Matiu 5
5
Ịdi ạJizos ạrol ạnyu ẹeḅaraph ạtughemi
1Kụ ạJizos rọmiin bọ ḍita awe phọ, kụ ạghi ạsiiny ạnyu ẹeḅaraph, ạrol ude. Kụ ạbumatuan phọ ọdi oru ọteeny nyọdi, 2kụ ọdi ạtughemi bịdi mọ:
Igey iboh
(Luk 6.20-23)
3“Iboh kꞌẸnaan edianaan ni bụphe ologhoma bọ mọ ẹkparam ni ruwaloor phọ ạbuno;
ọmar phọ kꞌẸnaan ọlo ạbidi ni.
4 #
Azay 61.2
Iboh kꞌẸnaan edianaan ni bụphe odi bọ ọto;
Ẹnaan kẹedereghi ni bịdi.
5 #
Ạsuo 37.11
Iboh kꞌẸnaan edianaan ni bụo osooromi aloor phọ;
bịdi kọmoogh ni ịpe Ẹnaan eguanaan bọ,
6 #
Azay 55.1, 2 Iboh kꞌẸnaan edianaan ni bụphe rẹpu bọ oḍighi ịpe Ẹnaan rẹwa bọ oomo amem;
Ẹnaan kemuzeḍinaan ẹgbaanyemi ni bịdi.
7Iboh kꞌẸnaan edianaan ni bụphe rọnma ghan bọ ighirigiir phọ;
Ẹnaan kẹnma ni bịdi ighirigiir.
8 #
Ạsuo 24.3, 4 Iboh kꞌẸnaan edianaan ni we dị iloghi phọ ẹserere;
bịdi kọmiin ni Ẹnaan.
9Iboh kꞌẸnaan edianaan ni bụphe rọḅem ghan bọ mọ kísoor phọ;
Ẹnaan kekol li bịdi mọ ạnmuny ọno.
10 #
1 Pit 3.14
Iboh kꞌẸnaan edianaan ni we dị ọtuan oḍighi ghan
ịpe Ẹnaan rẹwa bọ kụ rọmiinom;
ọmar phọ kꞌẸnaan ọlo ạbidi ni.
11 #
1 Pit 4.14
“Iboh kꞌẸnaan idianaan inyina mem dị awe ụtuan ịmi kụ rịgilaam inyina, ḅịle kẹn rịgbiphoghom inyina, kụ rịgbaanaan inyina oomo ịkaraph ạsiagba. 12#2 Krọ 36.16; Iiḍ 7.52Iboh ni, ẹmoogh ọḅaal ologhi loor esi aruunmo phọ kiinmo bọ inyina ẹpe kꞌạke. Ịdipho kụ ịdi ọgbiphoghom bọ ni riil phọ ạbuphe ọrol bọ kụ egbi bọ ọteeny amem mọ anyina.”
Aboph rꞌạḍiḅaal
(Mạk 9.50; Luk 14.34-35)
13 #
Mạk 9.50; Luk 14.34, 35 “Nyina kụ aboph awe ịsien aḅirini phọ, kụ eḍighi ịyaar dị eroph aboph phọ mephe, kọḅile otophomiom eeghe? Ọ́moogh mun mạar oḍighinom, emuton dị kozu bịn awe ọozeghiom ruwol.
14 #
Jọn 8.12; 9.5 “Nyina kụ ạḍiḅaal awe ịsien aḅirini phọ. Ẹmha dị ọlogh ạnyu eegbolom rẹ́booghian ghan. 15#Mạk 4.21; Luk 8.16; 11.33Oye ólho dị kạsu ọtozi, kụ akpereghiom igbe. Kạḅam ghan ghụn ạnyu, pịdi asoor aleeny oomo otu phọ. 16#1 Pit 2.12Ạḍiḅaal phọ anyina ẹtuugh ịdipho phọ ẹmhu aani ghisigh awe, pịdi bịdi ọmiin iiḅi iiḍighi phọ anyina kụ oboom Ọde phọ anyina odi bọ kꞌạke phọ!”
Ịtughemi ịlo iilogh phọ aMozis
17“Kégbiom ghan mọ mị uru ophiemi iilogh phọ aMozis rꞌịtughemi ariil phọ Ẹnaan. Mị útu ophiemi, mị uru omuneni. 18#Luk 16.17Mị ạkar rịḅeni ghan inyina mọ, tụtu ạke phọ rꞌade phọ eten, rꞌeniin ekpo ịpe ọge bọ sịphe iilogh phọ képe, tụtu ẹteeny eekuna oomo ạraraar. 19Loor ịduon phọ, tọrobo oye lọ ạka ghạlamo rꞌoniin ọbam sịen iilogh phọ ịphen kụ ạtughemi we ọkaaghi aani iilogh phọ, pọ ọdi maḍighi ọbam ẹpe ọmar phọ kꞌẸnaan. Kụ tọrobo oye lọ aako iilogh phọ ịphen kụ ạtughemi we ịlo ooko aani iilogh phọ, pọ ọdi maḍighi ogbogh ẹpe ọmar phọ kꞌẸnaan. 20Mị rịḅeni inyina mọ nyina kéḍigh ọmar phọ kꞌẸnaan, omuton dị eḍighinom ịyaar phọ anyina ẹnighe epu ẹlo ạbutughemia iilogh phọ rꞌaFarisi phọ.”
Ịtughemi ịlo ọghagh ologhi
21 #
Ẹḍua 20.13; Dut 5.17 “Nyina mẹnaghan ghan ni mọ ḍiodiidi ụḅeni ni bụrude phọ anyina mọ enu kụ́ko, kụ mọ oye lọ ạko enu kọmagh ni nyọdi esi ạsiagba. 22Kụ mị rịḅeni ghan inyina mọ tọrobo oye lọ ạghagham umor ọdi ologhi, dị mạar ụ́piom, kọmagh ni nyọdi esi ạsiagba, kụ mọ oye lọ aḅom ẹmhu kụ ạḅeni umor ọdi mọ ‘Nạ ọga’ kọsighe nyọdi ọkimom otu ạsiagba ghisigh ikpolom awe phọ, kụ mọ oye lọ aphogh umor ọdi kụ ạḅitonaan mọ ọphon maphe, pọ ọdi ranyeene ni osuma ooni ạnian. 23Loor ịduon phọ, eru dị nạ ạghi pạ otu Ẹnaan phọ ọngo inmo kụ nạ ạatughian mọ umor ạna rꞌạna ẹmoogh ḍịaḅa, 24bịle inmo phọ ạna sịphe esomanan enmeny ẹkia phọ agheel ẹphomoghian, kụ agbi oḅula ọngo inmo phọ ạna.
25“Eru mạar dị oye rạwa osoorom ạna erugh, pọ nụun ạghi ẹgba ẹphomoghian, ọbo osi sịagba phọ oogboom ịiruen phọ kasoph ghan bọ mọ ọsighe nyịna ọghi ọlogh ikoli. Mị ạkar rạḅeni nyịna mọ ịpa kụ ẹdi nạ kạtol. 26Nyịna rómitiom, tụtu nạ ạkpeeghi oomo phọ ịpe osophonaan bọ nyịna ḅeer ạmadan.”
Ịtughemi ịlo olhe ẹmha
27 #
Ẹḍua 20.14; Dut 5.18 “Nyina mẹnaghan ghan ni mọ ḍiodiidi ụḅeni ni we mọ ẹmha kúle. 28Kụ mị rịḅeni ghan inyina mọ tọrobo oye lọ aphogh ạnir-ephoph kụ ạruuphua olhe ẹmha ẹphu, pọ malhiom ni ạnir phọ ọpo phọ ẹmha sịphe ologhi phọ ọdi. 29#Mat 18.9; Mạk 9.47Loor ịphen phọ, mụghumo ekpeḍien elhiom ạna kụ rẹphue nyịna, pọ pọghoronaan aroph. Kẹnighe epu dị aloor phọ ạna ímunughan kụ nạ agheel kꞌạke, kpạripe rꞌomunughan kụ osumeeny nyịna ooni ạnian. 30#Mat 18.8; Mạk 9.43Mọ ạḍighaagh elhiom ạna kụ rẹphue nyịna, pọ soph aroph. Kẹnighe epu dị aloor phọ ạna ímunughan kụ nạ agheel kꞌạke, kpạripe rꞌomunughan ạraghaagh kụ osumeeny nyịna ooni ạnian.”
Ịtughemi ịlo oseere ạnir
(Matiu 19.9; Mạk 10.11-12; Luk 16.18)
31 #
Dut 24.1-4; Mat 19.7; Mạk 10.4 “Ụḅem ghan kẹn ni mọ oye lọ aseere ạnir ọdi, mọ ạngo ghan ḍịnya ọgbaranaan. 32#Mat 19.9; Mạk 10.11, 12; Luk 16.18; 1 Kọr 7.10, 11Kụ mị rịḅeni ghan inyina mọ oye lọ aseere ạnir ọdi, dị ụ́tuan mọ ale ẹmha, kụ ạnir phọ ạḅile ạghi ạal ịnon ilom, pọ olhom mọ maḍighi dị ạnir phọ malhe ẹmha. Kụ oye lọ aphin ạnir lọ oseere pọ ale aani kẹn ni ẹmha.”
Ịtughemi ịlo iikunya
33 #
Lịv 19.12;
Igb 30.2; Dut 23.21 “Nyina mẹnaghan ghan kẹn ni mọ gediidi ụḅeni ni bụrude phọ anyina mọ kékunya iikunya dị nyina íiko. Ịtuugh ịpe nyina meghunya bọ ẹngo Ọmoogh-we phọ eeko. 34#Jems 5.12; Azay 66.1; Mat 23.22Kụ mị rịḅeni ghan inyina mọ kékunya ghan mun mem lọ nyina reguan oguan; kékunya kẹ, ịdi eḍighi bọ ạgada ọdaam eelhe Ẹnaan; 35#Azay 66.1; Ạsuo 48.2Kékunya kẹn de, ịdi eḍighi bọ ịkasi ọkpasaghiom aruwol Ẹnaan; kékunya kẹn Jeruselem, ịdi eḍighi bọ ẹmha Ẹnaan ogbogh Ọdaam ẹmha phọ. 36Kékunya kẹn rụmhu anyina, ịdi eḍighi bọ nyina kétue eḍighi dị aḍiniin ạḍilaal rụmhu anyina kebiil, ḅịle mꞌọḅaal. 37Kụ ọghaaph anyina aḍighi ghan mọ ii, pọ ii, eeye, pọ eeye! Tọrobo ịyaar lọ epel ịphen, pọ ịḍua esi Eru kụ emite.”
Ịtughemi ịlo oḅulemian ịkaraph
(Luk 6.29-30)
38 #
Ẹḍua 21.24; Lịv 24.20; Dut 19.21 “Nyina mẹnaghan ghan ni mọ gediidi ụḅeni ni we mọ ọkpiom ghan ekpeḍien rꞌekpeḍien, ọkpiom ghan ọlaay rꞌọlaay. 39Kụ mị rịḅeni inyina mọ kéḅulemian ghan ịkaraph oye, kụ oye lọ aḅor okpo elhiom ạna, pọ ngọ nyọdi nyọpo ekeeny phọ ọdi ạḅile aḅor. 40Eḍighi ịyaar dị oye agbo nyịna ogbo ịlo ọsighe ạsuoma ạna, ḅạram koti phọ ạna ạngoom nyọdi. 41Oye lọ ạkpaariom nyịna oroolaan adool ọdi oniin otobi, pọ toolaan nyọdi ịyal itobi. 42Oye aru kụ ạlom nyịna ịyaar, pọ ngạani ni nyọdi. Oye lọ aru kꞌạna ạboole, pọ bọole ni nyọdi.”
Ịpomoghian bụmulogh-ḍien phọ anyina
(Luk 6.27-28, 32-36)
43“Nyina mẹnaghan ghan ni mọ gediidi ụḅeni ni we mọ ịpomoghian rịghiri anyina ẹlogh ḍien bụmulogh-ḍien anyina. 44Kụ mị rịḅeni ghan inyina mọ ịpomoghian bụmulogh-ḍien anyina, kụ ẹeḅereghi ghan ẹngo bụphe rịgbiphoghom bọ inyina, 45ọbo nyina eru nmụny Ọde phọ anyina odi bọ kꞌạke phọ. Ọdi aḍighi ni dị ogogo phọ ọdi ạmu rasoorom ghan bugey rꞌạbukaraph, ḅịle ọlophia phọ rạlophom ghan bugey rꞌạbukaraph. 46Nyina ẹphomoghian ghan bụlo ịphomoghian inyina bịn, eeghe aruunmo kụ ẹdi Ẹnaan kiinmo bọ inyina? Rꞌạbubonyiom iisogh phọ bịn roḍighi ghan ni ịphen phọ. 47Eru mạar dị ạrighiri phọ anyina rꞌanyina bịn kụ rẹemaghaghan ghan, eeghe kụ ẹdi nyina eḍighi bọ epeeliom bụeri phọ? Rꞌạbuo aruru phọ bịn roḍighi ghan ni ịphen phọ. 48#Lịv 19.2; Dut 18.13Iseleman, ịdipho Ọde phọ anyina odi bọ kꞌạke phọ aseleman bọ.”
Currently Selected:
Matiu 5: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS