Luk 2
2
Ɛybii ə Jesus
(Mat 1.18-25)
1Nè lu əbliy wɛ ɛ́ nè biin Joon ɛ ten, Augustus wɛ əbfon ə Lûm chiase nchil ge ghel ɛjim ghɛ ɛ́ nè chiin ɛ əbtum wɛ əb nè luun ɛ ɛyshaa ɛysake yɛ̂ ɛylake Lûme ndu è nyak teghel ə ghen se ŋwaale ə kentaŋ. 2Kine nè lu kentaŋe kɛ́ mbiye se liɛ kelik. Nè lu ɛ əbliy fo nɛ Kwɛlinius sake Silia. 3Ghele yio di, è me nduke se ghene ntɛkse, ɛ́ nyak teghel ə ghen se ŋwaale kentaŋ.
4Josɛf lòò sɛy ɛ Nazalet ɛ Galilee, è ndu ɛ ntɛk yɛ ɛ́ nè biin əbfon wɛ David ɛ ten, nɛ ɛ́ toŋte ge, Betlehem ɛ məme Judea, bek ka əb nè luun wel ɛykfəə nə David. 5Əb nè nduu fo ghene Mɛɛle wɛ kensiyse nè luun ge əb nɛ̂y yɛ lu wiy ə wen. Ghene nè nduu kentaŋ kin di nɛ Mɛɛle lu nɛ̀ əblɛɛ. 6Se lu ka ghene nè luun ɛ Betlehem, əbliye me kwɛn wɛ Mɛɛle bii. 7Əb me bii wán ə wene wɛ̂ mbiy, nɛ lu wán əbluumen. Ɛ́ limte wen nɛ̀ ndəyse, è nyiŋse wen se kenək kɛ nyamse sɛɛ yiɛ ɛ ten, bek ka kelike nè báà se lu se ghene ɛ kebɛɛle.
Nchiyse ndaa nə Feyine fekte ɛybii ə Jesus se Gayse
8Se lu kɛn nɛ ntəke fo, nɛ gay selee lu əbkwak ɛ ɛyghaŋe Betlehem toknen nɛ̀ bvəyse ghene. 9Nchiy-ndaa-Feyin me tum è fəy ɛ ghene ɛyshiɛ, ɛyban ə Feyine ban ɛ ghene ɛybee. Ghene me se fane naa se ŋaŋ. 10Nchiy-ndaa-Feyin yi me suuy se ghene ge: Ghàà ghɛn yɛ fan. Mɛ gwiy nɛ̀ ntum ɛyjuŋ yɛ ɛy gwiy nɛ̀ ɛysaŋlee ɛyghakene se wel əbjim. 11Ɛ́ biimen Mboyse ɛ ntɛk nə əbfon wɛ David ɛ kechii kɛ́ lane. Əb lu Vi wɛ Feyine nè Yiosen. Əb lu Báàba. 12Əbchəyte wɛ ghɛne nɛ̂y yɛn se geese keele ge wan nɛ̂ vin lu wán wɛ mɛ suuyen lu ge, ghɛne nɛ̂y yɛn wán nɛ ɛ́ limte nɛ̀ ndəyse, è nyiŋse ɛ kenək kɛ nyamse sɛɛ yiɛ ɛ ten. 13Ka əb suŋnen è mɛyse ɛ leghɛ, ghene sasen, è me yɛn nɛ nchiy-ndaa-Feyin yi shi fo ghene selee naa se ɛydio, yeme njàŋ ɛykokse se Feyine, suuye ge:
14Ɛykokse lu se Feyine ɛyyio,
nɛ̀ ɛyzəəte lu ɛ ketuu ntiɛ,
se ghel ghɛ Feyine koŋen.
15Nchiyse-ndaa nə Feyine shii yem dî è kase se fiile se ɛyyio ɛ leghɛ, gay shii me suuy se ngeŋse ghene ge: Ghɛsen diaŋ ɛ Betlehem, è yɛn kenəə kin kɛ ke ganen, kɛ Feyine nɛɛyen ghɛsen keele. 16Ghene me fɛɛ-fɛɛn nɛ̀ kenyiŋene, è diaŋ ɛ Betlehem, è yɛn Mɛɛle ghene Josɛf, è gese yɛn wán ka ɛ́ nyiŋsen wen se kenək kɛ ɛ́ sɛɛ yíɛ́se nyamse ɛ ten. 17Se lu ka ghene yɛnen wán vi di, ghene me kɛɛte è se fiɛl əbnəə əbjim wɛ nchiy-ndaa-Feyin kè suuyen se ghene kum wán nɛ̂ vin. 18Ghel ɛjim ghɛ ɛ́ nè yion sakghɛ ten wɛ gay shii nè fiɛlen nè lô se lu nɛ̀ əbchíò əbyúméné. 19Se lu se Mɛɛle, nɛ əb yio əbnəə nɛ̂ vin naa əbjim, è lɛm se wen ə ɛytem, è se kwaate kum əbghene naa se ŋaŋ. 20Gay shi me kase fiile, è se yeme kokse Feyin se əbnəə wɛ ghene nè yion, è gese yɛn, nɛ əb lu kɛn ɛyghɛl ka nchiy-ndaa-Feyin nè suuyen se ghene.
