Zẹkaraya 6
6
Ịmiin dị egbolomaam inya arughuugh-ude
1Mị ụḅile ni aphogh. Egi phọ ẹphen mị ụmiin inya arughuugh-ude dị ẹḍua remite ịbaay ịyal aroogbolom dị oḍighinom enaba. 2#Ogon 6.4; Ogon 6.5Ọḅel oghuugh-ude phọ ịtogh-tọgh ạrusu kụ iḍur ghan, omuneniom ịyal phọ iḍiil kụ iḍur ghan, 3#Ogon 6.2ịphalaḅaal ạrusu eḍur ghan omuneniom ịraar phọ, kụ ịdi ẹpoghogha kụ iḍur ghan omuneniom inya phọ. 4Kụ mị apuru ọokpaany phọ mọ, “Oye phọ, ẹmhu arughuugh-ude phọ ịphen eeghe?”
5 #
Ogon 7.1
Kụ ọdi ạphagharanaan mọ, “Ịphen phọ, pọ inya ọdo ookuugh; pụruku bịdi ọḍua ni egbodo Ọmoogh-we oomo ade phọ kụ oru.”
6Oghuugh-ude phọ ọpo iḍiil ạrusu phọ kụ eḍur ghan bọ anyeene ẹpe ephunom mọ rạki Bạbilonia; ịphalaḅaal ạrusu phọ inyeene ẹpe erumuḍio phọ remeel ghan bọ, kụ ịpe epoghogho bọ inyeene eelhe ẹpe esoorom mọ. 7Ịdipho ịpe ẹpoghogha bọ eru bọ emite, bịdi ịkururu bịn ọghi ophogh oḅiligha ade phọ. Kụ ọokpaany phọ ạḅem mọ, “Ịki ephogh ịlo ade phọ edi”, kụ bịdi ọghi. 8Kụ ọokpaany phọ ạlho ụḅeni ịmi mọ, “Ạrusu phọ ịpe ẹdaph bọ ẹpe ephunom mọ ẹghi ẹpe Bạbilonia mẹphoomi ọghagh ologhi Ọmoogh-we phọ.”
Ịto dị ọngo mọ ozu eghoony Josua
9Ọmoogh-we phọ ụngo ni ịmi dom mọ aḍien. 10Ọdi ạḅem mọ, “Sịghe ruunmo phọ aHeldai, Tobaya rꞌaJedaya bụphe ọrol bọ dọl iiruen ọngooghi bọ kụ ạghi mem mem mọ ẹpe otu phọ aJosaya ọony ạZefanaya. Oomo awe phọ ạbuen phọ ụrol ẹpe Bạbilonia dọl iiruen phọ kụ morigheel. 11Sịghe silva rꞌagol phọ bịdi ọpham bọ origheel ạlemom eghoony, kụ ạsighe eghoony phọ azu ẹmhu ogbogh oyil ạrikia phọ Josua ọony phọ ạJehozadak. 12#Jer 23.5; 33.15; Zẹk 3.8Ḅẹni nyọdi mọ Ọmoogh-we Oomo Ịikpo ạḅem mọ, ‘Oye phọ ọpo oghol bọ mọ Ọla Phọ kamite ni ạbugh sịphe ọdi odi bọ kụ ạḅile ạlogh Otu Ịiḅereghi Ọmoogh-we phọ. 13Ọdi kụ oye phọ kạlogh bọ otu phọ kụ ọdi ạmoogh rughuenian phọ ịpe rọngo ghan bọ ọdaam eelhe phọ, kụ ọdi kạda ni weye phọ ọdi. Oyil ạrikia kạmeera ni ọogaany ạgada ọdaam eelhe phọ ọdi, kụ bịdi ọḅophoghan oḍighi ghan oḍighi rꞌẹepho rꞌẹereegh.’ 14Eghoony ọdaam eelhe phọ kẹtol ghan sịphe Otu Ịiḅereghi Ọmoogh-we phọ kụ ọsighe ọotughianam ghan Heldai, Tobaya, Jedaya ḅịle rꞌaJosaya.”
15Awe dị orugh rikpisi dị ẹkel kotu ni kụ ọloghonaan ḍịghaagh ọḅile ọlogh Otu Ịiḅereghi Ọmoogh-we phọ. Kụ mem dị mọlhogh ọmadan, nyina kelegheri ni mọ Ọmoogh-we Oomo Ịikpo kụ urom ịmi oru ọteeny anyina. Oomo phọ ịphen phọ kemite ni eḍighi ịyaar lọ nyina ẹkaraghi ẹnaghanan ịtooghi Ọmoogh-we Ẹnaan phọ anyina.
Currently Selected:
Zẹkaraya 6: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS