2 REYES 24
24
1Joacim mandacui huatacunami Babilonia llajtata jatun mandaj Nabucodonosorca, Judá llajtapi causajcunahuan macanacungapaj paipaj soldadocunandij huichiyarca. Joacimca Nabucodonosorpaj ucupi tucushpami quimsa huatacunata paipajta rurashpa causarca. Chashna causacushpapish Joacimca Nabucodonosorta c'ariyanata yuyarishpami jatarirca. 2Mandaj Diosca paipajta ruraj profetacunaman judacunataca llaquichishatajmi nishca shinallataj llaquichingapajmi Caldeo soldadocunata, Sirio soldadocunata, Moab soldadocunata, Amón soldadocunata Joacimpajman cacharca. 3Manasés tucui imalla juchacunata rurashpa Mandaj Diosta yallitaj p'iñachishcamantami judacunata paipaj ñaupajmanta anchuchingapaj chai llaquicunata Mandaj Dios cachajpi chai llaquicunaca shamurca. 4Ashtahuancarin manapish ima mana allita rurajcunapaj yahuarta jichachishpa Jerusalenpi yahuarta jundachishcamantapishmi, Mandaj Diosca judacunataca mana perdonashpa chashna llaquitaca cacharca.
5Joacim ashtahuan imallata rurashcata, tucui pai imallata rurashcata ashtahuan yachasha nishpaca Judá llajtata jatun mandajcuna imallata rurashcata quillcashca libropimi ricuna. 6Joacim paipaj ñaupa yayacunahuan dormijpica, paipaj randica paipaj churi Joaquinmi mandarca.
7Egipto llajtata jatun mandajca, Egipto jatun yacumanta, Éufrates jatun yacucama pai charicushcataca, Babilonia llajtata jatun mandaj tucui quichujpimi, Egipto llajtata jatun mandajca paipaj llajtamantaca manataj llujshij carca.
Joaquinta pai churashca mandajcunatapish Babiloniaman prezu apashcami
(2 Cr 36.9-10)
8Joaquinca, Judá llajtata mandai callarinapajca chunga pusaj huatayujmi carca. Paica quimsa quillallatami, Jerusalenpi mandarca. Paipaj mamaca, Jerusalenllapitaj causaj Elnatanpaj ushushi, Nehusta shutimi carca. 9Joaquinca, paipaj yaya tucui laya millaita rurashca shinallatajmi, Mandaj Diospaj ñaupajpica, millaita rurarca.
10Pai mandacui huatacunami, Babilonia llajtata jatun mandaj Nabucodonosorpajta rurajcunaca, Jerusalenpi causajcunahuan macanacungapaj huichiyashpa pueblo muyujta shayarircacuna. 11Babilonia llajtata jatun mandaj Nabucodonosorca paipajta rurajcuna Jerusalenta muyunchishca cajpimi chai puebloman chayarca. 12Chaimi Judá llajtata jatun mandaj Joaquinca, paipaj mamandij, paipajta rurajcunandij, pai churashca mandajcunandij, caishuj mandajcunandij Babilonia llajtata jatun mandajpajman rishpa cambajta rurashunllami nishpa paiman curirca. Chaipimi Babilonia llajtata jatun mandajca paicunata prezu japirca. Babilonia llajtata jatun mandaj pusaj huatata ña mandacujpimi chashna tucurca.
13Chai q'uipaca Mandaj Diospaj huasimantapish, mandashpa tiyana huasimantapish tucui imalla tiyashca achca valijcunatami llujshichirca. Israelcunata jatun mandaj Salomón Mandaj Diospaj huasipaj curimanta tucui imalla rurachishcacunatapish tucuitami p'aquirca. Mandaj Dios nishca shinallatajmi pajtarca. 14Jerusalenpi causajcunataca tucuicunatami prezu aparca. Chaicunaca mandaj cachun churashcacuna, tucui c'ari c'aricuna, imatapish ruranata yachajcuna, herrerocuna, tucuimantaca 10.000 runacunatami prezu aparca. Shujllapish mana saquirircachu huajchacunallami saquirircacuna.
15Nabucodonosorca jatun mandaj Joaquintaca, paipaj mamandij, paipaj huarmicunandij, pai churashca mandajcunandij, Judá llajtapi causaj achcata charijcunandijmi Jerusalenmanta Babiloniaman prezu aparca. 16Alli macanacunata yachajcunaca 7.000 runacunami carca. Imatapish ruranata yachajcuna, herrerocunaca 1.000 runacunami carca. Tucui c'ari c'ari runacunata, macanacui tucuipaj runacunatapish tucuicunatami Babilonia llajtata jatun mandajca prezu aparca. 17Chai q'uipaca, Babilonia llajtata jatun mandajca, Joaquinpaj tío Mataniastami Joaquinpaj randi jatun mandaj cachun churarca. Mataniastaca, Sedequiastami shutichirca.
Judá llajtata Sedequías mandashcami
(2 Cr 36.11-16; Jer 52.1-3)
18Sedequiasca, Judá llajtata mandai callarinapajca ishqui chunga shuj huatayujmi carca. Paica chunga shuj huatatami, Jerusalenpi mandarca. Paipaj mamaca, Libna pueblomanta caj Jeremiaspaj ushushi, Hamutal shutimi carca. 19Sedequiasca, Joacim tucui laya millaita rurashca shinallatajmi, Mandaj Diospaj ñaupajpica, millaita rurarca. 20Chashna rurajpimi Mandaj Diosca Jerusalenpi causajcunahuan, Judapi causajcunahuan yallitaj p'iñarishpaca paipaj ñaupajmanta llujshichishpa cachangacama p'iñarirca. Chai q'uipaca Sedequiasca, Babilonia llajtata jatun mandajtaca c'ariyashpami jatarirca.
Currently Selected:
2 REYES 24: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.