Mataio 5
5
1E AME wâ tavat ae se hia, me e ame ölö thö ka hnyi bucen: ke hnyi ûen e ame la ba, me ame o kâu laten: 2me e ame khetâ me nʼ ödra, haingen, ka habe,
3Hnahic hnen tavat ae theduoc hanudrin, anyin a hobi kodra dökhu dokhon drany.
4Hnahic hnen tavat adre me tenge, anyin a adre me he ka otubweli ödra.
5Hnahic hnen tavat ae ilemuk: anyin adre me he ka hu hnyei.
6Hnahic hnen tavat adre me bean ke beijem hwakecin ae wisa; anyin adre me he ka osekuni ödra.
7Hnahic hnen tavat adre me betenge: anyin adre me he bi ka betenge kodra.
8Hnahic hnen tavat ae kalaöt hnyekudra, anyin adre me he ka wâ Khong.
9Hnahic hnen tavat adre me öûsoköuâ: anyin adre me he ka hai ödra me lakon Khong.
10Hnahic hnen tavat adre hia but oveci ödra can hwakecin ae wisa: anyin a hobi kodra dökhu dokhon drany. 11Hnobun hnahic e ka he tavat ka û öbun me oveci öbun, me haikongu öbun, me bai thoi öbun ge ta je ûnyi hia can inya. 12Senyin dʼ öbun me hobâ: anyin ae gan hmâ hwaböbun ethö hnyi drany; anyin a helâe adre me ovecâ ta je perofeta a bân.
13Öbun ang sâltiny hmeledrany, ke a ne ba but hinyin sâlt, me adre ma kâmâu he ka öhinyâ hmetu e? e ca so hmetu bi, ke so bi he ka degec me uto ju ge at. 14Öbun e melaminy hmeledrany. E ca khana he ka iyong taun adre ip hon bucen. 15Ke adre me ca vâc lamepa he ka ip hmelen kumete, ke so bi ethö hon taben; me ame omelamâ tavat hia eiö hnyin uma. 16Helâ ju e öbun, omelamâ thö melamibun hnyi hnyimakan tavat, mʼ adre me wâ anyibun ta je huliwa ae so, mʼ adre me he ka ogânâ Kamöbun ethö hnyi drany.
17Ca he öbun ka ûnykûme a oge me o but he ka ohia hnanyibu me ta je perofeta: oge me ca o but he ka ohia, ke so bi he ka ohwâdâ. 18Anyin ae hnathu inya oge me ha köbun, a gʼ ame ca he bi ka hia ke iota, ame ne ke ong ûnyi ae ûhnyûkong hmonyin ûnyi hnyi hnanyibu, ke ne o but ame he ka hia drany me hmeledrany, me me he ka hwâdâ ta je ûnyi hia thibut. 19Anyin a wale, haba at ame he ka hanyâûâ khaca hnyi ta je hnanyibu eang ae ûhnyûkong hmonyin, kʼ ame nâ tavat he ka helâe, me adre me he ka ha oûhnyûkongo e hnyi dökhu dokhon drany: ke haba at ame he ka vheno me nâ, me adre me he ka ogânâ e hnyi dökhu dokhon drany. 20Anyin a inya oge me ha köbun, ka habe, A ne ca nua bi hwakecibun ae wisa hon hwakecin ae wisa ge tavat sihnalimen me je Faresaio, öbun e ca he bi ka didro ka hnyi dokhon drany.
21Öbun e hia but long hnödra hna ha kâû adrem, ka habe, Ca he ka ûhlingö; anyin a haba at ame ûhlingö me ûcû he ka owisa e: 22ke inya oge me ha köbun, ka habe, haba at ame hmonyin ka liamekeiny mē ke ba can, me ûcû he ka owisa e; ke haba at ame he ka ha ka liamekeiny mê, i ka habe, Raka, e ûcû he ka hno e hnen tavat ûhnenamö; ke haba at ame he ka ha, ka habe, Mori, me ûcû kâu meicin gena. 23Anyin a wale u je ne hom ânyâm bwihlany ka hnyi taben hut, ke u ka ûnykûme eling ae hu ûnyi ae vec gam? ka liamekeiny möu, 24mē ip ju ânyâm bwihlany cicö taben hut, ke mē he thö, ke bâm he ka ûsoköu me liamekeiny möu, me u hap he but jem ka hudo ânyâm bwihlany. 25Logotö ûsoköu me iwahnaihmiony möu, u ka tiga tha u me hnyi gethen, wâ e nye hnö u but iwahnaihmiony möu ka at owisa, ke at owisa ame hnö u but ka at tue, me e ame khûö u thö ka hnyi uma ce at. 26E, hnathu inya oge me ha köu, u me ca he ka didrut ûheny e, ke ne o but u je mē ham hwaban hia ke ne o but je ong mone ae ûhnyûkong.
