HAGEO 1
1
Diospaj huasita shayachinajuchunmi aliguta yarichishca
1Jatun mandaj Darío shuti runaca, ñami ishcai huatata mandajurca. Chai huatapaj sucta quilla punda punllapimi Mandaj Diosca, pai ima nishcata villaj Hageo shuti runaman, Salatiel shuti runapaj churi, Judá llactata mandaj Zorobabel shuti runaman, Josadac shuti runapaj churi, curacunata mandaj Josué shuti runaman, cai shimicunata cashna nishpa villarca:
2Tucuita Mandaj Diosca, cashna nishpami rimarca: “Cai gentecunaca, cashnami ninajun: ‘Chai punllacunaca, nara chayamunllu. Mandaj Diospaj huasita cutin huasichina punllacunaca, nara chayamunllu’ ninajunmi” nishpami rimarca. 3Chaimandami Mandaj Diosca, pai ima nishcata villaj Hageo runataca, cai shimicunata cashna villachun mandarca: 4“¿Ñuca huasica, jichushca sirijujpitachu cangunapaca, juyailla labrashpa rurashca huasicunapi causana punllacuna chayamushca?” ninmi. 5Tucuita Mandaj Diosca, cashnatapashmi nin: “Canguna imashna causanajushcatara, aliguta yarichi. 6Cangunaca, ashtacata tarpushpapash, ashatallami japinguichi. Micushpapash, na vijsa pactashpallatami causanguichi. Yacuta ufiashpapash, yacunaihuanllatami causanguichi. Chirijpi churajunacunata churajushpapash, napacha cunujyashpami causana canguichi. Shujpi shujpi trabajaj runa culquita japishpaca, utuju muchilapimi japin” ninmi. 7Tucuita Mandaj Diosca, cashnatapashmi nin: “Canguna imashna causanajushcatara, aliguta yarichi. 8Urcuman vichai rishpa caspicunata apamushpami, ñuca huasita cutin shayachina canguichi. Chai huasita rurashcamandami, ninanda cushijusha. Ninanda alicachi tucushcapashmi casha” ninmi Mandaj Diosca. 9Tucuita Mandaj Diosca, cashnatapashmi nin: “Ninanda charingapaj mascashpapash, ashatallami taringuichi. Cangunapaj huasicunapi alichishcatapash, fucushpallami tucuillata chingachisha. ‘¿Imamandashi chashna rurasha?’ Ñuca huasica, shitashca sirijujpipash, cangunapaj huasicunatara alichingapaj calpanajushcamandami, chashna rurasha. 10Chaimandami, jahua pachamanda cangunapaj jahuapi tamiamunapash jarcarirca. Alpacunapipash, ima granopash na fucurcachu. 11Ñucami, cai llactapaj, urcucunapaj, trigopaj, vinopaj, aceitepaj, alpapi tucui imalla viñashcacunapaj, gentecunapaj, animalcunapaj, gentecunapaj maquihuan imatalla rurashcacunapaj jahuapi chaquishca punllacuna shamuchun cayarcani” ninmi.
12Paicunata Mandaj Taita Dios chashna villachun cachamushcataca, Salatiel shuti runapaj churi Zorobabel shuti runapash, Josadac shuti runapaj churi, curacunata mandaj Josuepash, tucui caishuj gentecunapashmi uyanajurca. Paicunata Mandaj Taita profeta Hageo shuti runagu chashna villajujta uyashpami, Mandaj Diospaj ñaupajpica, ninanda manllarinajurca. 13Shina manllarinajujpimi, Mandaj Dios cachamushca Hageo shuti runaguca, Mandaj Diosllata cachamujpi: “Mandaj Diosca: ‘Cangunahuanmi cani’ ninmi” nishpa, gentecunaman villajurca.
14Mandaj Diosca chashna villachishpami, Salatiel shuti runapaj churi, Judá llactata mandaj Zorobabel shuti runapaj yuyaitapash, Josadac runapaj churi, curacunata mandaj Josuepaj yuyaitapash, tucui caishuj gentecunapaj yuyaicunatapash pascarca. Chaimandami tucuita Mandaj, paicunapaj Taita Diospaj huasitaca, alichingapaj shamunajurca. 15Jatun mandaj Darío shuti runaca, ñami ishcai huatata mandajurca. Chai huatapaj sucta quilla, ishcai chunga chuscu punllapimi, alichi callarinajurca.
Currently Selected:
HAGEO 1: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.