Mélékusu 11
11
Miíŋene má Yésusu naá tɛ́sɔnɔ ya Yolósalɛmɛ
1Yésusu na behúúní bɛ́hɛ́ bá mbaá ŋá bá ná lɛ́ go báyɛkana go go bola naá Yolósalɛmɛ, bá ná lɛ́ mekúígíi na bɛdɔŋɔ bá bɛ́andɛ́ bɛ́ɛbɛ bɛ́ lɔ́mɔ́, Bɛ́tɛ́fasɛ na Beteníi, go go ɛ́da bola naá ogɔndɔ yá magónɛ́dá má Boolifíe. Gɛ́hɛ́ go dóma behúúní báandɛ́ naá behúúní bɛ́hɛ́ 2a amɔ́ gáábɔ́ a amɔ́: «Ɛ́dá nɔnɔ naá gɛdɔŋɔ gɛ́ɛgɔ gɛ́ lɔ́mɔ́ naá busío bɛ́nyɔ́ gɛ́ɛgɔ. Gɔgɔ́ aŋa no gaá ná bola hɔ́ɔ, no gaá gídé moɔnɔ́ ba abaŋa bɛbɛa súnígéelú, mɔtɔ a gá lɛ́ a dɛ mo bólɛ́gá. Mo súdúnéemú nɔnɔ, no úle nɛhɛ́. 3Mɔtɔ a amɔ́ a nyó úhune a amɔ́: “Bɔ́ɔbɔ no ŋananamɔ́ nɔ́ɔnɔ ŋkádɛ o?” Mo oyánáamɔ́ nɔnɔ no amɔ́: “Daadáa mɔ́ɔ a lɔ́mɔ́ ncaná nɛhɛ́.”» A gaá mo gundíe háalá godɔ́ɔdɔ godɔ́ɔdɔ. 4Behúúní bɔ́ɔbɔ go biene pɛ́, go gíde moɔnɔ́ ba abaŋa bɛbɛa súnígéelú naá busío bá gɛasɛ́ gá nnyaŋá, naá boayá bá pɛ́, go mo súdune. 5Batɔ bóncodío báaba bá mbaá lɔmɔ́ hɔ́ɔ go bó úhune bá amɔ́: «Ɛkádɛ gɛ́gɔ́ɔ no ŋananamɔ́ o? Goakɛ́ no súdunemú moɔnɔ́ ba abaŋa bɛbɛa mɔ́ɔnyɔ o?» 6Behúúní bɔ́ɔbɔ go bó gundie aŋa Yésusu a mbaá bó oyáná. Batɔ bɔ́ɔbɔ go bó dɛ́ɛna. 7Gáábɔ́ go úlene Yésusu na moɔnɔ́ ba abaŋa bɛbɛa mɔ́ɔnyɔ, bá báá anáa bɛla bábɔ́ naá mɔ́ nnyimé, Yésusu go lukumene kɔ́ɔ naá mmoɛná#11.7 O bana, go eninye na bɔ́ɔbɔ naá Sakalɛ́a 9.9.. 8Kɔ́ɔ gɛca gá batɔ gɛ́ ɛ́damɔ́ go ana bɛla bábɔ́ go pɛ́, bóncodío bá ágana bitimbó bɛ́ɛbɛ bá mbaá lɛ bɛ́ ɛ́da bá fafa#11.8 Aŋa naá 2 Mefuŋe 9.18.. 9Báaba bá mbaá lɔmɔ́ bá mo gɔ́gɔ naá busío na báaba bá mbaá lɔmɔ́ bá mo bienene bá ánca bá amɔ́: Osána! «Gɛfona gɛ́ bɛ́ɛmba na mɔ́ɔnyɔ u úlenemú go ufíno yá Daadáa! 10Gɛfona gɛ́ bɛ́ɛmba na bufuŋe bɔ́ɔbɔ bó úlenemú, bufuŋe bá isée bɛcɔ́ Défidi#11.10 O bana, go eninye na bɔ́ɔbɔ naá Ɛsagɔ 118.25-26.. Osána! Nigúmi na Asaŋa naá mmoɛná.»
11Gɔ́ɔ Yésusu i íŋenemú naá Yolósalɛmɛ, gɛ́hɛ́ go ɛ́da naá Nnyaŋá ya Asaŋa. Naá nnyimé ya go bédíbidinye boóma buimée hɔ́ɔ, gɔnɔ́ aŋa bó mbaá ŋá bó ná lɛ́ hɛɔbɔ́bɔ́ɔ, gɛ́hɛ́ go biene pɛ́ olɔŋɔ na behúúní bɛ́hɛ́ bɔ́ɔ́dɔ́ na báandɛ́ go go gunde naá Beteníi.
