Nahuma 3
3
1EKÖLÖ ge taun ae kong ge dra! a unöngöt hia thö ge je thoi me ûkonguny; ame ca hia je hanidra. 2Ame usik osö, ke hu hwan je waengen; me je hors adre okca monu, me je kariota adre me utulut; 3tavat adre me tabö hors, kʼ ame hadröngöc ö me hele vat; ke se hia tavat adre hlingâ, ke hna ûkhöûnâ je komok ae se hia; ke ca hnân bi aû tavat adre mokcu; adre me haû hon tavat adre mokcu: 4anyin ame osehia bi ûnyi monu momo hnyi gethen ae hmanenang, tuhan hna bi khong, at ame ûco je hnyei ge anyin bi ûnyi monu, me je lap ge hnen hna bi khong. 5Haingö Iehova tuhan sabaoth, ka habe, Wâ bi, e ve inya but möu, ke oge me he ka hai ânyâm ûkhaû ka hnyi hnyimâkâm; ke oge me he ka omanenö u ka ta je hnyei ke ba ûkhaûâm, me ânyâm hmehma ka ta je dökhu. 6Ke oge me he ka khûâ hom je ûnyi ae ikiki, me okongu u, me otilö u hnân wâ. 7Ke ame he ka e bi, a haba tavat adre me ö u me adre me he ka kec gam me ha, ka habe, Iny jut wau Nineve: ie at ame he ka tenge gan? oge me he ka elâm ua tavat adre me he ka otubweli u? 8Hawa, u beönua hon No-amona, wale ame laba hnyi je wagewe, ke ame igigilo e je köiö, haba köiö ae gan, me singiny, ke haba haginy hak, me köiö? 9Aithiop me Aigupito li tang hwegien, ke ca hnân bi tulut; Futa me Lubi li at ödru me hadruo u. 10Ke so bi adre hom e, e ame he but ka hnyi hwenbâ: ke adre me sa lakudra je mendreng hnyi ta je hna saû hia gethen: ke adre me ugleköbâ anyidra tavat ae ûnyi hnathu, ke adre me ca tavat ae beönua unyidra ge je tö fao. 11U me he minya ka monu ge grâg, ke u me he ka ikhölö; ke u me he ka heleû hnabâ can je iwahnaihmiony. 12Ame he ânyâm je hnabâ ka helâ me imetâ ae hu wan a bân: adre ne jijingâ me ame he ka kolu je wan ka hnyi hnyimen at ame he ka ijem. 13Wâ bi, haba tavat hnyi wanbâm, me helâ me omomo; adre me khong laûâ je homagouleny em hnyei ka ta je iwahnaihmiony möu: kʼ adre me thong ânyâm je venyâ ge meic. 14Seköiö thö hobi kâu he ka thelingʼ u, ohwegiâ ju ânyâm je hnabâ: he thö ka hnyi kânâ ae kece, ke ututo ju dröu adre me huliwan, ohwegiâ thö hna leû veto kânâ. 15Ame he bi meic ka thung u eling; kʼ ame he hele vat ka subâ degeci u, kʼ ame he ka ön u helâ me oböu: e so u ma osehiö u helâ me je oböu, kʼ u ma osehiö u helâ me je wahamon. 16U je hia but osehia tavat ûcû unyâm hon ta je okhûiny drany: ke haba je oböu adre me okongoâ kʼ adre me ve gâ thö. 17Haba tavat adre me korona gam, me helâ me ta je wahamon, ke haba je homakan tavat unyâm, me helâ me lakon wahamon ae se hia wale adre me laba hnyi ta je hak hnyi bong ae megic, ke e ka o but seûno, me adre me gâ thö, ke ca manen bi dok adre me laba hnyin. 18Than Asuria lö, ame mokut ut tavat tuö mamoe unyâm: kʼ ame mokut minya tavat ae ûnyi hnathu unyâm: kʼ ame vese but lakem hon je bucen, ke ba at he ka ûkhacaköu Ödra. 19E ba hnân okatebo hnâm hmouca; ke kong ut hnâm aat: ke haba tavat adre me long ge bongom, me adre me khöûkhöû hnyam gam; anyin â ie at ame ca hia but labö cap kâu ânyâm hulö?
Currently Selected:
Nahuma 3: IAAI
Highlight
Share
Copy
Want to have your highlights saved across all your devices? Sign up or sign in
maintained by the British and Foreign Bible Society