Sáŋa 3
3
Ŋkanɔ́ sá Yésusu na Nɛkɔdɛ́mɛ
1Gɔ́ɔ, mɔtɔ ummue a mba lɛ́ hɔ́ɔ naá giimbó ga Befelisiéŋe, ufíno yɛ́hɛ́ Nɛkɔdɛ́mɛ; a mba lɛ́ ofɛanɔ́ɔ ummue naá Beyúdene. 2Gɛ́hɛ́ go úle na nutútúgu naá boayá bá Yésusu, go mo oyana a amɔ́: «Eléébi, dɛ íyimene goŋaá o lɛ́ iloodio hɛ́ɛhɛ Asaŋa a lɔ́mɔ́ dómáalú go go nco có húunenye, goakɛ́ mɔtɔ a dɛ bósó ba go ŋanana bieninye bá gobékúke bɛ́ɛbɛ o ŋananamɔ́ aáŋa Asaŋa a dɛ báá nɛhɛ́.» 3Yésusu go mo gundie a amɔ́: «Mammana, mammana ŋgaá go oyáná caá: go amɔ́ a á gɔnɔ́ bébíene gáandɛ́, mɔtɔ moánɛ a lɛ go ɛ́na Bufuŋe bá Asaŋa.» 4Nɛkɔdɛ́mɛ go mo úhune a amɔ́: «Nɛɛ́nɛ mɔtɔ a ná lɛ́ gilunú a lɔ́mɔ́ ba go gɔnɔ bébíene o? A lɛ́ ba go gɔnɔ go íŋene naá gadɛ́ɛ gá nnyeedíi, a lɛ go bébíene o?» 5Yésusu go mo gundie a amɔ́: «Mammana, mammana ŋgaá go oyáná caá: go amɔ́ a á gɔnɔ́ bébíene naá miimpo na naá Giliíli, mɔtɔ moánɛ a lɛ go íŋene naá Bufuŋe bá Asaŋa. 6Báaba onɔ́mɔtɔ́ na okɔ́dɔ bá bíenemú, bá lɔ́mɔ́ batɔ, báaba Gimmúmpúu gá Giliíli a bíenyemú bá lɔ́mɔ́ bá Giliíli. 7Kanɛ́ o do békúkée go gɔ́ɔgɔ mbáa ná go oyáná caá, no háanana go bébíene naá mmoɛná. 8Ufufu yó fufe anáa yó lɛ́galɛgamɔ́, go ɔ́bɔnɔ aŋa yó fufenemú, kanɛ́ o do íyíménée anáa yó ɛ́damɔ́ go úlene ɛ́ná anáa yó ɛ́danamɔ́. Bó lɔ́mɔ́ nɔ́ɔ caŋa mmue na uŋkimée mɔ́ɔnyɔ a bébíenemú naá Giliíli.» 9Kɔ́ɔ Nɛkɔdɛ́mɛ a mo úhunemú a amɔ́: «Nɛɛ́nɛ bó lɔ́mɔ́ ba go báŋa o?» 10Yésusu go mo gundie a amɔ́: «Maamɔ́ɔ mɔ́ɔnyɔ o lɔ́mɔ́ gɛantá gá uhúúnínyí naá Ɛ́sɛlahɛ́ɛlɛ, o gɔnɔ nanana moóma mɔ́ɔmɔ o? 11Mammana mammana ŋgaá go oyáná caá, bɛɛcɔ́ɔ dɛ oya moóma mɔ́ɔmɔ dɛ íyimenemú, dɛ ŋanana ŋgominyo go mɔ́ɔmɔ dɛ mbɛɛ́ ɛ́na, kanɛ́ no do maamánáa go olimonyo bɔ́ɔbɔ dɛ oyamɔ́. 