Zẹkaraya 5
5
Ịmiin dị egbolomaam ḍịnya dị rẹpeeph
1Mị ụḅile ni aphogh, kụ egi phọ ẹphen mị ụmiin ni ḍịnya dị ẹpheeph reten rꞌookuugh phọ. 2Ọokpaany phọ upuru ịmi ịyaar phọ ẹpe mị ạmiin bọ. Kụ mị ạphagharanaan mọ, “Ḍịnya dị ẹpheeph reten rꞌookuugh phọ; ạḍidoony ạḍinya phọ ẹman esugha akuḅu, ḅịle kẹn ạreghe phọ ẹman inya rꞌoolemi-odi akuḅu.”
3Kụ ọdi agbi ọḅeni ạmi mọ, “Sịphe ạḍinya phọ ọge itonyonaan phọ kẹki bọ oleeny oomo ade phọ. Oniin ọman ạḍinya phọ ẹḅem mọ koporogh ni tọrotoro ọḅa sịen ade phọ, ọphori phọ ọman ạḍinya phọ ẹḅem mọ tọrotoro oye lọ rạgba ghan ọkpe mem dị maghunya ni, pọ koporogh kẹn ni. 4Ọmoogh-we Oomo Ịikpo phọ ạḅem mọ ọno kanyu ni itonyonaan phọ ịphen phọ amitiom kụ ẹki eḍigh otu ạtorotoro ọḅa rꞌotu ạtorotoro oye lọ rạgba ghan ọkpe mem dị maghunya ni. Itonyonaan phọ kẹtol li sịphe aruutu phọ ạbidi tụtu aruutu phọ eegulaan.”
Ịmiin dị egbolomaam ạnir dị odi ologhi egunum
5Ọokpaany phọ ạḅile kẹn ni amite kụ ạḅem mọ, “Pogh! Ẹnon ịyaar retu ni.”
6Kụ mị apuru mọ, “Eeghia kụ retu?”
Kụ ọdi ạphagharanaan mọ, “Eḍighi egunum, kụ egunum mọ, pọ ịkaraph oomo ade phọ.”
7Egunum mọ ịmoogh ni ekpereghi dị oḍighinom lẹezu. Ịduon phọ mị odi bọ ni rapogh bịn ophoophe ekpereghi phọ, kụ ẹpe ologhi phọ oniin ạnir ạtol ude!
8Kụ ọokpaany phọ ạḅem mọ, “Ạnir phọ ọphon ạmeera enye ẹkaraph eḍighinom ịyaar.” Kụ ọdi anyu ạnir phọ ạlogh ẹpe ologhi egunum mọ bịn akpereghi. 9Mị uphogh ni ạnyu kụ mị ạmiin ịyal ạnmariir dị ọpheeph rotu ẹphen mị odi bọ rꞌaraphaaph dị ẹmoogh ịikpo ịdipho araphaaph ọgbaghaghaany. Bịdi ọsighe egunum mọ bịn ọpheephom ọḍua.
10Kụ mị apuru ọokpaany phọ mọ, “Bịdi ọsighe egunum mọ rokeelom ẹghen?”
11Kụ ọdi ạphagharanaan mọ, “Ọsighe rọki ẹpe Bạbilonia. Ẹpe kụ ẹdi kọloghonaan otu. Mem dị ọlogh otu phọ ọmadan, kọsighe egunum mọ ọlogh sịphe kụ ọoḅereghi ghan.”
Currently Selected:
Zẹkaraya 5: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS