JUECES 18
18
Dan aillucuna Micaías curata japishcamanta
1Chai punzhacunaca Israel llactapica jatun mandacca mana tiyarcachu. Shinallatac Dan aillupish, Israel aillupurapica paicuna causangapac allpataca manarac japircachu. Chaimantami chai punzhacunapica maipi causanata mashcacurca. 2Shina mashcacushpami Dan aillupac miraicunaca pichca runacunata allpata ricushpa, ricsishpa shamuchun cacharcacuna. Paicunaca Zora pueblomanta, Etaol pueblomanta paicunapac aillupura alli sinchi runacunatami cacharca. Chashna cachashpaca:
—Chai llacta ima shina cashcata ricumugrichic— nirca.
Chai runacunaca Efraín urcuman chayashpami Micaiaspac huasipi pacarirca. 3Micaiaspac huasi ladopi cashpami chai runacunaca levita mosotaca rimashcapi ricsircacuna. Chashna ricsishpami paipacman cuchuyashpaca:
—¿Pitac cantaca caiman apamurca? ¿Imatatac caipica ruhuacungui? ¿Imatac ruhuangapactac caiman shamurcangui?— nishpa tapurcacuna.
4Shina tapucpi paica:
—Micaiasca allicunata parlanacushpami cura cachun caipi saquichirca— nirca.
5Shina nicpimi, chai runacunaca:
—Ñucanchic ricushcaca alli cashcata yachangapac Taita Diosman tapushpa cuiyari— nirca.
6Shina nicpimi, chai curaca:
—Cancunata Mandac Diosmi cuidashpa pushacun, ama manchashpa cushilla richiclla— nirca.
7Chashna rishpami chai pichca runacunaca Lais puebloman chayarca. Chaiman chayashpami chai gentecunataca Sidón pueblopi causaccuna shina cushilla ima llaqui japinata mana manchashpa, yangalla causaccunata ricurca. Chai llactapica pi llaquichicpish, pi mana allita ruhuacpish mana tiyarcachu. Sión pueblomanta carupimi causarcacuna. Pihuan ima rimanacunatapish mana charircacunachu. 8Paicuna Zora puebloman, Etaol puebloman cuticpimi paicunapac huauquicunaca:
—¿Ima tiyanchu?— nishpa tapurcacuna.
9Shina tapucpi paicunaca:
—¡Chai allpataca ricugrircanchicmi. Chai allpaca sumacmi cashca. Chaimanta jatarishpa chai allpata quichungapac huichai rishunchic! Cancunaca ima nishpatac casilla saquiringuichic. Chai llactata ñucanchic japingapac utca jacuchiclla. Ama upalla saquirichicchu. 10Chai llactaman chayashpaca ima llaquitapish mana yuyarishpa causac gentecunapacman chayashpami, achca allpata ricunguichic. Chai allpatami Taita Diosca ñucanchic maquipi churashca. Chai llactapica tucui cai pachapi tiyacmi tiyan.
Danpac aillucuna Levitata apashcamanta
11Shina nicpimi Zora, Estaol pueblomanta Dan aillucunaca sucta patsac soldadocunahuan macanacungapac macanacunata apashca llucshirca. 12Shina huichai rishpa Judá llacta Quiriat-jearim pueblopimi inti tigrana ladoman carpa huasicunata shayachishpa tiyarircacuna. Chaimantami cunan punzhacaman chai pambaca Dan aillupac carpa huasicuna shayachina pamba shuti can. 13Chaimanta rishpaca Efraín urcuta rishpami Micaiaspac huasiman chayarca. 14Chaiman chayashpaca Lais llacta muyundita ricungapac ric pichca runacuna paicunapac huauquicunaman parlashpaca:
—Caipica shuc efodpish huasipi charina dioscunatapish, cullquita yacuyachishpa, caspita llacllashpa ruhuashca diospish tiyanmi. Chaicunataca ¿Imatatac ruhuagringuichic?— nirca.