21Se lu ɛybam əbchii ɛyfaame se ka ɛ́ biin wán nɛ̂ vin, ɛ́ me nɛyte wen, è chio ɛyghel ə wen ge Jesus, kɛn ɛyghɛl ka nchiy-ndaa-Feyin nè foon nɛ no ə wen geese chia nɛ̀ əblɛɛ ə wene.
Ɛ́ Ndu nɛ̀ Jesus se Ndaa Ɛykokse Feyin
22Əbliye nɛy me kwɛn wɛ ba ə wan ghene no ə wane lanse ngeŋse ghen, kɛn ka nchil ə Moses nè chioten bek wán wɛ ghene nè biin. Josɛf ghene Mɛɛle me liɛ Jesus, è kok nɛ̀ wen se ndaa-ɛykokse Feyin, ɛ Jolesalem, se foo wen se Bay Feyin, 23nɛ lu ka ɛ́ nè nyaken ɛ ŋwaale-Feyin ge: “Wel bii wáne wɛ̂ mbiy nɛ lu wán əbluumen, fene əb lu se lose wán ten se fo se Bay Feyin.” 24Ghene gese fo sɛy ɛytio se Feyine, se kase se yɛ lu kelaanen ɛ ɛyshiɛ nə Feyine, kɛn ka ɛysak ə Bay Feyine nè dinen. Ɛysake tene nè dine ge: Lòó wel fó əbnlal əbbua, kene ngvəə sebaa.
25Nè lu əbliy fô nɛ wel əblee lu ɛ Jolesalem nɛ ɛ́ toŋte ge, Simeon. Wel nɛ̂ vin nè lô se nɛɛy əbnəə wɛ Feyine koŋen, kokse wen əbliy əbjim, chiyte əbliy wɛ Feyine nɛ̂y koosen ɛysen se ghel ɛylake Islael, nɛ Keyioy Kelanene lu ɛ wen ə ɛytem. 26Nè lu dî nɛ Keyioy Kelanene kak wen ge, əb jia náà kuo buu ge əb yɛn Vi wɛ Bay nè Yiosen. 27Se lu ka Josɛf ghene Mɛɛle nè nduun nɛ̀ Jesus se ndaa-ɛykokse, se nɛɛy əbnəə vin ka ɛysake dinen, Keyioy Kelanene nɛɛy ge Simeon ndu se ndaa-ɛykokse fo kɛn əbliy fo sɛy. 28Əb ndu è chin fo, è me fii wán ten, è koyten è se foo ɛykokse se Feyine, suuye ge:
29Oo Báàba, wɛ̀ lu nɛ wɛ̀ lunse nkakma ə yiɛ san,
nɛ koŋ é wɛ̀ vəse mɛ,
wɛ wel ɛyfɛl nə wɛ̀ ɛ leenen,
é mɛ kuo nɛ̀ əmnyiaŋe.
30Mɛ lu nɛ mɛ loote yɛn nɛ̀ ɛshiɛ ə ghome,
ka wɛ nɛ̂y boyse ghel. 31Wɛ̀ siysemen mboyse, è tinsen ka lòó wel əbjim yɛn.
32Əb lu kekaaken se əbtume
ka lòó ghene keele wɛ̀,
nɛ̀ əb nɛ̂y lose ɛyghele ghel ə ghiɛ ghɛ́ Islael.
33Josɛf ghene Mɛɛle yio kenkaa kɛ Simeon nè kaan ɛ wan ə ghene ketuu, əbchio yúm ghene. 34Simeon fó ɛybose se ghene, è suuy se Mɛɛle wɛ no ə wan ghan ge: Yɛn-a, wan vin lu nɛ chok Feyin, nɛ əb nɛ̂y nɛɛy é ghele Islael loole se ɛydio, è nɛɛy é ɛlee səəke səəken. Əb nɛ̂y gese yɛ lu əbchəyte wɛ əb lòòn se Feyine, nɛ ndio ghele náà tunse wen. 35Ka ghene tunse wen dì, é tekwaate ghen tɛ ghene leten ɛ ghene tetem me yɛnsen ɛ ndan. Ɛysene wan ə viɛ vine nɛ̂y nɛɛy, é ɛytem ə yiɛ yɛ koo di ka ɛ́ soo nɛ̀ fefiake.
