Mataio 8
8
1KE e ame ölö but ûheny hon bucen, me haba tavat ae se hia adre me he hoton. 2Me wâ bi, ame o but kâu ke lepera me khudrung ju kâu, me ha, ka habe, Taböny Than lö, u je ne bewem, me khatö u he ka osoi nya. 3Me e ame inâ but hnyamen me kâlâ, me ha; ka habe, E bewek; u je so but. Me ame ie hia but hnân lepera. 4Ke haba Iesu ame ha kâu, ka habe, Wâ eâu, ca ha ka ke at; ke he thö, omanenö u bi ka at bihut, me ham bwihlany a hûna Mose, hnân haten ohnathoâ ködrin.
5Ke ame o but Iesu ka hnyi Kaperenauma, me ame o but kâu ke keneturio me khöû kâu, 6me ha, ka habe, Taböny Than, haba athnyabaik ame mokulec mok a mat eiö hnyin uma, ke vec gan hmâ. 7Ke e ame ha kâu, ka habe, Oge ma he, ka osoâ e. 8Haba keneturio ame thu me ha kâu, ka habe, Taböny Than, iny ca ûcû mʼ u me he ka dit ka hnyi umök uma: ke so bi u me he ka ha thibi ke hofuc, me me he ka möt ut athnyabaik. 9Anyin a inya bi at ame long musi, ke e hu gak ta je soja: ke inya oge me ha ka ke at, He thö, me, e ame he; me ka ke at, Aiö u, me, e ame he könya; me ka athnyabaik, Ânyâ thö e, me, e ame ânyâ. 10A long ut Iesu, me e ame lâiâ, me ha ka tavat adre me he hoton, ka habe, E hnathu, inya oge me ha köbun, inya oge me ca wâ hnyi Isaraela labageju ae gan a helâe. 11Ke inya oge me ha köbun, ka habe, E se hia tavat adre me he ka he ûhedra jimeyö me jimeû he ka tha laba me Aberahama, me Isaaka, me Jekob, hnyi dökhu hnyi drany: 12ke haba lakon dökhu, me adre me he ka obʼ ödra ka hnyi menekholom hnyou ai: kʼ adre me he ka tenge sesebila eling me ûgiö ga nyudra. 13Ke haba Iesu ame ha ka keneturio, ka habe, He thö, ke adre me he ka ânyâ hobi köu e ûcû me ânyâm labageju. Me ame so but athnyabainy hnyi ûen cici eling.
14Ke ame o thö Iesu ka hnyi uma umo Peteru, kʼ ame wâ hinyen âiân ame mokulec mok ae kahwa. 15Me e ame kâlâ hnyamen momo, me ame hia but kahwa; me ame todrö momo, kʼ ame bi huliwa kâu. 16Ke hnyi sahac ödrin e hom kâu tavat ae se hia a dilic ödra demoni: me e ame obâ je hanu ge hwan hofuc, me osoâ ta je mok hia: 17me me hwâdâ hna ha hnö Isaia perofeta, ka habe, E ame ka hom hnöta ta je sēnyin, kʼ ame vadren ta je mekita.
18Ke haba Iesu ame wâ tavat ae se hia igigilö e, me e ame ûkhûnöng he ka he ka hnyi ke keihen. 19Ke ame he ke at sihnalimen, me ha kâu, ka habe, At Ûne lö, oge me he ka he hotom ka hnyi dok u me he ka he ka hnyin. 20Ke haba Iesu ame ha kâu, ka habe, Haba ta je alope, me hu hnödra hnyi kânâ, ke haba ta je meno ame ga ethö, me hu haûödra; ke haba bi Nokon at, me ba hnân omokulec ban hnyin. 21Ke haba ke aten ame ha kâu, ka habe, Taböny Than, me hnö nya but mʼ inye bök ka konim cica. 22Ke haba Iesu ame ha kâu, ka habe, He hotuk, ke hamen ta je komok he ka konâm ta je kokidrin.
23Ke e ame ölö ka hnyi hon galu, me haba laten adre me he hoton. 24Ke wâ bi ame o but boûdet ae gan eû hnyi köiö, kʼ ame khutu takoû but hu hnen köiö: ke e ame mokut. 25Me ödrin e he me bwebwelâ e, me ha, ka habe, Taböny Than lö, omeli otin dö; otin e he but ang ka mok. 26Me e ame ha ködrin, ka habe, Ieû gabun öbun e ot hnyat labageju ûhnyûkong? Me e ame todrö, me thawâ ang me köiö; me ame ta but hau ae gan hmâ. 27Haba tavat ödrin e lâiâ me ha, ka habe, Ehö at ang, ame long kâu köiö me ang? 28Ke e ame khop dö hnyi ke keihen, hnyi hnyei iny at Gadara, me ame ûkhanö mē li at a dilic ödru demoni, ödru me he ûhedru hnyi je erkemok, ödru ti hwege monu, wale, me me ba at ame vheno gethen eling. 29Ke wâ bi ödru me kuku goranyai, me ha, ka habe, Ieû gam köhmu Iesu a Nokon Khong? u je o but ang he ka oveci ohmu, ke tiga ca ûen bi? 30Ke eling e sâkâû gadrin hna hat buaka ae se hia adre me han tot. 31Haba je demoni adre me khöû kâu, me ha, ka habe, U je ne he ka obʼ ohmun, ö u hnʼ ohmun dut he ka delec hna hat buaka. 32Ke e ame ha ködrin, ka habe, He thʼ öbun. Ke ödrin e dit ut, me delec hna hat buaka: ke wâ bi, haba hna hat buaka hia thithö adre me wadring ut jime thö ban hwatapkolu ka hnyi köiö, me adre me mokcu. 33Ke ame kec dö hnyat ödrin e tuö me he ka hnyi taun, me ûthumetu ge ta je ûnyi hia, me hna ânyâ ka li at a dilic ödru demoni. 34Me wâ bi, ame he but aten taun hia thithö he ka iouny me Iesu: ke adre me wâ ju, me adre me khöû kâu he ka hna but je hnyigöulödra.
Currently Selected:
Mataio 8: IAAI
Highlight
Share
Copy
Want to have your highlights saved across all your devices? Sign up or sign in
maintained by the British and Foreign Bible Society