Ạsuor 25
25
Ịiḅereghi ịlo oḍiemiom rꞌoghoph
1Ọmoogh-we, nạ kụ ọdi mị rạaḅereghi.
2Mị aḍuom nyịna Ẹnaan phọ ạmi ologhi.
Ụphel ịmi ạsighe esi umugholoor apum.
Kámeera ạbumulogh-ḍien phọ ạmi oboh.
3Erugh répum ghan bụphe oḍuom bọ nyịna ologhi;
kụ ọlo apum rạtolonaan ghan bụphe nyịna úlegheri bọ.
4Ọmoogh-we, ụtughemi ịmi reten phọ ạna,
aḍighi ịdi mị kalegheri.
5Ụtughemi ịmi ọrolan igey phọ ạna,
ịdi eḍighi bọ nạ kụ Ẹnaan phọ ạmi rịphel ghan bọ ịmi.
Mị aḍuom ghan nyịna ologhi oomo amem.
6Ọmoogh-we, tụutughian ọnma ighirigiir rꞌẹphomoghian phọ ạna rémuneen ghan bọ,
ẹpe nạ ụphomoghian bọ ịmi kꞌaḍiodiidi.
7Ọmoogh-we, sạr ịkaraph rꞌọpioman ẹghoroghor phọ ạmi ụwilenaan ịmi;
loor iiḅi rꞌẹphomoghian phọ ạna rémuneen ghan bọ, Sey Ọmoogh-we.
8Loor esi dị Ọmoogh-we phọ aseleman bọ kụ ạnighe,
ọdi rạtughemi ghan buḍighinom ịkaraph eten dị bịdi kọdaph.
9Ọdi raḍiemiom ghan bụphe osooromi bọ loor igeny areten,
ạḅile rạtughemi ghan bịdi reten phọ ọdi.
10Oomo areten phọ ọdi ẹphomoghian rꞌọgba ghan igeny
kụ ẹdi ọdi odimom esi ạbuphe rooko ghan bọ ịyo rꞌiilogh phọ ọdi.
11Ọmoogh-we, pạmanam ni oguan phọ ạna kụ ạsar ịkaraph ạmi ụwilenaan,
ịdi eḍighi bọ ịkaraph phọ ạmi ẹpughan.
12Bụphe rọnaghanam bọ Ọmoogh-we phọ
kọtuugha ni esi ọdi reten dị bịdi kọdaph ghan.
13Edughom kẹtolonaan ni bịdi oomo amem,
ḅịle ạnmuny ạbidi kụ kọmoogh de phọ.
14Ọmoogh-we phọ ọyaghiri ạbuphe rọnaghanam bọ nyọdi,
ḅịle ọdi kạkparami ni ịyo phọ ọdi rꞌạbidi.
15Mị rapogh ghan Ọmoogh-we phọ oomo amem ịlo ọloghonaan ạmi ḍịghaagh,
kụ ọdi kụtophoron ni ịmi ạsighe esi ịiḅaghami.
16Ọmoogh-we, kiton usoman ạḅile ụnma ịmi ighirigiir
ịdi eḍighi bọ mị ogini, ịnyaam ịmi ílho.
17Ụutoghion ịmi ạsighe esi oomo ịpe rịiḅaghami bọ ịmi,
ạḅile ụphel ịmi ạsighe esi ịiḅaghami.
18Tụutughian mukum ologhi phọ ạmi rꞌịminimiin phọ ạmi
kụ ạsar oomo ịkaraph phọ ạmi ụwilenaan ịmi.
19Mịin ḍita ạmulogh-ḍien dị mị ạmoogh,
ịdi bịdi ụlhogh bọ ịmi ḍien.
20Uuko ịmi ụphel ịmi,
ạsighe esi apum.
Mị aḍigh ḍibuo ạna.
21Oseleman rꞌọmaar ạdol phọ ạmi iiko ghan ịmi,
ịdi eḍighi bọ mị aḍuom nyịna ologhi.
22Esi oomo ịiḅaghami phọ ạbidi, Ẹnaan,
pẹl Ịzirel we phọ ạna.
Currently Selected:
Ạsuor 25: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS