JOB 40
40
1Mandac Dios Jobta rimashpaca:
2«¿Canca tucuita ruhuac Dios-huanchu
cariyashpa chimbapurasha ningui?
Maijanpish Dios-huan chimbapurasha
nishpaca caicunatami
cutichina can» nirca.
3Chaimantami Jobca Mandac Diostaca:
4«Mandac Dioslla,
ñucaca imapish mana canichu.
¿Imatatac cantaca nishayari?
Chaipac randica ñuca maquihuanmi
shimita jarcarini.
5Ñucaca ñami cutin cutin rimashcani.
Ña mana ashtahuan
rimasha ninichu» nirca.
Mandac Dios Jobta cutin rimashcamanta
6Mandac Diosca jatun acapana chaupimantami Jobta rimashpaca:
7«Cunanca alli chumbillirishca shina
ñuca tapushcata
cutichingapac allichiri.
8¿Ñuca nishcataca yangatachu
ruhuasha ningui?
¿Canca jucha illacmi
cani nishpachu,
ñucatarac juchanchisha ningui?
9¿Canca, ñuca shinachu
sinchi rigrayuc cangui?
¿Can rimashcaca ñuca rimashca
shinachu culun nishpa uyarin?
10Shina cashpaca jatun cashcahuan
sumacta allichiriyari.
Sumaimana cashcahuan,
alli nishca cashcahuan churariyari.
11Yallita piñarishpa rimariyari,
jatun tucushcacunatapish
tucuita chingachiyari.
12Cambac ricuillahuan jatun
tucushcacunata cumurichiyari.
Diosta mana manchaccunataca,
paicuna tiyacuc pushtullapitac saruiyari.
13Tucui mashnata allpahuan
enterraiyari.
Ñahuicuna ama ricuchunpish
amsapi huichcaiyari.
14Shina ruhuacpica, ñucallatacmi
cambac alli maquica imatapish
ruhuacmi can nisha.
15Huagra shina quihuata micuc
Behemot animaltaca canta
shinallatacmi ruhuarcani.
16Paica lomopipish,
huicsa carapipish
achca fuerzatami charin.
17Paipac chupaca cedro
caspi shinami sinchi.
Changa angucunapish
ahuashca shinami.
18Tullucunaca bronce shina sinchimi.
Changacunaca fierro barreta shinami.
19Ñucami paitaca tucui
animalcunamanta yalli
cachun ruhuarcani.
Paitaca ñucallami
espadahuan huañuchi pudini.
20Urcucunapi tiyac quihuacunaca paipacllami.
Chaipimi tucui sacha
animalcunapish purincuna.
21Paica jatun sacha ucupimi
samaringapac siririn.
Guzu allpapi huiñashca totora
ucupimi miticun.
22Jatun yuracunami paitaca llandun.
Yacu uraipi tiyac sauce
yuracunapimi pillurin.
23Jatun yacu yallita
mirarishpa talliricpipish
mana mancharishpa callpanchu.
Jordán yacu paipac shimiman
shamucpipish mana manchanchu.
24¿Pitac pai ricucucpica,
japi pudinga?
¿Pitac paitaca singata
jutcui pudinga?
Currently Selected:
JOB 40: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.