12Aáŋa no do olímónyóo gɔ́ɔgɔ nyó oyanɛnamɔ́ masɔ́mɔ má cí gɔ́ɔgɔ, kanɛ́ múunú naá mmoɛná gúunú o? 13Mɔtɔ a gá báasa a dɛ bólɛ́gá naá mmoɛná aáŋa caá mɔ́ɔnyɔ a mbaá siisé hɔ́ɔ, a lɔ́mɔ́ Moɔnɔ́ ba mɔtɔ#3.13 O bana, go eninye na Ncaba 30.4; Oló 10.6.. 14Caŋa táŋɛ́ mmue aŋa Mɔ́sɛsɛ a mbɛɛ́ ɛdɛ́gá nnyɔ́gɔ ya gɛkɔ́ŋɔ go mmoɛná naá giolóo gá bodɛ́agadɛ́#3.14 Go ɛ́na naá Ɛmbanɔ 21.9., nɔ́ɔnɔ gɔ́ɔ tɔ́nɔ bá háananamɔ́ go ɛdɛga go mmoɛná Moɔnɔ́ ba mɔtɔ, 15goŋaá mɔtɔ uŋkimée mɔ́ɔnyɔ a ágamɔ́ odɛ́má yɛ́hɛ́ naá mɔ́ɔ, a bɛa gɛɔyɔ gá kanɛ mesúge. 16Asaŋa a mba dómbáa go maamana batɔ, gɔ́ɔ a mbií íŋéné gimmuée gɛ́hɛ́ gá Moɔnɔ́ goŋaá uŋkimée mɔ́ɔnyɔ a ágamɔ́ odɛ́má yɛ́hɛ́ naá mɔ́ɔ a dɛ yímé, kanɛ́ a bɛa gɛɔyɔ gá kanɛ mesúge. 17Mammana, Asaŋa a dɛ mbá dóma Moɔnɔ́ bɛ́hɛ́ naá cí go go nco fáa batɔ gɛoba, bó mbaá lɛ kanɛ́ go goŋaá, a bó sódio. 18Bá dɛ fáánánáa mɔ́ɔnyɔ a ágamɔ́ odɛ́má yɛ́hɛ́ naá Moɔnɔ́ gɛoba, kanɛ́ mɔ́ɔnyɔ a lɔ́mɔ́ a dɛ ágánáa odɛ́má yɛ́hɛ́ bá báa go mo fáa gɛoba, goakɛ́ a lɛ́ kanɛ go ága odɛ́má yɛ́hɛ́ naá gimmuée gá Moɔnɔ́ ba Asaŋa. 19Gɔ́ɔ, go bɛ́ɛmba na gɛoba gó lɔ́mɔ́ náana: gise gɛ́ mbu úlé naá batɔ, kanɛ́ batɔ bá báá maamánáa mbíno gó dómba gise, goakɛ́ meŋiigíe mábɔ́ má mba lɛ́ gɛgáda. 20Uŋkimée mɔ́ɔnyɔ a ŋananamɔ́ gɛgáda a bɛlabɛla gise, a gunde a dɛ úlénée naá gise na bofoá bá goŋaá meŋiigíe mɛ́hɛ́ má gaá bédúfíe dalaŋanyɛ. 21Kanɛ́ mɔ́ɔnyɔ o oyamɔ́ mammana u úlene naá gise go goŋaá meŋiigíe mɛ́hɛ́ má bédúfie dalaŋanyɛ, goakɛ́ má lumenene na mbééníŋínyí ya Asaŋa.»