27Öbun e hia but long hnödra hna ha ehac, ka habe, U ca he ka venâu âiân ke at: 28ke inya bi oge me ha köbun, ka habe, haba at ame wâ hmâ âiân ke at me behnyekon e, me a hia but bi ûnyi monu mē eû hnyi hnyekon. 29Ke a ne bi jönâm emâkâm a metâm, ûâ degecâ thö e: anyin ae so köu he ka hia ke outh unyâm, ke kong bi he ka khûâ hia unyâm hnyi gena. 30Ke a ne bi jönâm hnyamâm a metâm, subâ degecâ but e: anyin ae so köu he ka hia ke ong outh unyâm, ke kong bi he ka khûâ hia unyâm hnyi gena. 31Adre me ha minya ehac, ka habe, Haba at ame degec âiân, e so e ame he ka ham tusiny thang hna faipoipo: 32ke inya bi oge me ha köbun, ka habe, haba at ame degec âiân, kʼ ame ca bi ûnyi monu, me e ame kunâ e he ka bi ûnyi monu; kʼ ame bi ûnyi monu minya at ame hom momo e adre degec.
33Ke haba khaca, öbun e hia but long a gʼ adre ha kodra kâû adrem, ka habe, U me ca he ka khemanyin thoi, ke hamâm he ka thamuâ ka Than hnâm hna khemanyin: 34ke inya bi oge me ha köbun, ka habe, Ca khemanyin bi he ka ha ge drany, anyin a theron e anyin Khong; 35ke helâe minya ge hmeledrany, anyin a taben e li hnyeûcan; ke helâe minya ge Jerusalema, anyin a hnyaban e Than ae gan hmâ. 36Ke ca he minya ka khemanyin me ha ge bâm, anyin ae ca khanö u he ka ohawâ me ohlitâ ke leûnen bâm a khaca. 37Ke so e helâng ifucibun, ka habe, E, e; e ba, e ba: anyin a ûnyi hnyi monu he ka bi hanen hon e.
38Öbun e hia but long hnödra hna ha, ka habe, Ecmak hwaban ecmak, ke nyu hwaban nyu: 39ke inya oge me ha köbun, ka habe, Ca hagutâ at ae kong; ke haba at ame khaû wahicâm a metâm, mē wia minya thö ke keihen kâu. 40Ke a ne ke at ame beivinö möu hnyi ûhnei, kʼ ame hûgûnâ ânyâm ûkhaû, mē ham minya but kâu ânyâm ûkot. 41Ke a ne ke at ame ûjongi u he ka tha he mē hnyi ke mael, mē tha he thö mē ke ne o but hnyi lö. 42Ham but ka at ame sumatö u, ke ca hotom bi ka at ame mē sumatö ûnyi gam.
43Öbun e hia but long a gʼ adre me ha, ka habe, Betenge ju ge at ae hakekenyi u, ke ikiki thö ka iwahnaihmiony möu: 44ke oge me ha bi nya köbun, ka habe, Betenge ju ge je iwahnaihmiony möbun, ke hic ju hobi kâu tavat adre me oveci öbun; 45mʼ öbun e he bi ka lakon Kamöbun ethö hnyi drany: anyin a e ame oâ anyin seûno hon tavat ae kong me tavat ae so, kʼ ame kunâ we ka tavat ae wisa me tavat ae ca wisa bi. 46Anyin öbun e ne betenge ge tavat adre me betenge gabun, me, ieû hwaban köbun? hawa, a ca ânyâ helâe ta je telona? 47Ke öbun e ne italofa me je liamekeiny möbun thibi, me ieû ke ûnyi ae beönua hnyi hnobun hna ânyâ? hawa a ca ânyâ helâe ta je Aten ke je hnyei. 48Anyin a wale hamöbun he ka wisa helâ me iwisainy Kamöbun ethö hnyi drany.
Currently Selected:
Mataio 5: IAAI
Highlight
Share
Copy
Want to have your highlights saved across all your devices? Sign up or sign in
maintained by the British and Foreign Bible Society