OSEAS 8
8
Yanga dioscunata israelcuna mañanajujpimi, jarcashpa rimashca
1Mandaj Diospaj huasita, jatun angashna llaquichingapaj shamunajujtaca, trompetata huacachishpa villayari. Ñucahuan ari ninajushcata saquishpami, ñuca mandashcataca na cazunajurca. 2Israelcunaca, ñucatami: ‘Ñucanchi Taita Dioslla, candaca rijsipanchimari’ nishpa mañanajunga. 3Israelcunaca, alita ruranataca saquircami. Paicunataca, fiñajcunami catiriashpa llaquichinajunga.
4Paicunaca, napash ñuca agllashca jatun mandajcunatami churanajurca. Shuj mandajcunata churanajushcatapash, ñucaca na yachashcanichu. Paicunapaj culquita, orota japishpami paicunapaj yanga dioscunata ruranajurca. Paicunallata tucuchi tucungapajmi, chashna ruranajurca. 5Samaria pueblopi causajcunalla, cangunapaj shicu diosmari, cangunataca ñucamanda anchuchirca. Chaimandami chai pueblopi causajcunahuanga, nina japirinshna fiñarircani. Paicunapaj juchataca, na anchuchi ushanallachu carca. 6Cai shicu diostapash, israelcunallatami rurarca. Caitaca, chashna ruranata yachaj runa rurashcallami, chaica na Taita Dioschu. Shina cashcamandami, Samaria pueblopi tiajuj shicu diosca, ñutui tucunga. 7Paicunaca, huairatalla tarpushcamandami, acapanata cozechanga. Ima granota cozechanapash, na tiangachu. Trigo viñashpapash, na jacu tucungachu. Jacu tucujpipash, na rijsishcacunami micunajunga. 8Israelcunaca, langajpishnami tucuchi tucunga. Ñallami shuj llacta puracunapica, na munanayai mangashna tucunga. 9Israelcunaca, paicunallatami Asiria llactaman rinajurca. Sacha burroshnami, paicunallata rinajurca. Efraín ailluca, paicunata juyajcunataca culquipajmi alquilarca. 10Llacta puracuna ashtaca culquipaj alquilachishpa apashca cajpipash, cunanga ñucami tandachisha. Jatun mandajpash, cati mandajcunapash llaquichijpica, asha huatacunatallami llashachinshna llaquita apanajunga.
11Efraín aillu juchata rurangapaca, tauca altarcunatami rurarca. Chai altarcunataca, juchata rurangapajllami charirca. 12Ñucaca, juyailla mandashcacunatami escribichircani. Chaitaca, na rijsishcatashnami charirca. 13Ñucaman cushpa huañuchina animalcunata, huañuchishca aichatapash paicunallatami micunajurca. Shina rurachunga Mandaj Dios ñucaca, na munarcanichu. Cunanga, chashna nalita rurashcacunata yarishpami, paicunapaj juchamanda llaquichigrini. Paicunaca, Egiptomanmi tigranga. 14Israelcunaca, paicunata Ruraj Diostaca cungashpami, shuj dioscunapaj huasicunatara ruranajurca. Judá llactapi causajcunaca, muyundi jatun pircahuan pueblocunatami mirachinajurca. Ashtahuangarin chai pueblocunapica, ninata ñuca japichijpimi, mandana huasicunatapash, tucuillata rupachishpa tucuchinga” nircami.
Currently Selected:
OSEAS 8: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.