36Nè lu ɛ əbliy fo nɛ əbvii əblee lu ɛ Jolesalem nɛ ɛ́ toŋte ge, Anna, nɛ lu wele ntum nə Feyine. Əb nè lu wán ə Fanuel, wɛ wel ɛykfəə nə Asha. Əbvii nɛ̂ vin nè lu nɛ əb ngɛsenmen naa se ŋaŋ. Ghene lum ə wen nè chii kɛn nguk saamba, lum ə wen me kuo. 37Əb me se lu wiy ə nkfə se yiake ka əb nè chinen nguk njio-sekɛɛk əmfaame, è jia yi gok se ndaa-ɛykokse naa kechii kemok, nduu, foo ɛykokse se Feyine nɛ nchuy gese nɛ ntəke, bame əbfua-əbyíɛ́ne, jeme. 38Se lu kɛn ka Simeon nè suŋnen se Josɛf ghene Mɛɛle, əbvii vi me kokte gwiy, è bɛ̀ɛ̀lè Feyin, è suŋnen kum wán wɛ Jesus se ghel ɛjime fo ghɛ ɛ́ nè chiyten əbliy wɛ Feyine nɛ̂y fəyse Jolesalem se ngɛkse.
39Josɛf ghene Mɛɛle mɛyse nɛɛy naa əbnəə əbjim, kɛn ɛyghɛl ka ɛysak ə Báàba Feyine dinen, è me kase fiile se ghene ntɛk, ɛ Nazalet ɛ ɛybee Galilee. 40Jesus kuy, è se lu wán əbtaa, nɛ ɛytofe lun se wen ə ketuu, nɛ Feyine gese koŋe wen naa ɛ jii ɛylee ndun.
Wan wɛ Jesus ɛ Ndaa Ɛykokse
41Ba ə wen ghene no ə wen nè sɛɛ nduu ɛ Jolesalem nguk sejim, se yiɛ Kechii Ɛyboyse. 42Jesus nɛ̂y chin nguk njio-sebaa ɛyvəm, ghene ba ə wen nɛ̀ no ə wen ndu ɛ Jolesalem se yiɛ Kechii Ɛyboyse, ka nchiinen ɛylak nə ghen nè dinen. 43Ɛ́ mɛyse ɛyyiɛ Kechii Ɛyboyse ki, Josɛf ghene Mɛɛle loo fiile se Nazalet, Jesus me gok ɛ Jolesalem, nɛ ba ə wen ghene no ə wen ke wiy. 44Ghene jɛl se kechii keful ko ke ge wan lu ɛ ghene kenon, è nɛ̂y loo kiy ɛ məm nə ghele ndaa nə ghene, gese nɛ̀ sunse ghene, 45è jia yɛn wen, è me kase fiile, è ndu è se kɛŋe wen ɛ Jolesalem. 46Əbchii chia əbtal ghene yɛn Jesus, nɛ əb diom ghene ndintese ɛ ndaa-ɛykokse, è se yiote əbnəə wɛ ghene dinten, gese bifte tebif se ghene. 47Ghel ɛjim ghɛ ɛ́ nè yioten əbnəə ə wen gese nɛ̀ tefise ə wene nè lô se lu nɛ̀ əbchíò əbyúméné ka əb loote keen əbnəə, gese fise tebif kejuŋ. 48Ka no ə wen ghene ba ə wen yɛnen wen, keləme gwɛl ghene, no ə wen bif se wen ge: Wan ə wom, wɛ̀ nɛɛy ghɛ kin se ghɛs lɛ? Ghɛse ba ə viɛ kè luŋe kɛŋe wɛ̀ naa se ŋaŋ.
49Jesus fise ge: Ghɛn kè kɛŋe mɛ se ghɛ? Ghɛn kè báà se ke ge mɛ kè lu se yɛ lu ɛ ndaa nə ba ə wom fɛn-a? 50Dî Josɛf ghene Mɛɛle jia keele kenəə kɛ əb nè suuyen se ghene.
51Jesus ghene no ə wen, nɛ̀ ba ə wen me lòò, è chio se Nazalet. Jesus se yionen se ghene naa kejuŋ. No ə wen se ki ɛykwaate əbnəə wɛ əb nè suuyen ɛ wen ɛytem. 52Jesus ko me se lu, kuye se kechak əbghun, gese kuye se wen ɛytof, nɛ Feyine koŋe wen, nɛ ghel ghɛ ɛ́ nè keen wen gese koŋe wen.
Currently Selected:
Luk 2: oku
Highlight
Share
Copy
Want to have your highlights saved across all your devices? Sign up or sign in
©CABTAL, 2012