Mat 12
12
Kenəə kɛ kum kechii ɛybam
(Mak 2.23-28; Luk 6.1-5)
1Ko se lu ɛ keleŋ əbliy fo, Jesus se chia ɛylem ɛsaŋ ɛylee ɛ kechii ɛybam nɛ̀ jeŋ yafe ghon-ɛyfɛl nə wen, ghene me se kole əbtuu ɛsaŋ, fiksee, kfəle ɛshiɛ ten. 2Ghele kenone Falisee yɛn kenəə ten, è suuy se Jesus ge: Yɛn-a! Ghon-ɛyfɛl nə wɛ̀ nɛɛy kenəə kɛ ɛysake báà beeme ge ɛ́ nɛɛy ɛ kechii ɛybam.
3Jesus fise ge: Ghɛn nè bɛɛy ghàà jaŋ kenəə kɛ David nè nɛɛyen ɛ əbliy wɛ jeŋ nè yafen ghene ghel ɛyjɛl nə wen-a? 4Əb lɛ nè báà lii ɛ ndaa-ɛykokse Feyin, è liɛ keban kɛ ɛ́ nè taŋlen Feyin so, ghene yiɛ, keban nɛ ɛysake nè báà beeme ge lòò wen kene ghel ɛyjɛl nə wene yiɛ, nɛ lòó yiɛ kɛn ghɛ́ ntaŋle-a? 5Moo ghɛne bɛɛy ghàà jaŋ ka ɛysake Moses dinen ge ghɛ́ ntaŋlee loo fɛl ɛ ndaa-ɛykokse ɛ kechii ɛybam ghàà ɛysake ghal ghene-a? 6Mɛ suuy əbluuy se ghɛn ge, wel lu fɛn wɛ kenəə ə wene chian kɛ́ ndaa-ɛykokse. 7Ŋwaale-Feyine suuye ge: “Mɛ koŋe ge wel yɛ chame wel əblee, chia nyam sɛ yɛ taŋle mɛ so.” Ghɛn nè bóy se yɛ ke kenəə kɛ keleŋ kine suuyen fene ghɛn nè báà se ghame ghel ghɛ ɛ́ báà se ki jas. 8Ke lu dî bek ge Wanwel lu Báàba ə kechii ɛybam.
Jesus chuk wel ɛ kechii ɛybam
(Mak 3.1-6; Luk 6.6-11)
9Jesus nɛy lòò se fo, è ndu se ngay ɛyjem yɛ ntɛk fo. 10Nè lu dî nɛ wel əblee lu fo nɛ keghoo ə wene kuomen. Ghel ɛlee bif se Jesus ge: Ke lɛ lu ɛ titiy ge wel chuk wel ɛ kechii ɛybam-a? Bife dì ka ɛ́ kooy kenəə kɛ ɛ́ toy wen so. 11Jesus fise ge: Wel se ghɛn lɛ ki bvəy njiɛ, ɛy too se ɛybee ɛ kechii ɛybam é əb jia guf, è fəyse-a? 12Wele mesoŋ lɛ báà se chia bvəy njiɛ-a? Ɛysake dì dine ge ke jofe se nɛɛye njuŋ ɛ kechii ɛybam. 13Əb me suuy se wel vi ge: Nate keghoo ə kiɛ. Əb nate, ke me kase bonen è me se lu kɛn ka kelee. 14Ghele kenone Falisee fəy, è ndu è se chio ntaŋ kum jii yɛ ɛ́ yuy Jesus ɛ ten.
Nè chok Feyin Jesus se wel ɛyfɛl
15Jesus keele ge ɛ́ chio ntaŋ se yuye yi, è me lòò se fo. Ngose wel lòò ɛ wen ɛybam, əb se chuke nduu nɛ̀ ghɛ ɛ́ nè yafken, 16è me chiise se ghene ge ghene yɛ ke se nɛɛy nɛ wel yio kenəə kɛ kum yi. 17Kii nɛ̂ kine nè gan se nɛɛy ge kenəə kɛ wele ntum nə Feyine wɛ Ezaya nè suuyen kwɛn. Əb nè suuy ge:
18“Vin lu wel ɛyfɛl nə mɛ wɛ mɛ nè choken,
vi wɛ mɛ koŋen, nɛ gese lu wen wɛ mɛ saŋlen bek wen.
Mɛ nɛ̂y tinse Keyioy ə kom se wen
é əb yɛ fekte se əbtume ka mɛ nɛ̂y sak ghene.
19Əb jia nɛ̂y yɛ fekte ghane yole ghene ghele
è jia nɛ̂y yɛ ghan ɛ jiise zəəme zəəmen.
