Mak 9
9
1Jesus gese suuy se ghon-ɛyfɛl nə wene ge: Mɛ suuy əbluuy se ghɛn ge ghel ɛlee tiy ɛ məm fɛn nɛ ɛ́ jia yî kuo nɛ ɛ́ báà yɛn ka Feyine gwiyen nɛ̀ əbtaawe ə wene se yɛ sak.
Əbghun ə Jesus kubsen
(Mat 17.1-13; Luk 9.28-36)
2Əbchii chia ntuufe, Jesus liɛ Bita nɛ̀ Jɛms gese nɛ̀ Joon, ghene ghene kok se ketuu kfən ɛydia ɛylee è se lu fo kɛn ghene-ghene, ɛ leghɛ, əbghun ə Jesus me kubsen kɛn ɛ ghene ɛyshiɛ. 3Ndəyse wene me se njantee, fəfe chia ɛybvəə, naa chia ka lòó wel suu ndəyse ə wen ɛ mbi fɛn é se yɛ kek. 4Ghene yɛn nɛ Elija ghene Moses tiy fo suŋnene ghene ghe Jesus. 5Bita me suuy se Jesus ge: Ndinte, ke lu kejuŋ ka ghɛs luun fɛn, lam é ghɛs baklé əmtaa əmtal, viɛ nɛ̀ wɛ Moses gese nɛ̀ wɛ Elija. 6Bita nè suuy dî bek ge ghene ghɛ ghon-ɛyfɛl nè fane naa se ŋaŋ, əb jia se ke kenəə kɛ lòó əb suuy.
7Mbàkse gvəm è chite ghene, giɛ ɛylee fəy è gwiy ɛ məme mbàkse fo ge: Vin lu wán ə wom wɛ mɛ koŋen naa se ŋaŋ, ghɛn yɛ yio se wen. 8Ghon-ɛyfɛl ghii loo kiy ɛ leghɛ, è jia gese yɛn wel fo buu kɛn Jesus.
9Ghene nɛy loo chio se kfən, Jesus chiise se ghene ge: Ghàà ghɛn nɛ̂y fiɛl kenəə kɛ ghɛn kè yɛnen se wel buu ge nɛy yɛ lu nɛ Wanwele loolemen se ɛykuo.
10Ghene me gok so ɛ ghene məm, è ko se kante ge, se lòòle se ɛykuo sɛ lu gee ghɛ-a? 11Ghene me bif se Jesus ge: Lu bek ghɛ wɛ ghɛ́ ɛydinte tesake suuyen ge Elija tiy se nɛ̂y se kɛ̀ɛ̀tè se gwiy,
12Jesus fise ge: Elija lu se kɛ̀ɛ̀tè se gwiy se siyse əbnəə əbjim é əb kase yɛ lu əbfɛɛ. Lu bek ghɛ wɛ ɛ́ nyaken ɛ́ ŋwaale-Feyin ge Wanwele nɛ̂y yɛn ngɛk se ŋaŋ, é ghele nyable nɛ̀ wen? 13Mɛ suuy se ghɛn ge Elija nè gwiymen, ghele jef nɛ̀ wen ɛ ghene jii kɛn ka ɛ́ nè nyakenmen kum wen.
Jesus jum ɛyfim se wándɛ əbghun
(Mat 17.14-21; Luk 9.37-43a)
14Ghe Jesus chio è baksen ghon-ɛyfɛl ɛlee, è yɛn nɛ ngose wele kaame ɛ ghen ɛybee nɛ ghene ghe ndintese tesak selee beke mbek. 15Ghel ghii yɛn Jesus, ɛ leghɛ əbchio yum ghene naa se ŋaŋ, ghene me nyiŋ è ndu, è chakte wen. 16Əb bif se ghon-ɛyfɛl nə wene ge: Ghɛne ghel ghine kè beke ghɛ?
17Wel əblee ɛ kenon fo fise ge: Ndinte, mɛ kè gwiy nɛ̀ wan ə wom se wɛ̀ bek ka əb kiin ɛyfim nɛ ɛy nɛɛy əb jia se suŋnene. 18Naa ɛ leghɛ wɛ ɛyfime tene losen wen, ɛy mak wen se ntiɛ, kefəfeye yɛ fəy ɛ wen əbchio, nɛ əb kfəle ɛsoŋ gese tabte tabten. Mɛ kè lô suuy ge ghon-ɛyfɛl nə wɛ̀ jum, ghene mom lòlò.
