LUCAS 5
5
Achca chalhuacunata japishcami
(Mt 4.18-22; Mr 1.16-20)
1Shuj punllami Jesusca Genesaret cucha c'uchupi carca. Chaipica achcacunami Diospaj Shimita Jesús huillajpi uyangapaj shamushpaca, t'angarinacushpa paita llapimucurca. 2Chaimantaca chushajlla ishqui barcocuna yacu c'uchulla uripi cajtami, Jesusca ricurca. Chalhuata japijcunaca barcocunamanta uriyashpami, linchicunata tajshacurcacuna. 3Jesusca chai barcocunamanta shuj barcopimi yaicurca. Chai barcoca Simonpajmi carca. Jesusca Simontaca:
–Cai barcota allpamanta ashata caruyachipai– nijpimi, ashata caruyachirca. Jesusca chai barcopi tiyarishpami tucui chaipi cajcunata yachachirca. 4Ña tucui yachachishpaca Simontaca:
–Barcopi chaupi cuchaman rishpa, chalhuacunata japingapaj linchicunata shitaichij– nijpimi, 5Simonca:
–Yachachij, tucui tuta trabajashpapish ima chalhuata mana japircanchijca. Can nishcamanta linchita shitashpa ricusha– nishpami shitarca.
6Paicuna shitajpi yallitaj chalhuacuna jundajpi, linchica lliquiri callarijpimi, 7shujtaj barcopi cajcunata tauca tucushpa surcungapaj shamuichij nishpa maquihuan cayajpi shamushpaca, ishqui barcocunapish huashicusha nijta jundachircacuna. 8Chaita ricushpa Simón Pedroca Jesuspaj ñaupajpi cungurishpami:
–Mandaj Jesús, juchasapa runami cani, ñucamanta anchuripai– nirca.
9Chashna achca chalhuacunata japishcamantaca Simonpish, tucui paihuan cajcunapish achcatami mancharircacuna. 10Zebedeopaj churi Jacobopish, Juanpish Simonhuan purijcunami carca. Paicunapish chaita ricushpaca achcatami mancharircacuna. Chaimi Jesusca, Simontaca:
–Ama manchaichu. Canca cunanmantaca chalhuata japij shinaca runacunata ñucapajman pushamujmi cangui– nirca.
11Chaimantaca barcocunata allpaman c'uchuyachishpa tucuita saquishpa Jesusta catishpa rircallacunami.
Leprahuan caj runata Jesús alliyachishcami
(Mt 8.1-4; Mr 1.40-45)
12Shuj pueblopi Jesús cajpimi, cashna tucurca: Leprahuan apiyashca shuj runami ricurirca. Paica Jesusta ricushpaca, cungurishpa pambacama cumurishpami:
–Amito, ñucata alliyachisha ninguipishchari– nijpi, 13Jesusca, maquita chutashpa tuparishpaca:
–Ari, alliyachisha ninimi– nincami, lepra ungüica paimanta anchurca. 14Canta pi alliyachishcataca pajta piman huillanguiman nishpami Jesusca:
–Ri, curapajpi ricuchirigri. Can alliyashcamantaca Moisés mandashcapi nishca shina cugri. Chashna rurajpimi curacunaca can alliyashca cashcata yachangacuna– nircami.
15Jesús alliyachicushcaca huashan huashanmi ashtahuan ashtahuan uyarirca. Chaimantami Jesús huillashcata uyanaman, ungüimanta alliyachichunpish yallitaj achcacuna tandanacumurcacuna. 16Ashtahuanpish Jesusca paicunamanta caruyashpami pi mana causan chulunllapi Diosta mañagrij carca.
Mana cuyurij runata Jesús alliyachishcami
(Mt 9.1-8; Mr 2.1-12)
17Shuj punlla Jesús yachachicujpica, fariseocuna, mandashcacunata jatun yachachijcunapish chaipimi tiyacurcacuna. Paicunaca Galileapi, Judeapi caj tucui uchilla llajtacunamanta, Jerusalenmantapishmi shamushcacuna carca. Ungushcacunata alliyachinapajca Jesusca Jatun Diospaj poderhuanmi carca. 18Chaimanca mana cuyurij shuj runatami, huandunapi huandushpa apamurcacuna. Paicunaca, Jesús yachachicun ucuman yaicushpa paipaj ñaupajpi churanatami yuyarcacuna. 19Chai huasipica achcacuna junda cajpimi, maita mana yaicui tucushpa, huasi jahuaman huichiyashpa, huasi c'atata anchuchircacuna. Chaitami huandumushcallapitaj ungushcataca tucuicunapaj chaupiman uriyachishpa, Jesuspaj ñaupajpi churarcacuna. 20Jesusca paicuna crishcata ricushpami, ungushcataca:
–Cambaj juchacunataca ñami perdonani– nijpi, 21mandashcacunata quillcajcuna, fariseocunaca: “¿Caica pi cashpataj Diosta p'iñashpa c'amicunchu imamí? Pitaj juchacunataca perdonai tucungari. Diosllamari perdonai tucun” nishpa yuyacurcacuna.
