Zakaria 7
7
1KE haba hnyi huna a vaki Dariu than, me ame o but hofuc ho Iehova kö Zakaria hnyi bong a vakiny tehi a naininy, wale Kiselu. 2Ke haba at Beth-ela adre hia but kunö Sarezera me Rege-melek, me je aten he ka khöûâ betenge ga Iehova, 3me ha ka tavat bihut hnyi uma umo Iehova tuhan sabaoth, me ka je perofeta, ka habe, Hawa, e ûcû könya he ka tenge hnyi tehi a faiviny, me ûsâkâûö helâji me hnok hna ânyâ waleji hnyi je huna ae se hia? 4Me ame o but hofuc ho Iehova tuhan sabaoth könya, me ha, ka habe, 5Ha thö ka aten hia hnyei, me ka tavat bihut, ka habe, Haba hnyi je ûen öbun e ânyâ ca han me tenge thungaû hnyi tehi a faiviny me tehi a seveniny, hnyi je huna a sevente, hawa, öbun e ânyâ ca han könya? 6Ke haba hnyi je ûen öbun e han me ic, hawa, öbun e ca han hobi köbun bi, me ic hobi köbun bi. 7Hawa, e ca ûcû köbun he ka long hofuc waleji Iehova ame ha a deny je perofeta kâû adrem, hnyi ûen adre labâ Jerusalema ke e sot, ke adre me labâ je tauniny igigilo e, me ke keihen ka hnyi Hwaiöu, me dok ae tha hon?
8Ke ame o but hofuc ho Iehova kö Zakaria ame ha, ka habe, 9Walang hna ha hnö Iehova tuhan sabaoth, haingen, ka habe, Owisa wia ju, ve omanenâ betenge me hnyok ae menyik ka je liamekeiny möbun: 10ke ca ovecâ safac me nakahme, me atkanyua, me at ae theduoc; ke ca ûnykûme eû hnyi hnyok ûnyi ae kong ka ke at. 11Ke ödra höcö long, me behânâ bajebenyidra, kʼ adre me hlöng je hnyikönyödra, mʼ adre me ca long bi. 12Eke, adre me wia je hnyekudra me me helâ me samira, mʼadre me ca long bi hnanyibu, me je hofuc ho Iehova tuhan sabaoth, waleji a kunâ hnen hanon a deny je perofeta a bân: anyin a wale ame o but hmonyin ae gan ûnyi ga Iehova tuhan sabaoth. 13Ke e ame hongot, kʼ adre me ca long bi; helâe, adre me he ka hongot ke oge me ca he bi nya ka long, haingö Iehova tuhan sabaoth; 14ke oge me he ka ovesei ödra ge höu ka hnyi je hnyei hia waleji ae ca khanʼ ödra. Me ba wan hnyei hwabödra, ke ba at ame he ehele me hmetu: anyin adre me öba wan hnyei ae hmanenang.
Currently Selected:
Zakaria 7: IAAI
Highlight
Share
Copy
Want to have your highlights saved across all your devices? Sign up or sign in
maintained by the British and Foreign Bible Society