Yésusu na Sáŋa Begiyuminye
22Naá nnyimé hɔ́ɔlɔ, Yésusu na behúúní bɛ́hɛ́ go ɛ́da naá gigísi gá cí gá Yudée; gáábɔ́ go gɛ́ga hɔ́ɔ medúgú, a yumeninye batɔ. 23Sáŋa naá bɛ́hɛ́ boayá, a yumeninye batɔ naá Ɛ́nɔŋɔ, mekúígíi na Sélime, goakɛ́ miimpo má mba lɛ́ hɔ́ɔ nɛmbɛ nɛmbɛ. Batɔ bá mba lɛ́ bú úlene, bá bó yumeninye. 24Naá gɛcamɛna moánɛ, bá mba ŋá bá gá lɛ́ bá dɛ nɔ́ɔ Sáŋa naá ncíbo ya gɛaŋɔ́. 25Gɔ́ɔ cuŋí sɛ́ obamɔ́ na mɔtɔ ba Beyúdene ummue na behúúní bá Sáŋa, sɛ́ báláfa masɔ́mɔ má gɛsogona. 26Kɔ́ɔ, bá ncomɔ́ huenye Sáŋa, go mo oyana bá amɔ́: «Eléébi, mɔtɔ mɔ́ɔnyɔ a mbaá lɔmɔ́ nahɔ naá Yolodɛ́ŋɛ boayá búunú, mɔ́ɔ mɔ́ɔnyɔ o mbaá dɛ́lɛ́mɛ́ná ŋgominyo go busío bɛ́hɛ́, ɛ́ná, mɔ́ɔ tɔ́nɔ a ná lɛ́ go yumeninye, batɔ biimée bɛ́ ɛ́dana hɔ́ɔ.» 27Sáŋa go bó gundie a amɔ́: «Mɔtɔ a dɛ bósó ba go báága naá odɛ́nɛ́ mɔ́ɔ moatɛ́, aáŋa bó do bá yɔ́ɔyɔ Asaŋa a mo fáamɔ́. 28Bɛɛnyɔ́ɔ moatɛ́ no lɛ́ ŋgominyo sámɛ goŋaá mmbo oyɛ́dá caá: “Yɔmɔ́ɔ cɛ báá Mesíi, kanɛ́ ndɛ́ mɔ́ɔnyɔ bá mbaá dómá naá busío gɛ́hɛ́#3.28 Go ɛ́na 1.20. Go eninye na Melesíi 3.1..” 29Mɔtɔ ba okɔ́dɔ a lɔ́mɔ́ onɔ́mɛ bɛhɛ́; kanɛ́ ugúle ba onɔ́mɛ a lɛ́ hɔ́ɔlɔ́ go boayá, a mo bódólonyo, ukelú yɛ́hɛ́ yó mo óbonyo bɛyaŋa gɛca. Bɛyaŋa bámɛ bɛ́ lɔ́mɔ́ kanɛ́ nɔ́ɔnɔ, bɛ́ lɛ́ dácɛ dɔgɛdɔgɛ. 30Bó úhene goŋaá ɛ ɛ́dana naá busío a goma, yɔmɔ́ɔ kundene na nnyimé.»
Mɔ́ɔnyɔ ɛ ɛ́damɔ́ go úlene naá mmoɛná
31«“Mɔ́ɔnyɔ ɛ ɛ́damɔ́ go úlene naá mmoɛná, a dómbana mɔtɔ uŋkimée. Mɔtɔ ba cí ɔ ɔ́bɛnɔnɔ na cí, a gálagala moóma mɔ́ɔmɔ mó núunemú cí. Mɔ́ɔnyɔ ɛ ɛ́damɔ́ go úlene naá mmoɛná, [a dómbana mɔtɔ uŋkimée], 32a ŋanana ŋgominyo go moóma mɔ́ɔmɔ a mbɛɛ́ ɛ́ná a báá gundé a bɔ́ɔ́ ɔ́bɔ́nɔ́ɔ, kanɛ́ mɔtɔ a dɛ olímónyóo ŋgominyo yɛhɛ́. 33Mɔ́ɔnyɔ o oliminyomú ŋgominyo yɛhɛ́ o olimonyo goŋaá Asaŋa a lɛ́ mammana. 34Mammana, mɔ́ɔnyɔ Asaŋa a mbaá dómá o oya dogálɔ dá Asaŋa, Asaŋa a mo hóogonyo na Giliíli bɛhɛ́ dácɛ. 35Baaba a maamana Moɔnɔ́, a báá ágá buimée naá mɔ́ɔ ɛmbɔ́gɔ. 36Mɔ́ɔnyɔ a áganamɔ́ odɛ́má yɛ́hɛ́ naá Moɔnɔ́ a bɛanana gɛɔyɔ gá kanɛ mesúge; mɔ́ɔnyɔ i inyemú go ɔ́bɛnɔ Moɔnɔ́, a dɛ ŋgá bɛa gɛɔyɔ, kanɛ́ mpímí ya Asaŋa ɛ lɔbɔ naá mɔ́ɔ.”»
Currently Selected:
Sáŋa 3: YAS
Highlight
Share
Copy
Want to have your highlights saved across all your devices? Sign up or sign in