UMOZHIGO 6
6
Aka Tugworozwo ta Butugwumwa
1Aka na ta atwa kwuni ufwugwo tugombo na cɛnjɛ tu unyizo, iwɛnɛ ta a matanga aŋ miaụŋ-mo-o, 2nazhɛ miaụŋ-me-eyi ma Agwatana#6:2 miaụŋ-me-eyi ma Agwatana: Egini miaụ mu ga me eyi ma Agwatana epe eri a sha atumwa-azuba. mụ kwụbɛ miaụŋ-mo-o ma atwa maa mu pilanụ, ee teri a na elele na kwụlanɛ aŋ maa a njɛ eyikwo aba. 3Nazhɛ AGWANGWAMA hiɛŋ, Mpiala mi ihwungwɛ mi mi zha shɛ ma nama na bụtụ tutu unyizo-nom iwɛnɛ po butugwumwa na zhɛ bo 'wo baa shɛ. Te kwuni na aka ga shiywa shɛ bwa shi zhɛ sha nama ya dipi-yebi-nu-woshi (120).
4Agbandụ kaa namɛ la nu unyizo heni ata, keeni na aba ibɛ du, aka na ta miaụŋ-me-eyi ma Agwatana#6:4 miaụŋ-me-eyi ma Agwatana: Kwụba ti'eshicigono na buwala bi yebi. mi teneni miaụŋ-mo-o ma atwa, ee metenji aŋ miaụŋ, atwa ata aba shɛ la atwa ikɛnyi a na beni urishi na aka cala.
5AGWANGWAMA kwụbɛ maa abwagara na bụtụ ba nda na cɛnjɛ tu unyizo ga hwuleji, tuhaŋsa tu na aa haŋsa na shɛmɛ sha aba kaa tɛ shɛ iyi iwɛ kiri aka elele.#Mat 24:37; Luk 17:26; 1 Pita 3:20 6Ibɛ po amɛ AGWANGWAMA hashɛganụ iwɛnɛ tu baa njɛ butugwumwa na cɛnjɛ tu unyizo, yaa gwumanɛ bụ duwa. 7Ibɛ po AGWANGWAMA hiɛŋ, N zhɛ mo iricingo atwa na Ngaa karɛ maa e beni na cɛnjɛ tu unyizo, ta atwa, ti isundɛ ehilo, ti iyi nɛ yo hombilo, ta shanụnụ, iwɛnɛ ta amɛ mi hashɛganụ iwɛnɛ tu Ngaa njɛ aŋ. 8Ama amɛ AGWANGWAMA lemi na Noa.
9Uwaŋnɛ Noa na. Ga Noa shɛ bụtụ bi tiririri, bu zasa kaa unu-tusapa kwukwuŋ na ashashɛ uwaŋnɛ ubwa o. Ga Noa kaa twa-ikpɛngwu na Agwatana.#2 Pita 2:5 10Ga Noa kaa 'yajɛ miaụŋ-me-eyi mu tatụ, gɛ Shɛm, na Ham, keeni Jafɛt.
11Agwatana kwụbɛ maa cɛnjɛ tu unyizo ti teni ụdamụ, abwagara kaa barɛ na cɛnjɛ tu unyizo. 12Agwatana kwụbɛ maa cɛnjɛ tu unyizo ti teni ụdamụ, iwɛnɛ ta atwa elele teni ụdamụ na cɛnjɛ tu unyizo kpaaŋ.
13Nazhɛ Agwatana hiɛŋ Noa, N nduwa ahaŋsa mi oko maa mo iricingo usunda-tu'waba we elele nu unyizo, iwɛnɛ te e shidinji abwagara nu unyizo. N zhɛ mo iricingo aŋ hwɛɛ, ta cɛnjɛ tu unyizo. 14Meme shebeni ụhaŋtụ nu uzhibi ụ'wụ'wụ na ɛɛ hiɛŋ gofɛ, nda shɛmɛ na amɛ ubwa, swana amɛ ubwa tuko ta aba ubwa hwɛɛ. 15Gana na ɛbi zhɛ ba shaba ụhaŋtụ ata na: ga ụnjɛswa ubwa ụ shɛ bimenji be esugwulumi kpakwụ-ni-dipi-yebi (300). Go uholo ubwa ụ shɛ bimenji be esugwulumi dupu (50). Go uzoto ubwa ụ shɛ bimenji be esugwulumi talacɛ (30). 16Ta ụhaŋtụ ata ukogo, go tuhwolu tu na ti zhɛ ta nama nu ukogo ata keeni i'ɛŋbi ibwɛ, tɛ shɛ ababasụ i'ɛlɛ eyebi, nda odubo na bụ'aŋbụ bu bwa nụ ụzalụ uko, ndana uŋ shɛmɛ shɛ tatụ nu ukwunanga wa azuba ubwa. 17N zhɛ ma nda maa meni mi zhagajɛ, maa mi iricinji iyi elele nɛ ya hwungwa na cɛnjɛ tu unyizo. Iyi elele nɛ kaa namɛ na cɛnjɛ tu unyizo zhɛ yo 'wo. 18Ama N zhɛ ma twa-unu na bụ, bɛ shɛ kaa bo tono nụ ụhaŋtụ ata, tu gabụ, ta miaụŋ mụ bụ me eyi, te biyikwo bu keeni atashɛ bụ. 19Sugo edenji iyi-uumwa ye elele iyebi yebi butubwenyi ne biyikwo maa tecinji iŋ nụ ụhaŋtụ ata maa i nama uraiŋ. 20Tu udenji shanụnụ she elele, tu udenji isundɛ ehilo ye elele, ti iyi elele nɛ yo hombilo na cɛnjɛ, iyebi yebi hwɛɛ maa i nama uraiŋ. 21Sugo sasana iyimɛyɛ ye elele nɛ ɛɛ zhɛ na ya maa suteni iŋ pụ bụ, inɛ ɛtɛ ibɛ zhɛ ya sha iyimɛyɛ bụ na aba. 22Ga Noa njɛ gana na ta Agwatana eni bu kpaaŋ.#Ehib 11:7
Currently Selected:
UMOZHIGO 6: RBT
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen-GB.png&w=128&q=75)
Want to have your highlights saved across all your devices? Sign up or sign in
Rubassa Bible © Bible Society of Nigeria, 2008