22Chaita yuyacujta yachashpami, Jesusca:
–¿Ima nishpataj cancunapaj shungupica chashna yuyacunguichij? 23“¿Cambaj juchacunataca perdonashcami” ninachu, mana cashpaca: “Jatarishpa puri” ninachu, imata ninataj ashtahuan jahualla canga? 24Runa Aichayuj tucushca ñucaca cai pachapi causajcunapaj juchacunata perdonai tucuj cashcataca cunanmi ricuchisha– nishpaca, (mana cuyurij runataca):
–Cantaca cashnami nini: ¡Jatari, canta huandumushcata apashpa, cambaj huasiman ri!– nirca.
25Chashna ninca paicuna ricucujllapitaj jatarishpaca, paita apamushca huanduta aparishpami, paipaj huasiman Diosta sumajmari cangui nirihuan rirca. 26Chaipica tucuicuna mancharinacushpami, Diostaca sumajmari cangui nircacuna. Paicunaca manchaihuan junda cashpami:
–Cunanca mancharinacunatamari ricushcanchij– nircacuna.
Leví runata Jesús cayashcami
(Mt 9.9-13; Mr 2.13-17)
27Jesusca chaimanta llujshishpaca, tributota japij Leví tributota japinapi tiyacujtami ricurca. Paitami:
–Ñucata cati– nirca.
28Levica jatarishcahuanmi tucuita saquishpa Jesusta catirca.
29Levica paipaj huasipi Jesusta chasquishpami jatun micuita rurarca. Chaipica, tributota japij achcacunapish, shujtajcunapishmi paicunahuan mezapi micucurcacuna. 30Chaimantami mandashcacunata quillcajcuna, fariseocunapish yachacujcunataca:
–¿Ima nishpataj tributota japijcunahuan, juchayujcunahuanca micucunguichij, ubyacunguichij?– nishpami, juchachishpa rimarcacuna.
31Chaimi Jesusca:
–Mana ungushcacunaca jambijtaca mana mashcanchu, ungushcacunallami mashcancuna. 32Ñucaca cashcata rurajcunataca mana cayaj shamurcanichu. Ashtahuanpish juchayujcuna Diosman cutirichunmi cayaj shamurcani– nirca.
Ayunanamanta tapushcami
(Mt 9.14-17; Mr 2.18-22)
33Jesús chashna nijpimi paicunaca:
–Bautizaj Juanpaj yachacujcunapish, fariseocunapaj yachacujcunapish ayunacunllacunami, Diosta mañacunllacunami. ¿Ima nishpataj cambaj yachacujcunaca mana chashna rurashpa micucunllacuna, ubyacunllacuna?– nircacunami.
34Jesusca cashnami nirca:
–¿Cancunaca cazarana bodaman cayashcacunataca, novio paicunahuan cajpica ayunachinguichijchari? 35Ashtahuanpish novio ña mana paicunahuan cajpimi, compañajcunaca ayunangacuna– nircami.
36Yuyachij shuj parlohuanpishmi cashna nirca:
–Pipish mushuj churanata p'itishpa mauca churanataca mana llachapanchu. Chashna rurashpaca, mana mushuj churanallata lliquishpa llaquichinchu. Mushujpish maucapica mana alli ricurinmanchu. 37Shinallataj mushuj vinotaca, mauca capachucunapica pi mana churanchu. Chashna churajpica chai mauca capachucuna tugyajpi, vinopish capachucunapish chingarinmanmi. 38Ashtahuanpish mushuj vinotaca mushuj capachucunapi churajpimi caishujpish, chaishujpish mana chingaringa. 39Pipish p'ucushca vinota ubyajca, llulluraj vinotaca mana ubyasha ninmanchu. “P'ucushca vinomi ashtahuan alli” ninmanmi– nircami.
Currently Selected:
LUCAS 5: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.