20Əb jia nɛ̂y yɛ yɛne ngɛk nɛ ɛy ngvənlen əb mɛyse bɛk,
è jia nɛ̂y yɛ limse kekaaken kɛ ke banen lifle lifle.
Əb nɛ̂y yɛ taŋen se chin se əbliy wɛ əb nɛ̂y yiɛ mbi è fo ɛysake yɛ titiye.
21Əbtum əbjime nɛ̂y yɛ chii ki ɛykwaate bek wen.”
Əbtaawe ə Jesuse báà lòò se Satan
(Mak 3.20-30; Luk 11.14-23)
22Ghel ɛlee me gwiy nɛ̀ kechichi se Jesus, nɛ ko gese lu kenfef, nɛ nɛɛy ɛyfim ge əb ghàà yɛ suŋnen. Jesus chuk; kechichi ki me se suŋnene gese yɛne əblik. 23Ghel ɛjim ghɛ ɛ́ nè luun fo yɛn è se lu nɛ̀ əbchíò əbyúméné kante ge: Lɛ lòó yɛ lu ge vin lu wán ə David-a?
24Ghele kenone Falisee ɛlee yio, è suuy nɛ lu ge: Əb jume ɛyfim kɛn nɛ̀ əbtaawe wɛ foon Beelzebul wɛ luun əbfon ɛyfim.
25Jesus keele ɛykwaate ə ghen, è suuy se ghene ge: Naa ketum kekɛ kɛ ke giabsen, è yɛ lu əbnkakten əbnkakten, gese noo ngeŋse lu nɛ ke jia nɛ̂y teem, nɛ ntɛk ɛykɛ kene ɛyshaa ndaa giabsen è yɛ lu əbnkakten əbnkakten, gese noo ngeŋse ghen lu nɛ ɛy jia náà teem. 26Satan lɛ lòò è yɛ jume Satan ke fene ke dine ge əb giabsenmen ngeŋ ə wen giabsen. Ke lòò è yɛ lu dî é ɛysak ə wene teem lɛɛy? 27Lòò è yɛ lu ge mɛ jume ɛyfim nɛ̀ əbtaawe nɛ foo Beelzebul fene ghele ə ngoo nə ghɛne jume nɛ̀ əbtaawe ndɛ-ɛ? Kenəə kɛ ghele ngoo nə ghɛne nɛɛyen, dine ge ghɛne báà se suuye əbluuy. 28Ɛngaŋ, dì foo Keyioy ə Feyin əbtaawe ge mɛ yɛ jum ɛyfim so. Kii nɛ̂ kine lu se din ge ɛysak ə Feyine shi ɛ ghɛne məm.
29Lòó wel jia kol ndaa ə wel əbtaa è lii è liɛ əbfua ə wen, buu ge əb kɛɛte kul wen, əb kul dì é əb me choŋ əbfua ə wen.
30Naa ndɛ wɛ əb báà se lu ghɛse wen lu nɛ əb noo mɛ noon, nɛ naa ndɛ wɛ əb báà se giamten mɛ se baate lu nɛ əb takse taksen. 31Mɛ me se suuy se ghɛn ge wel nɛɛy naa mbee ɛykɛ, kene əb tɛy Feyin naa ɛ jii ɛy kɛ, é Feyine lɛyse se wen, dî nɛ wel tɛy Keyioy Kelanene é Feyine jia yî lɛyse se wen. 32Wel suuy kenəə kebee kum Wanwel, é Feyine lɛyse se wen, dî nɛ wel suuy kenəə kebee kum Keyioy Kelanene, é Feyine jia yî lɛyse se wen ɛ mbi lan gese nɛ se mbi yɛ ɛygwiyen.
Ɛ́ keele fekak se əmtam mɛ fe koom ɛ ten
(Luk 6.43-45)
33Fekak fejuŋe fejime koom əmtam əmjuŋ, nɛ fekak febee fejime koom əmtam əmbee. Ɛ́ sɛɛ keele fekak se əmtam mɛ əm koom ɛ ten. 34Ghɛn lu ghone yiose, lòó ghel əbnəə əbbee ka ghɛn lɛ jia yɛ suuy əbnəə əbjuŋe bek ge kenəə kɛ ke fəyen ɛ wel əbchio lu kɛ ke lunen ɛ wen ɛytem. 35Wele loo lu wel əbjuŋ, ɛytem ə wene lun nɛ̀ njuŋ, əb yɛ suuy əbnəə əbjuŋe. Loo lu wel əbbee, ɛytem ə wene lun nɛ̀ mbee, əb yɛ suuy əbnəə əbbee.
