ZACARÍAS 13
13
1Chai huatacunapica, Davidpaj miraicunapajpash, Jerusalenbi causajcunapajpash, llujshijuj yacu pascashcami tianga. Paicunapaj juchahuan mapayashcamanda mapa illaj tucuchunmi, chaica tianga” nijurcami. 2Tucuita Mandaj Diosca, cashnatapashmi nin: “Chai punllapica, tucui cai llactapi tiaj imamambash rijchaj dioscunapaj shuticunatami anchuchisha. Shina rurajpimi chaicunataca, cutinga napacha yarinajunga. Llullashpa villaj runacunatapash, mapayachij ayatapashmi, cai llactamandaca chingachisha.
3Chaipica, cashnapashmi tucunga: Dios villashcatashnami, maijan cashpapash villajunga. Shina villajpimi paipaj taitallata, paita unguj mamallata cashna ninga: ‘Mandaj Diospaj shutipimi villajuni nishpa llullashcamandaca, na causanguichu’ nishpami, paipaj taitallata, paita unguj mamallata, yalijta tujsishpa paitaca huañuchinajunga. 4Chai huatacunapica, cashnapashmi tucunga: Llullashpa villajcunaca, muscuipishna paicuna ricushcata villajushpapash, tucuicunami pingai tucunajunga. Paicunaca, milmayu jatun churajunataca llullangapajllapash, na ashtahuan churajungachu. 5Chaimandami cashna ninga: ‘Ñucaca, profeta runaca na canichu, pambapi tarpushpa causajllami cani. Ñucaca, chairalla viñaimandapachami pambapi tarpushpa causani’ ningami. 6Shina nijpipash, paitaca cashnami tapunajunga: ‘¿Imashpata maquitaca chugrircangui?’ nijpica: ‘Ñucapaj ali cumbacunapaj huasipimi chugrichihuarca’ nishpami tigrachinga” nijunmi.
Mandaj Diospaj michijtami chugrichishca
7Tucuita Mandaj Diosca, cashnatapashmi nijurca: “Espadalla, llamacunata michijtapash, ñucapaj ali cumbatapash fiñashpa llaquichingapaj jatariyari. Chai michijta can chugrichijpica, llamacunaca caita chaitami rinajunga. Huahua llamacunataca, ñuca maquihuanmi llaquichisha” ninmi. 8Mandaj Diosca, cashnatapashmi nin: “Cai tucui llactapica, cashnami tucunga: Quimsapi shicanyachishcamandaca, ishcaipi shicanyachishca shuj ashallami, chaipillata huañushpa chinganajunga. Ashtahuangarin quimsapi shicanyachishca shuj ashallami puchunga. 9Chai quimsapi shicanyachishca shuj asha puchushcataca, ninapimi churasha. Culquita yacuyachinshnami yacuyachisha. Ali oro cajta ricunshnami ricusha. Shina rurajpimi paicunaca, ñuca shutipi mañanajunga. Paicuna mañanajujtaca uyashami. Shina uyashpami, paicunataca: ‘Ñuca agllashcacunami canguichi’ nisha. Paicunapash: ‘Mandaj Diosca, ñucanchi Taita Diosmi’ ninajungami” nijurcami.
Currently Selected:
ZACARÍAS 13: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.