Yésusu a á yɔmɛ́nɔ́ bufiigíe
12Aŋa gó mbaá bélíe, naá goúlukie gáábɔ́ naá tɛ́sɔnɔ ya Beteníi, Yésusu go ɔ́bɔ ncaná. 13Gɛ́hɛ́ go ɛ́na halaháláa mbɔ́gɔ́ ya bufiigíe na bɛányɛ makɔ́nɔ́; a báá lɛ gó báyɛkɛna anáa cí go go ɛ́na aáŋa bɛsamɔ́ bɛ́ lɛ́ kɔ́ɔ. Aŋa a mbaá ncó bola anáa cí, go gíde boɛ́tɛ goana bɛányɛ aá bɛányɛ, goakɛ́ bó do mbáa lɛ gɛcamɛna gá bɛsamɔ́ go úme. 14Gɔ́ɔ Yésusu a gálɛdamɔ́ go bufiigíe bɔ́ɔbɔ a amɔ́: «Mɔtɔ a dɛ ŋgá gɔnɔ nyáa bɛsamɔ́ báhɔ!» A gálagala nɔ́ɔnɔ, behúúní bɛ́hɛ́ bá mo bódólonyo.
Yésusu a á gúnée bedúí moóma naá Nnyaŋá ya Asaŋa
(Mot 21.10-17; Lók 19.45-48; Sáŋ 2.13-16)
15Gɔ́ɔ bá bolamɔ́ naá Yolósalɛmɛ. Yésusu go íŋene naá Nnyaŋá ya Asaŋa, go ɛ́da go gúne batɔ báaba bá mbaá lɔmɔ́ bá ŋanana nyonyí hɔ́ɔ#11.15 hɔ́ɔ: nɔ́ɔnɔ gó lɛ́ aá naá nnyaáŋgadɛ́ mmue ya Nnyaŋá ya Asaŋa, Beyúdene bɔ́ɔ bá mba lɛ bá bolana naá hɔ́ɔhɔ hoóma.; a dɛ́anana tábɛ́la sá benúgí muinyí na indukí ya bedúí mmɛŋá go cí. 16A mba legé goŋaá mɔtɔ a dɛ gɔnɔ́ fɛ́lɛda na boóma bá go dúe naá Nnyaŋá ya Asaŋa. 17Gɔ́ɔ ɛ ɛ́damɔ́ go bó húunenye a bó oyanɛna a amɔ́: «Ábɔ, bó do báá ɔ́ŋɔ́ɔlú goŋaá: bá ŋga dɔ́ŋɔ́nɔ́ɔ Nnyaŋá yamɛ bá amɔ́ “nnyaŋá ya mbósógólí” go mɛɛ́nɔ miimée. Kanɛ́ bɛɛnyɔ́ɔ no báá go yɛ íyie nɛbɔ́ɔsɛgɔ ná biíbi#11.17 O bana, go eninye na Iseyíi 56.7; Selemíi 7.11..» 18Aŋa bagɔ́nɔ́ɔ bá bedúmbí bɛbáágá naá Asaŋa na muloodio má gicele bá mbɔ ɔ́bɔ́ boóma bɔ́ɔbɔ Yésusu a mbaá ŋaáa, gáábɔ́ go ɛ́da go fúmbe pɛ́ ya go mo óna. Mammana, bá mba lɛ́ bá mo díine go goŋaá gitúu gá batɔ gɛ́ɛgɛ gɛ́ mbaá lɔmɔ́ hɔ́ɔ, gohúunenye gá Yésusu gó mba bó báláfɛ́ná naá odɛ́má. 19Aŋa nyɔbɔ́ nɛ́ mboó obá, Yésusu na behúúní bɛ́hɛ́ bá báa lɛ gó úlukie naá tɛ́sɔnɔ yɛ́ɛyɔ#11.19 gó úlukie naá tɛ́sɔnɔ yɛ́ɛyɔ : Gokikilidie gúncoó gó lɔ́mɔ́: Aŋa nyɔɔbɔ́ nɛ́ mbaá lɛ nɛ́ oba, Yésusu na behúúní bá húme naá tɛ́sɔnɔ..
Gioliminyo na mbósógólí
(Mot 21.20-22)
20Gó bélenye na gɛyɛ́nɛ́ túlúbú, gáábɔ́ go gɔnɔ nco dómba anáa bufiigíe, gó bó gíde bó báa go gúe na ɛŋaŋá kɛ́. 21Píele go béeniŋinye dogálɔ dɔ́ɔdɔ Yésusu a mbaá gálɛ́dá bufiigíe, go oyana Yésusu a amɔ́: «Iloodio, yíkéne, bufiigíe bɔ́ɔbɔ go á ná yɔmɛ́nɔ́ bó báa go kóta.» 22Yésusu go gundie a amɔ́: «Ágá nɔnɔ odɛ́má yɛ́nyɔ́ naá Asaŋa. 23Mammana, ŋgaá nyó oyáná caá, mɔtɔ a amɔ́ a gálɛda ogɔndɔ yɔ́ɔyɔ a amɔ́: “Úlúkíe hɔ́ɔlɔ́ go ɛ́da bɔ́nɔ naá máŋɛ́”, ba ndiemi aáŋa a dɛ bɛáa cuŋí naá odɛ́má, a bóó olímínyóo naá odɛ́má yɛ́hɛ́ goŋaá boóma bɔ́ɔbɔ a gálagalamɔ́ bó ɛ́nanɛna, Asaŋa a gaá mo fáá obɔ moánɛ. 24Boóma moánɛ bɔ́ nnyó oyanamɔ́ caá, buimée bɔ́ɔbɔ no ɔŋɛnɔmɔ́ naá mbósógólí, olímínyóo nɔnɔ goŋaá no á bó bɛáa, gɔ́ɔ no gaá ná bó bɛáa. 25Gɔ́ɔgɔ no dɛ́lɛmɛnamɔ́ go go bósógolonyo, aáŋa no bɛanana gɛsɛnɛ na mɔtɔ, mo hééhínyéemú nɔnɔ, goŋaá Isée bɛnyɔ́ mɔ́ɔnyɔ a lɔ́mɔ́ naá mmoɛná a nyó héehinye tɔ́nɔ go bɛoba bɛ́nyɔ́.» 26[Kanɛ́ aáŋa no do hééhínyée basɔ́gɔ́ɔ, Isée bɛnyɔ́ mɔ́ɔnyɔ a lɔ́mɔ́ naá mmoɛná a dɛ ná bósó go nyó héehinye tɔ́nɔ go bɛoba bɛ́nyɔ́.]
Bú úhene Yésusu hoóma háaha nɛgaŋa nɛ́hɛ́ nɛ́ ɛ́damɔ́ mo úlenine
(Mot 21.23-27; Lók 20.1-8)
27Gɔ́ɔ Yésusu na behúúní bɛ́hɛ́ bá ncomɔ́ gunde naá Yolósalɛmɛ. Aŋa a mbaá lɛ a gɔsɔ a bólɛga naá Nnyaŋá ya Asaŋa, bagɔ́nɔ́ɔ bá bedúmbí bɛbáágá naá Asaŋa, muloodio má gicele na bafɛanɔ́ɔ bá gɛdɔŋɔ go mo báyɛkɛna 28bá amɔ́ gɛ́hɛ́ bá amɔ́: «O ŋananamɔ́ moóma moánɛ na kasɛ́á nɛgaŋa o? Ánɛ́ɛ a lɔ́mɔ́ go íŋénéelú nɛgaŋa ná go mó ŋanana o?» 29Yésusu go bó gundie a amɔ́: «Yɔmɔ́ɔ nnyó nɔɔ tɔ́nɔ ŋgúhune táŋɛ́ mmue. No amɔ́ no kundinye, manɛ́ kaá ná nyó oyáná go nɛgaŋa nɛ́hanɛ́ ŋŋananamɔ́ moóma moánɛ. 30Giyuminye gɛ́ɛgɛ Sáŋa a mbaá lɛ a yumeninye batɔ gɛ́ mbaá lɛ gɛ́ ɛ́da go úlene áhanɛ́ɛ: naá Asaŋa lí, naá batɔ o? Kundínyéemú nɔnɔ!» 31Gáábɔ́ go ɛ́da go bébidebide bá amɔ́: «Dɛ amɔ́ dɛ gundie dɛ amɔ́ “Naá Asaŋa”, a gaá có úhúné a amɔ́: “Goakɛ́ kanɛ́ no mbií inyé go mo oliminyo o?” 32Kanɛ́ dɛ gaá nó oyɛ́dá dɛ amɔ́: “Naá batɔ o”?» Bá mba lɛ́ na bofoá go gitúu gá batɔ. Mammana, mɔtɔ uŋkimée a mba lɛ́ a gɔ́lɔnɔ Sáŋa goŋaá a lɛ́ mammana mbúsí ya Asaŋa. 33Kɔ́ɔ bá gundiemú Yésusu bá amɔ́: «Dɛ dɛ íyíménée.» Yésusu go bó oyana tɔ́nɔ a amɔ́: «Akɛ́ yɔmɔ́ɔ cɛ gaá nyó oyáná nɛgaŋa nɛ́ɛnɛ ŋŋananamɔ́ moóma mɔ́ɔmɔ na nɛ́.»
Currently Selected:
Mélékusu 11: YAS
Highlight
Share
Copy
Want to have your highlights saved across all your devices? Sign up or sign in