MATIU 11
11
Ga Jon Bɛnjɛ-bu-ubaptizim Tumwanɛ Eseshi-iyi Ubwa Utumwa Pi Jisus
(Luk 7:18-35)
1Aka na ti ge Jisus peni eseshi-iyi ubwa umpwa-na-ba-eyebi unu, bee beni apata bee hwuri maa bu no mbisogono atwa iyi keeni maa bu na ananga na ashɛpwụ aba.#11:1 na ashɛpwụ aba: Gobwonu du tɛjɛshɛrɛga tu ko ti hiɛŋ, inɛ gɛ eri ya sha ashɛpwụ Galili a na eseshi-iyi Jisus banɛ.
2Tu ga Jon namɛ nu umwono-tishi, baa hwụjɛ iwɛ ugondu na ga Krast ba ndangana. Baa tumwanɛ eseshi-iyi ubwa utumwa, maa ɛ hiɛŋ bụ, 3Ga Jon hiɛŋ, Gabụ suu bɛ shɛ bụtụ ata be ci, okwo ta shɛlana binya bụtụ?
4Ge Jisus jishijɛ aŋ, bɛɛ hiɛŋ, Zhaga mbiso ma Jon iyi nɛ ahiɛ hwụjɛ keeni iyi nɛ ahiɛ kwụbɛ: 5sholubo sho ushogwu shishe, atwa na ivwunɛ ya aba ge 'wegeni a zha tahaŋnụ, aa nɛnga atwa na a gwumanga ụngwụ-uwaŋna aa nama shɛshɛshɛ, atwa na ga kwụrụmɛ a hwuga iwɛ, aa hicanjɛ atwa na ge 'wi, aa ananga na okofwo Anabarɛ Ebiye.#Ayiz 35:5,6; 61:1; Luk 4:18,19 6Bụtụ na iyi njɛ shɛ ukwurishi iwɛ mi gwoje.
7Aka na te eseshi-iyi Jon zhɛ ugwulwo, ge Jisus kwuni ufwugwo wa atwa ata iwɛ Jon timbiso, bɛɛ hiɛŋ aŋ, Imbe po ehi beni ehi zhe la nụ ụshɛkaa? Maa hi kwubɛ suu eninjidegbe na mpiala mo zhingoto. 8Asha imbe ehi beni maa hi kwubɛ laa? Bụtụ na urigeni tugwuno tu na tu namɛ sunɛ sunɛ suu? Hioko ma, atwa na o urugono tugwuno tu tusunɛ sunɛ a namba nu nhwaŋ mɛ shɛgwuma! 9Ama imbe kwuŋ ehi beni ehi zhe la maa hi kwubɛɛ? Bigesere suu? Iiŋ, Mo hi mbiso, bụtụ ata hwuri bigesere.#Mat 14:5; 21:26; Luk 1:76 10Bụtụ ata ubwa ee 'nyeci iwɛ ubwa, ɛɛ hiɛŋ, Hioko ma, N zhɛ ma tumwana butumwa mi nu umbe bu, ubwa zhɛ ma bụ imangana uhwaŋna.#Mala 3:1; Mak 1:2 11Iwɛ-tɛkana Omo hi mbiso, maa i zasa bụtụ na namwawaŋ na ashashɛ atwa na eyikwo meci, uhwulwo Jon Bɛnjɛ-bu-ubaptizim o, ama bụtụ na namɛ na Cɛnjɛ-ta-tugwama ta azuba, okwo baa 'nyanɛ, asha bu hwuri bu. 12Te kwuni na aka i'enenji Jon, Bɛnjɛ-bu-ubaptizim, uuwa i ci aka ga, Cɛnjɛ-ta-tugwama ta azuba ta nda ụbaụta na atwa abwagara, a na a kapangana tụ maa a 'imɛ tụ ni iji.#Luk 16:16 13Atakada egesere kpaaŋ keeni Undwa Moses, a dumwa la tigesere iwɛ Jon. 14Yaa shɛ kaa yaa hiɛ kwụlanɛ maa hi leni iwɛ gɛ, asha ubwa shɛ ge Elaija ata, na shɛ ba zhajɛ.#Mala 4:4; Mat 17:10-13; Mak 9:11-13; Luk 1:17; Jon 1:21 15Bụtụ na 'yajɛ acɛbɛ, ga bu na hwuga! #Mat 13:9,43; Mak 4:23; N-ndu 13:9; 2:7
16Bɛɛ hiɛŋ, Ni imbe Ngɛɛ zhɛ ma manga atwa uwaŋnɛ ga, maa a sụbɛɛ? A shɛ gana miaụŋ mu na mɛ jɛjɛ nu ugba udukwo, a na mama suyaganụ, 17ɛɛ hiɛŋ, Ti hi hwulegeni akpasana, hiɛ hiɛbɛ shɛ kaa tɛhiɛba o! Atɛ hiɛ zunganganɛ azunga tiriri, hiɛ cwɛ shɛ kaa u'wo. 18Ga Jon zhajɛ la, bɛ yɛ shɛ iyimɛyɛ, bu swe shi meni o, atwa hiɛŋ, Butumwa-bi-ibiri namɛ na amɛ ubwa. 19Yɛu bụtụ zhajɛ ya, baa ya, baa swa, aa hiaaŋnanɛ, Hioko ma, bụtụ na 'yajɛ tidederishe ti iyimɛyɛ, keeni buswe bu meni mụ tụ'walụ ta afwafwa, biyejilo be-ele-ụdalụ keeni bu na ba atwa-iwɛwɛ. E menji ugondu na ti'inta ta nda kpaaŋ, aa kwụbɛ maa u teni cɛŋ.