36Mɛ suuy se ghɛn ge ɛ́ náà loo lu ɛ kechii nsak, é wel əbjim yɛ lu se taŋle əbchio ə wen ɛ ɛyshiɛ nə Feyine kum əbnəə lólò əbjim wɛ əb nè suuyen. 37Feyine náà yɛ liɛ əbnəə wɛ əb fəyen ɛ wel əbchio sake wen so, se yɛn ge əb sɛ lu nɛ əb fɛy nsak moo əb báà fɛy-a.
Jesus tɛn se nɛɛy kenəə əbchio əbyúméné
(Mak 8.11-12; Luk 11.29-32)
38Ghɛ́ ɛydinte tesak ɛlee ghene ghele kenone Falisee ɛlee me suuy se Jesus ge: Ndinte, ghɛse kɛŋe ge wɛ̀ nɛɛy kenəə əbchio əbyúméné.
39Əb sɛy fise ge: Ghɛne ghɛ́ ntem fɛne lu ghel ɛbee, kokse wiy Feyin. Ghɛne kɛŋe ge mɛ nɛɛy kenəə əbchio əbyúméne-a? Kenəə əbchio əbyúméné di wiy kɛ Feyine nɛɛy se ghɛn bak kɛn kɛ əb nè nɛɛyen se wele ntum nə wen wɛ Jona. 40Ka Jona nè chiin ɛ səə ɛyghaken əblɛɛ se əbchii əbtal lu ghɛɛ-ghɛɛ ka Wanwel náà chii ɛ məme ntiɛ se əbchii əbtal. 41Ɛ́ náà loo lu ɛ kechii nsak, ɛ́ ghele Nineve teem è gham ghele ghɛ́ ntem fɛne bek ge Jona nè lô fekte kenəə ə Feyin, ghene yio, è kubsen tetem ə ghen. Mɛ suuy se ghɛn ge, wel lu fɛn wɛ kenəə ə wene chian kɛ́ Jona. 42Ɛ́ náà loo lu ɛ kechii fo, é no ə ntoke Sheba teem, è gham ghele ghɛ́ ntem fɛne bek ge əb nè lô lòò naa əbtəm è gwiy se yiote əbnəə əbfee wɛ Solomon nè dinten. Se lu nɛ wel lu fɛn wɛ kenəə ə wene chian kɛ́ Solomone.
Ɛyfime kase fiile ɛy yɛ chɛf
(Luk 11.24-26)
43Loo lu əbliy wɛ keyioy ɛyfime fəyen se wel əbghun, ke yɛ jɛl ɛ əbkwak əbyume kɛŋe bene fɛ ke bɛɛ. Ke kɛŋ è jia yɛn, 44ke me suuy se ngeŋ ə wen ge: Mɛ kase fiile se mɛ ndaa yɛ mɛ kè fəyen ɛ ten. Ke fiile, è yɛn nɛ ndaa nɛ̂ yì lu ɛyyum nɛ ɛ́ nɛyte ɛy se laanee, 45ke me ndu, è gwiy nɛ̀ əbyioy ɛyfim əblee saamba nɛ əb befe chia wen, ghene me lii è yɛ chii fo. Ɛychii wele ten me yɛ befe chia naa ka ɛy nè luun se mbiy. Ghɛy ka ke náà gan se ghele ghɛ́ ntem fɛne ghɛ ɛ́ befen lɛ.
Loote lu ghe ndɛ nkante no ə Jesus nɛ̀ ghone-no ə wene?
(Mak 3.31-35; Luk 8.19-21)
46Se lu nɛ Jesus bo suŋnene se ghel ghii, no ə wen ghene ghone-no ə wen wɛ Jesus gwiy, è teem ɛ bɛy è se kɛŋe se suŋnen se wen. 47[Wel əblee me suuy se wen ge: Yɛn-a! No ə viɛ ghene ghone-no ə viɛ tiy ɛ bɛy kɛŋe se suŋnen se wɛ̀].
48Jesus fise ge: No ə wom lu ndɛ? Ghone-no ə wome lu ghe ndɛ? 49Əb nase keghoo è lom ghon-ɛyfɛl nə wen, è suuy ge: Yɛn-a! Lɛɛ no ə wom ghene ghone-no ə wome. 50Naa ndɛ wɛ əb nɛɛyen kenəə kɛ Ba ə wom wɛ əb luun ɛ ɛyyio kɛŋen lu lumse ə yom, nɛ̀ jɛmte ə yom gese nɛ̀ no ə wom.
Currently Selected:
Mat 12: oku
Highlight
Share
Copy
Want to have your highlights saved across all your devices? Sign up or sign in
©CABTAL, 2012