Zekaraya 11
11
1Rhie ẹchẹ wẹn, E Lẹbanọn, rere erhanre
vwọ ghwọrọ igedu wẹn!
2Beroma, E owangha kidie igedu she nure
kidie irhe ri vwo urinrin na guọghọre!
Beroma, ehahe ri Bashan,
kidie eshe egbo rode na nure!
3Kerhọn, re ọmaebere rẹ isuigegede na,
kidie a ghwọrọ urinrin rayen re!
Kerhọn, rẹ ekpere rẹ ikpohrokpo na,
kidie oghwaghwo ri Jọdan ghwọrọ totọ re!
Erharhe rẹ Isuigodẹ
4E nẹ Ọrovwohwo Ọghẹnẹ mẹ na tare: Ofori rere osuigegede na vwọ re abe rẹ ehwe, 5Otu re de ayen hwe ayen ghwu ye e ru ayen emu-u; otu re shẹ ayen je ta nẹ, Ebruba kẹ Ọrovwohwo, mi fe nure isuigegede rayen na ni aruẹdọn raye-en. 6Kidie mi gbi che nẹ aruẹdọn ke ihwo rẹ otọ nana ọfa-a, Ọrovwohwo re tarọ. Nighe, mi ru ihwo rẹ ọvuọvo de she tehe obọ rẹ osuigodẹ rọye, re ọvuọvo de she tehe obọ rẹ ovie rọye, ayen ke guọghọ akpọ na, mi che sivwi ọvuọvo nẹ obọ raye-en.
7Ọtiọye Me rhe dia osuigegede rẹ igodẹ re reabe rẹ ughwu na vwọ kẹ otu rẹ chua eki rẹ igodẹ na. Me reyọ ekpọ ivẹ; mi de se ọvo Ẹserọphẹ, ọrivẹ mi de rhe se okugbe. Me da ghẹrẹ igodẹ na. 8Vwẹ emeranvwe ọvo Me da ghwọrọ isuigegede erha. Ẹkẹvuọvo mi gbi se chirako raye-en, ayen da vwẹ ovwẹ ru ọvweghrẹ. 9Ọtiọye na Me da ta, Me gbe dia osuigegede rẹ ovwa-an. Emu ro che ghwu, e jo ghwu; emu rọ cha ghwọrọ. e jọ ghwọ-rọ, jẹn ayen ihwo ri chekọ ohwohwo ghwọrọ ohwo 10Me da reyọ ọkpọ Mẹ re se Ẹserọphẹ, mi de vwirho ro miovwi ọphọ ri mi nene ihwo na re jovwo na. 11Ọtiọye e miovwiro vwẹ ẹdẹ yena ineki rẹ igodẹ, otu re rhẹrẹ ovwẹ jovwo na, riẹnre nẹ ọye ota rẹ Ọrovwohwo. 12Etiyin Me da ta kẹ ayen, ọ da dianẹ emu ro fori kẹ ovwan, wa gba hwa esa mẹ kẹ vwẹ; ẹkẹvuọvo o gbi fo-o, wa gba da ayen ji. Ayen da vwanvwe osa mẹ shẹkẹl ọgban rẹ idọnọ ọfuanfọn. 13Etiyin Ọrovwohwo da ta kẹ vwẹ, Phio phihọ asan ra da yọnrọn igho na–unuigho rẹ ayen hwa kẹ vwẹ na. Eriyin Me da reyọ shekẹl ọgban rẹ idọnọ ọfuanfọn na mi de phi ayen phihọ asan ra da yọnrọn igho vwẹ uwevwi rẹ Ọrovwohwo na. 14Etiyin o de vwirhi ọkpọ Mẹ rivẹ re se Okughe, rẹ imoni re herọ vwẹ uvwre ri Juda vẹ Izrẹl.
15Etiyin Ọrovwohwo da ta kẹ vwẹ, Rhoma reyọ ekuakua rẹ osuigegede ro je fo na. 16Kidie gbe nighere, Me vwẹ osuigegede ọvo mu vwẹ otọ na rọ cha kerhọn rẹ igegede ri ghwẹ na-a, eye ke guọnọ e re yan ghwrẹ na-a, eyẹ ki sivwi ri ghwu awọ na-a, eye ke ghẹrẹ erẹ oma ganre-e. Ẹkẹvuọvo kọ ria otu rẹ oma ronri, savwe ephiẹ rayen nẹ ayen awọ.
17Ekan kẹ osuigegede Mẹ rọ je fọ na,
ọ rọ djẹ jẹ igodẹ vwo na!
E jẹn ọlọkọ nyavwọ ugbobọ
vẹ ẹro rẹ obọrhe rọye!
E jẹn rọye sida, rẹ ubiẹro rẹ obọrhe rọye rhu.
Currently Selected:
Zekaraya 11: UBV77
Highlight
Share
Copy
Want to have your highlights saved across all your devices? Sign up or sign in
Bible in Urhobo © United Bible Societies, 1977.