Ge Jisus Mbiseji Ashɛpwụ na Leni shi Utumwa Ubwa N-ndumwa
(Luk 10:13-15)
20Nazhɛ ge Jisus mbiseji ashɛpwụ na baa njɛ ugondu wa arụhwajɛ na aba n-ndumwa, iwɛnɛ ta a jɛshɛrɛjɛ shɛ shɛhaŋsa sha aba, bɛɛ hiɛŋ:
21Ahiɛba atwa Korozin, hi zhɛ hia nda hwuŋ adangboo! Ahiɛba atwa Bɛtsaida, hi zhɛ hia nda hwuŋ adangboo! Ɛɛ gɛ hiɛŋ nu Taya keeni Saidụn aa njɛ ugondu wa arụhwajɛ na aa njɛ no ofwo hiŋ, asha a jɛshɛrugwa cala cala, harɛ oo urugwonuo tugwuno tụ ụcɛnjɛ-tɛnda,#11:21 oo urugwonuo tugwuno tụ ụcɛnjɛ tɛnda, aa dụla ma'alụ: Tugwuno tu ga tɛ shɛ shɛ tuzuzu o, ama tuna aa na tụ cinji ne tihiŋzhe ti iyweywe shakwa shakwa maa tɛ shɛ ti shi, iwɛ maa o no urugono keeni ma'alụ tụdụla maa o no mbisono amɛ-tụhaŋtụ aba a'wụtụ. aa dụla ma'alụ.#Ayiz 23:1-13; Izik 26:1—28:26; Joɛl 3:4-8; Emos 1:9,10; Zɛka 9:2-4 22Ama Mo hi mbiso maa, I zhɛ yo dobogono hwuŋ Taya keeni Saidụn nụ ụjita ụshɛrɛya ihi hwuri. 23Ahiɛba atwa Kapanaum, ɛ zhɛ suu mo hi gombicingo na azuba? Awo, ɛ zhɛ mo hi zucingo tutu e'uye. Ɛɛ gɛ hiɛŋ nu Sụdụm aa njɛ ugondu wa arụhwajɛ na aa njɛ no ofwo hiŋ, asha ɛ gɛ tɛ zhɛ a nama taa hwayɛ.#Umoz 19:24-28; Ayiz 14:13-15 24Ama Mo hi mbiso maa, i zhɛ yo dobogono hwuŋ atwa Sụdụm nụ ụjita ụshɛrɛya ihi hwuri.#Mat 10:15; Luk 10:12
Zhajɛ Ma Pi mi maa Ma Hi Pana Ụhinjanụ
(Luk 10:21,22)
25Na aka ata ge Jisus jishijɛ, bɛɛ hiɛŋ, Oo, Ada, N njɛ ugwoje bu, gabụ na bɛ shɛ Agwangwama azuba, hwɛɛ tu unyizo ga, iwɛnɛ ebi sweci ijɛ iwɛ maa kede atwa ti'inta, na atwa na eshicinji iyi kwụbɛ iŋ o, ebi kepishingeni iŋ tuba atwa tukwakwa. 26Ada, iiŋ, gana yaa bụ kwụlanɛ tebiye ta.
27Bishi mi n utegeni iyi elele hwɛɛ, i zasa bụtụ mepi Yɛu semi Bishi bwa, i zasa kaa du bụtụ mepi Bishi, semi Yɛu ibwɛ, keeni bụtụ na yaa kwụlanɛ yɛu ɛtɛ maa kapɛshɛngana bụ gana na Bishi bwa shɛ.#Jon 3:35; 5:20; 7:29; 10:15; 13:3; 17:25 28Zhajɛ ma pi mi hwɛɛ hiŋ, ahiɛba na hi lukwumenji, ta ahiɛba na i'wɛŋnɛ iri, maa Ma hi pana ụhinjanụ. 29Shapa ma ụ'wụ'wụ mu i'ilu,#11:29 ụ'wụ'wụ-i'ilu: Iyimabiga aa patana uŋ nu n'ilu ma aba maa a hwɛŋ itimɛ. Ụ'wụ'wụ ga i'ilu ụ shɛ ụsụbwa ugondu ukpahiŋ tɛnda keeni unu-tuhwuga. maa hi betiteni uŋ nu n'ilu mi hiŋ, maa hi no soso no olugwo mi, iwɛnɛ tu Ngaa shɛ bụtụ na meme-zucinje, keeni bụtụ na ahaŋsa ubwa namɛ suu, iwɛ maa hi to ụhinjanụ ugbe iwɛ shihwulu shi hiŋ.#Jɛrɛ 6:16; Fili 2:5; 1 Pita 2:21 30Ụ'wụ'wụ mu i'ilu zasa iwɛ tu'waŋna o, i'wɛŋnɛ mi kaa namɛ hɛkɛlɛ.
Currently Selected:
MATIU 11: RBT
Highlight
Share
Copy
Want to have your highlights saved across all your devices? Sign up or sign in
Rubassa Bible © Bible Society of Nigeria, 2008