Zekaraya 7
7
A Ghwoku Owẹvwe Echiro ro Jẹ Otọ rẹ Evun Ete
1Ukpe rẹne rẹ Ovie Dariọs, ota rẹ Ọrovwohwo de bru Zẹkaraya rhe vwẹ ẹdẹ rẹne rẹ emeranvwe rirhiri, rọ dia Ariọn. 2Rẹ ihwo ri Bẹtẹl vwo ji Sharẹza vẹ Rejim-melek ihwo rayen, ra nọ ekpẹn rẹ ẹroesiri vwẹ obọ rẹ Ọrovwohwo, 3rẹ ayen je nọ irherẹn rẹ uwevwi rẹ Ọrovwohwo rẹ otuofovwi vẹ emraro na, Mi ji muomahọ ji chiri owẹnvwe vwẹ emeranvwe riyori, kirobo mi ruru vwẹ ikpe buebu ye? 4Etiyin ota rẹ Ọrovwohwo rẹ otuofovwi na de bru uvwe rhe; 5Ta ke ihwo rẹ otọ na ejobi kugbe irherẹn na, Ọke re ovwan vwo chiri owẹnvwe ji muomahọ vwe emeranvwe riyori veẹ ọrighwrẹ, vwẹ ikpe ujorha gbe ihwe nana, mẹvwẹ ovwan chiro kẹ? 6Ọke rẹ ovwan vwọ re rẹ ovwan vwọ da ye, e dia oma rẹ ovwan ovọ ovwan re da kẹ-ẹ? 7Ọke ra vwọ dia Jerusalẹm ro vwo vwo erhuvwu, re irere rọye vwọ gba yariẹ phihọ, re vwo yere obọhwẹre ọnre vẹ igo rọye, enana dia eta rẹ Ọrovwohwo wan oma rẹ emraro rẹsosuọ ta-a?
Jeọghọ Emuo Ọye Ghwa Ighuvwu Rhe
8Ota rẹ Ọrovwohwo de bru Zekaraya, ta ne, 9E nẹ Ọrovwohwo rẹ otuofovwi tare, Eru omamọ rẹ ọrhiẹn, we ru uruemu esiri vẹ arodọvwẹ ke dohwo domoni rọye, 10we shenyẹ ayeuku-u, we shenyẹ ọmọphrorivwi-i we shenyẹ ọrharha-a, eyẹ ogbere-e, e jẹn ohwo ovuọvo jẹ iroro umwemwu kpahe omoni rọye vwẹ udu rẹ ovwa-an. 11Ẹkẹvuọvo ayen kerhọ-ọn ayen de si igabọn te ohọre, rhurhu erhọn rayen re ayen je nyo. 12Ayen de ru udu rayen gangan kerẹ oragha ayen de rhe nyo urhi vẹ eta rẹ Ọrovwohwo rẹ otuofovwi na rọ wan oma rẹ Erhi rọye vwo ji emraro rẹsosuọ na. Eriyin na ophu rode de nẹ obọ rẹ Ọrovwohwo rẹ otuofovwi na rhe. 13Ri mi vwo se, ayen nyori-i na, ọtiọye na re ayen rhe ji vwo se mi rhe ji nyo-o, Ọrovwohwo rẹ otuofovwi rẹ tarọ, 14Me da vwẹ odju rẹ ovwre vwo hra ayen ro ohri rẹ ẹgborho rẹ ayen riẹnre-e kọye otọ rẹ ayen nuru da rhe dia ofefe, ọtiọye na ohwo rha yanrhe yankpo vwọ-ọ, otọ esiri na da rhe dia ofefe.
Currently Selected:
Zekaraya 7: UBV77
Highlight
Share
Copy
Want to have your highlights saved across all your devices? Sign up or sign in
Bible in Urhobo © United Bible Societies, 1977.