ra'a vayi, a bangkhuo ta a tling diy hluo li ra'a vayi.
19Cacuonakawta ahungtahmuo cuose phungbie chunglie a cawcepa suokha kha ziy li pata para te malie zaw kha cahaa cata a pacuv kie yi ca ama ca vuoruo pena chunglie a cawcepa ta a cuo aa. Cuorasala ahunghmuo cuose phungbie kha ziy te malie zaw kha cahaa cata a pacuv kie yi ca vuoruo pena chunglie a lepa ta a cuo aa. 20Ica chang yi: phungbie saya tie hne Farasi ming laa hingta namaa dang vie li kieca vuoruo pena chung luo a ngie khu'a va ungciy.
Hihaana Kaw
(Luk 12:57-59)
21Hluo ningta ca, “Lie va naw kha; lie a nawpa ca bieripana na a ang aa,” ama za ta pakha nama thyi. 22Cuorasala kama ta ca: a uv a nu, a sieta cunglie a hi a haapa ca bieripana kha nama ang aa; a uvta a nuta, a sieta kha, siysaa ri li pata a esepa ca bieripana zung luo chiykhyi pata cuo'a ung cate, a uv a nu, a sieta kha, ‘a ngaapa,’ a tapa ca hell#5:22 Gk Gehenna myi chung luo tla riypata aa tlapa nama cuo aa,” a ta. 23Cacuonakawta nama lasaw kha bienatluophie lie nama pi tiyta, na uv na nu, na sieta pakhakha ta na cunglie a palung a tling lipa kha naa thyi kieca 24na lasaw kha bienatluophie hmielie chi siy la a catli pata cakuo la na uvnu, na sieta hne a rena kha va tue tie. Cakhutaacata vya kaa la na lasaw kha Khazing ca pi tie.
25Tazaa caa cyipa hneta bieripana zung luo nama vaale ning khata ama kha a rena tue tie. A cuo li kieca tazaa caa cyi pata bieribyi kuv cung luo, bieribyi ta paliy zung luo ca chiykhyi'a te thaw pathla pata na cuo aa. 26Biehmisi tana ica chang yi: lu riypa bangkhuo na lu diy hluo li thawchung taata pya'a vaciy.
Nungvaathingsuena Kaw
27Nungvaathingsuena tue kha ung ama ta tawpa ca nama pachang. 28Cuorasala kama ta ca: canung pakha kha suehnekhingna pathiypalung hne a mangpa ca a palung chunglie ta nungvaathingsuena kha capa nung hne cata a tue tli. 29Cacuonakaw na cacuo ming ta aca pasue sa kieca, cakhyi la thaw tie; na pangpa palang ta hell luo tlapa laa taca na pangpa chebuo suokhakha naa sungpa ca a pha vie. 30Na cacuo kuv ta aca pasue sa kieca, te la thaw tie. Na pangpa palang ta hell luo tlapa laa taca kuvphyi suokhakha a sungpa ca a pha vie.
Napuv Mana Kaw
(Mat 19:9; Mar 10:11-12; Luk 16:18)
31Ahunghmuo cuose a napuv ama kieca manapa caa pacyi se, tapata ripa a cuo hyi. 32Cuorasala kama taca hinghaahingta ica chang yi: Capaa ta a napuv kha capaa hrangpa hne suena kawlie ta li pata a hrangpa kawlieta a ma kieca a ama kha nungvaathingsuena a patue sapa ta a cuo, capa nung a hlawpapaa zaw kha nungvaathingsuena a tuetuv ta a cuo ra.
Bie A Kuona Kaw
33“A hmuo li pata chie a sa'a va ungciy, cuorasala Abyipa'a lie nama tue ciepa biekuona kha patling sa tie ung,’ tapata hluo ningta ama za ripa kha nama thyi. 34Cuorasala ica chang yi: Chie a sa kha ung; vuoruo ming caba pata chie a sa kha ung, tahematapakieca Khazing a tuna tana a cuo. 35Alyi ming caba pata chie a sa kha ung, tahematapakieca Khazing phyi pathlana tana a cuo. Jerusalem ming caba pata zaw chie a sa kha ung, tahematapakieca siepahruolepa awna khypuv tana a cuo. 36Nama luv nama puo caba pata zaw chie a sa kha ung, tahematapakieca nama suobuv buvkha hmuota nama paruo sa khu li pahaata pavaw sa khu va ungciy. 37‘A cuo,’ ‘Cuovyi,’ tapa dyi kha ri tie ung, hingpa laa hingta a hlyipa bangkhuo ca a pha lipapaa'a taata a vawpa tana a cuo.
Vieriythungna Kaw
(Luk 6:29-30)
38“Ming cuota ming, haa cuota haa, tapata ama ripa kha nama thyi. 39Cuorasala ica chang yi: phalina a tuepa kha thlu ri kha ung. Cuorasala cawsaa pakhakha ta na cacuo luo be aca tung kieca, kuo kha luo kha va chawpa vie tie. 40Na buohryi a khing nakawta tazaa aca cyi kieca, na buohryicungle zaw kha pi chiy vie tie. 41Cakhutaata pakhakha ta hruohra li pata kilometer suokha aca cakuo sa kieca, kilometer suohning te khata va cakuo tie. 42Chechiy caa hiepa kha va pi la; du caa cyipa kha va thlu kha.
Cariepa Duena Kaw
(Luk 6:27-28, 32-36)
43“Nama viesaa kha due ungla nama carie kha hue tie ung, ama za ta tawpa kha nama thyi. 44Cuorasala kama taca hinghaahingta ica chang yi: Nama cariepa tie kha due ungla caa hrisaathieruepa tie cuo khata thlaa chuo tie ung; 45cahaacatana vuoruo lie a awpa nama Paa saata ta nama cuo aa. Tahematapakieca ama ca cawsaa chiepa hne cawsaa phapa cunglieta ning kha pachiy sa kaluo te, aa dangpa hne aa dang lipa cunglieta kha khy a pasaa sa kaluo. 46Caa duepa dyi nama due kieca khaapa lawmuo ma nama hmung aa? Ngukhyituv tie tahmuo cahaa cata ama tue ra cuo vama? 47Na uvnu hne na sieta zaw dyi kha bie naa chang kie yi ca, malie laata namaa nanang vie napa a aw ma? Khazing a bie lipa tie hmuo cahaa cata ama tue ra cuo vama? 48Vuoruo lie a awpa nama Paa a tling pahaata niema zaw a tlingpa cuo ra tie ung.
Currently Selected:
Matthai 5: LNT1
Highlight
Share
Copy
Want to have your highlights saved across all your devices? Sign up or sign in
New Testament in Chin Lautu © Bible Society of Myanmar, 2015.