Zakaria 6
6
1KE inya oge me bwele hmetu me wâ, ke wâ bi ame o vak ta kariota ûnyi hnyi wanben li bucen; ke haba li bucen, me li bucen bras. 2E hnyi kariota a bân li hors ae dra, ke e hnyi kariota a loiny li hors ae hlit; 3ke e hnyi kariota a kuniny li hors ae hau; ke e hnyi kariota a vakiny li hors ae sisit hûen. 4Ke oge me thu me ha ka angela at ame ûhnenamö mönya, ka habe, Tuhok lö, je ieû e? 5Ke haba angela ame thu me ha könya, ka habe, Wale je ang a vakiny drany, hnyat ödrin e he ûhedrin hnyi hna tot hnyi hnyimakan Thaniny hmeledrany. 6Ke haba kariota a e hnyin li hors ae hlit, me ame he ka hnyi hnyei hnyi hwadro; ke haba li hors ae hau, me ödru me he hotudru; ke haba li at ae sisit, me ödru me he ka hnyi hnyei hnyi hwaiöu. 7Ke haba li at ae hûen, me ödru me he me heleû he ka vheno hmeledrany: ke haingen, ka habe, He thʼ öbu ka vheno hmeledrany. Me ödru me vheno hmeledrany. 8Ke e ame hongot könya, me ha könya, ka habe, Wâ bi, haba tavat adre me he ka hnyi hnyei ka hnyi hwadrö, me adre hia but okatebo anyik hmonyin hnyi hnyei ka hnyi hwadrö.
9Ke ame o but könya hofuc ho Iehova, ame ha, ka habe, 10Hom dö hanen je bâ ûnyi hnyi lap anyi Heledai, ke Tobija, ke Jedaia; ke so u ma o hnyi bong eling me dit hnyi uma umö Josea nöku Zefania, wale ödrin e o ka hnyin ûhedrin hnyi Babulona; 11eke, hom dö ûnyi gadrin sileva me gol, me ânyâ je korona me ip hon bö Josua nöku Jozadaka at bihut ae nua; 12ke u me he ka ha kâu, ka habe, Walang hna ha hnö Iehova tuhan sabaoth, ka habe, Wâ bi at, haba ien, me Khûen; ke e ame he ka kû ûnyi hnyi hnen me op uma umo Iehova: 13ke e ame he ka op uma umo Iehova; ke e ame he ka vadren hmanenang, ke e ame he ka laba me musi hon anyin theron; ke e ame he ka at bihut hon anyin theron: ke ame he ka e bi hnyi wanbödru ûhnenamoiny ûsoköu. 14Ke haba je korona, me hobi kö Helem, me Tobija, me Jedaia, me Hen nöku Zefania, hnân oûnykûmeâ hnyi uma umo Iehova. 15Ke ame he tavat ûhedra sâkâû ka o me op uma umo Iehova, me öbun e he ka wâ a ga kunö nya köbun Iehova tuhan sabaoth. Ke ame he ka, aat e, öbun e ne long wia ifuci Iehova Khongubun.
Currently Selected:
Zakaria 6: IAAI
Highlight
Share
Copy
Want to have your highlights saved across all your devices? Sign up or sign in
maintained by the British and Foreign Bible Society