15Chaiman rishpaca Micaiaspac huasipi causac levita mosopacman cuchuyashpami saludarca. 16Danpac aillumanta sucta patsac soldadocunaca macanacunata apashcami pungu yaicunapi shayacurcacuna. 17Chai levita cura macanacuna apashca sucta patsac soldadocunahuan pungu yaicunapi shayacucpica llactata puringapac ric pichca soldadocunaca Micaiaspac huasiman yaicushpami huasipi charina dioscunatapish, cullquita yacuyachishpa, caspita llacllashpa ruhuashca diostapish, aparca. 18Shinami chai runacunaca Micaiaspac huasiman yaicushpa huasipi charina dioscunata, cullquita yacuyachishpa, caspita llacllashpa ruhuashca diostapish, efodtapish, apacucta ricurca. Shina ricushpami chai curaca:
—¿Imatatac ruhuacunguichic?— nirca.
19Shina nicpimi paicunaca:
—¡Cambac shimita maquihuan jarcarishpa upallai! Ñucanchic taita shina, cura cangapac ñucanchic-huan jacu. ¿Canmanca shuc runapac huasillapi, mana cashpaca shuc aillupac, mana cashpaca Israel aillupac cura canachu alli?— nircacuna.
20Shina nicpimi, chai curaca tucui shunguhuan cushichishpa efodtapish, huasipi charina diostapish, cullquita yacuyachishpa, caspita llacllashpa ruhuashca diostapish apashpa, paicunapac chaupita rirca. 21Chashnami huahuacunatapish, huagracunatapish, tucui charishcacunataca ñaupachishpa cutin puri callarircacuna.
22Danpac aillucunaca ña Micaiaspac huasimanta caruyacpimi, Micaiaspac huasi cuchupi causaccunaca tandanacushpa, Danpac huahuacunata catircacuna. 23Chashna rishpa Danpac aillucunata caparicpimi, paicunaca tigrarishpa Micaiastaca:
—¿Ima nishpatac cai tucui gentecunata tandachircanguichic?— nirca.
24Shina nicpimi Micaiasca:
—Ñuca ruhuashca dioscunatapish, ñucapac curatapish cancuna apacpica, ¿Ñucamanca imatac saquirin? ¿Chashna apashca jahuachu cancunaca: “¿Imatac tucunguichic?” nishpa tapunguichic?— nirca.
25Shina nicpi, Danpac aillucunaca:
—¡Caitaca ñucanchicpurapi mana ninachu canguichic! Upalla cai. Pacta ñucanchicpuramanta maijan yallita piñarishpa cantapish, cambac familiacunatapish tucuchinman— nirca.
26Dan aillucuna yallita sinchi runacuna cacta ricushpami, Micaiasca paipac huasiman cutirca. Cutin Danpac aillucunaca cutinllatac puri callarircacunami.
Dan aillupuramanta curacuna tucushcamanta
27Danpac aillucunaca Micaiaspac ima charishcacunatapish, curatapish apashpa rishpaca Lais pueblomanmi chayarca. Chaipi causac gentecunaca ima llaquitapish mana yuyashpami cushilla causacurca. Chaiman Danpac aillucuna chayashpami espadahuan huañuchishpa pueblopica ninata churarca. 28Lais pueblo Sidón pueblomanta carupi cacpi, shuctac pueblocunahuan mana ricsinacuc cacpimi paicunataca pi mana ayudac shamurca. Chai puebloca Bet-rehob pueblo cuchullapi tiyac pambapimi carca. Quipaca cutinllatac chai pueblota shayachishpami chaipi causai callarircacuna. 29Chai pueblotaca paicunapac taita Danta yuyarishpami Danta shutichircacuna. Shina cacpipish utcamanca Lais shutimi carca. Danca Israelpimi huacharirca.
30Chai pueblopimi Danpac aillucunaca alli ningapac caspita llacllashpa diosta ruhuarcacuna. Paicunapac cura cachunca Moisespac churi Gersón runapac churi Jonatantami cura cachun churarca. Chashnami paipish, paipac churicunapish Danpac aillucunamantaca israelcunata prezu apai punzhacunacaman cura carca. 31Chashnami paicuna alli ningapac Micaías ruhuashca diosta Diospaclla carpa huasi Silo pueblopi tiyashca punzhacunacaman chaipi charircacuna.
Currently Selected:
JUECES 18: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.