19Jesus me suuy se ghene ge: Ghɛne ghɛ ntem fɛne báà fo ɛytem se Feyine. Ghɛne kɛŋe ge mɛ nɛ̂y yɛ lu ghɛsen se chin lɛɛy? Ghɛne kɛŋe ge mɛ nɛ̂y təəte ghɛn se chin lɛɛy? Gwiye nɛ̀ wan ten se mɛ. 20Ɛ́ me gwiy nɛ̀ wen se Jesus.
Ɛyfim yi se yɛne gwiye nɛ̀ Jesus ɛ leghɛ, è mak wan se ntiɛ, əb se biŋlee, nɛ kefəfəye fəye əbchio. 21Jesus bif se ba ə wan ten ge: Ɛyfim yine chiimen ɛ wan əbghun se əbtəm lɛɛy. Əb fise ge: Kɛɛ se wan əbtɛlɛ. 22Ɛy lóó ɛy yɛ makle wen se əbvəs gese nɛ̀ se moo, kɛŋe se yuy yuyen. Loo lu nɛ lòó wɛ̀ nɛɛy kenəə, wɛ̀ koosen ɛysen se ghɛs è giamten.
23Jesus me suuy se wen ge: Ge loo lu nɛ lòó wɛ̀ nɛɛy kenəə-a? Kenəə di lòó ke jia ghak wel wɛ əb foon ɛytem se Feyine.
24Əb suuy di ɛ leghɛ, ba ə wan vi me jaŋ è suuy ge: Mɛ lu nɛ mɛ fó ɛytem se Feyine, giamten é mɛ loote fo!
25Jesus yɛn nɛ ngose wel se lunte lunten, è me kwanten ɛyfim yi ge: Ɛyfim yɛ ɛy nɛɛyen ge ghàà wan vin yɛ suŋnen gese yio wiy əbnəə, mɛ suuy se wɛ̀ ge, fəy è jia yî kase fiile se wen əbghun.
26Ɛyfime tene toŋ ɛ giɛ ɛytaa, è mak wan ɛ jii ɛybee, è me fəy se wen əbghun. Wan se nyiŋ fo ka kenkuo wel. Ndio ghel me se suuy ge əb kuomen. 27Jesus me ghal keghoo ə wen è lose əb loole è teem.
28Jesus nɛ̂y lii se ndaa, ghon-ɛyfɛl nə wene bif se wen nɛ lu kɛn ghene ghene ge: Lu bek ghɛ wɛ ghɛs kè momen lolo se jum ɛyfime ten?
29Əb fise ge: Lòó wel jia jum ɛynkii ɛyfim ka yine buu kɛn ge əb jem è gese bam əbfua-əbyíɛ́ne.
Jesus gese din ɛynkii ɛykuo yɛ əb nɛ̂y kuo
(Mat 17.22-23; Luk 9.43b-45)
30Jesus ghene ghon-ɛyfɛl nə wene loo se fo è tosen ɛ Galilee. Jesus nè báà se koŋe ge wel keele ghaa ghene luun, 31bek ge əb nè dinte əbnəə se ghon-ɛyfɛl nə wene suuy ge: Ɛ́ nɛ̂y din Wanwel é ghele koo è yuy, dî əbchii chin əbtal é əb kase loole se ɛykuo.
32Ka Jesus suuyen dî ghene jia keele kenəə kɛ əb suuy dî è se fane se bif.
Chia ndɛ ghel ɛjim?
(Mat 18.1-5; Luk 9.46-48)
33Ghene ndu è chin ɛ Kabanaum, è nɛy loo lu ɛ ndaa, əb bif se ghene ge: Ghɛn kè jɛle beke gee ghɛ ɛ jii?
34Ghene me gok ɛ chichi bek ge ghene kè jɛle ɛ jii beke mbek ge sɛ lu ndɛ ketuu ɛ ghene məm-a? 35Jesus diom, è me toŋte ghon-ɛyfɛl ghɛ njio-sebaa ɛyvəm è suuy se ghene ge: Naa ndɛ wɛ əb kɛŋen se yɛ lu wele mbiy tiy se səkse ngeŋ ə wen se yɛ fɛl se wel əbjim. 36Əb suuy di, è liɛ wan əbtɛlɛ, è tiyse ɛ ghene ɛyshiɛ, è baamé è suuy se ghene ge: 37Naa ndɛ wɛ əb fiisen wán ka vin bek mɛ lu nɛ əb fiisen nɛ lu mɛ, nɛ naa ndɛ wɛ əb fiisen mɛ báà fiisen kɛn mɛ, əb fiisen nɛ lu wel wɛ əb nè tumen mɛ.
Wel wɛ əb báà se bake ghɛsen toke token
(Luk 9.49-50)
38Joon me suuy ge: Ndinte, ghɛs ne lô yɛn wel nɛ əb jume ɛyfim nɛ̀ əbtaawe ɛyghel nə wɛ̀, è se suuy ge ghàà əb se mom bek ge əb ne wiy wele ngoo nə ghɛsen.
39Jesus suuy ge: Ghàà ghɛn yɛ tun, bek ge, wele báà se lu wɛ əb nɛɛyen əbnəə əbchio əbyúméné əbtaawe ɛyghel nə mɛ wɛ lòó əb nɛ̂y kase yɛ suŋnen kebee kum mɛ. 40Wel wɛ əb baken wiy ghɛsen, toke ghɛsen token. 41Mɛ suuy əbluuy se ghɛn ge: Naa ndɛ wɛ əb foon əbbome moo se ghɛn bek ka ghɛn luun ghele ngoo nə Christ, jia náà buu se kiile əbmakte wen.
Wel toknen se nɛɛy ge wel jas
(Mat 18.6-9; Luk 17.1-2)
42Jesus gese suuy ge: Shi ge wel nɛɛy é wel se ɛtɛlɛɛ ghine ghɛ ɛ́ foon ɛytem se mɛ nɛɛy mbee, é ke yɛ jof se wen ge ɛ́ chəŋ ɛytiye keban ɛyghuye ɛ wene kendoŋ, è tin se kechem keghuye. 43Loo lu keghoo kiɛ lobte wɛ̀ ge wɛ̀ nɛɛy mbee, wɛ̀ ten è maay. Ke jofe se wel se lii ɛychii yɛ ɛy jia yî mɛy ki keghoo kemok chia ka əb yɛ ki ɛghoo ɛbaa è lii nɛ lu kemboo əbvəs wɛ əb fuon əbliy əbjim. 44[Lu fo nɛ kóòle sɛ se kfəlen ghene kuo wiy, nɛ əbvəs wɛ əb nyoken ghene liime wiy]. 45Yɛ lu ge kevəə ə wele nɛɛy é əb nɛɛy mbee, əb ten. Ke jofe se wel se lii ɛychii yɛ ɛy jia yî mɛy ki kevəə kemok chia ka əb yɛ ki ɛvəə ɛbaa ɛ́ mak wen se kemboo əbvəs. 46[Lu fo nɛ kóòle sɛ se kfəlen ghene kuo wiy, nɛ əbvəs wɛ əb nyoken ghene liime wiy] 47Ɛyshiɛ ə yiɛ lòò è yɛ lofte wɛ̀ ge wɛ̀ nɛɛy mbee, yɛ jof ge wɛ̀ mɛn. Ke jofe se wel se lii se ɛysak nə Feyine ki kɛn ɛyshiɛ ɛymok chia ka əb yɛ ki ɛshiɛ ɛbaa ɛ́ mak wen se kemboo əbvəs. 48Lu fo nɛ kóòle sɛ se kfəlen ghene kuo wiy, nɛ əbvəs wɛ əb nyoken ghene liime wiy.
49Əbvəse náà nɛyte wel əbjim kɛn ka fengwaŋe sɛɛ nɛyte mbase ntaŋle.
50Fengwaŋe lu kefaa kejuŋe dî nɛ fe lòò è jia gese yɛ lem, é jii jia bo yɛ lu yɛ wɛ̀ nɛɛy é fe kase yɛ lem.
Ghɛn me yɛ lem yi ka fengwaŋ, è yɛ chii kejuŋ ghɛne ghele.
Currently Selected:
Mak 9: oku
Highlight
Share
Copy
Want to have your highlights saved across all your devices? Sign up or sign in
©CABTAL, 2012