Malaki 3
3
1WÂ bi, oge me kunâ anyik ûthumetu ke e ame he ka ânyâwia gethen hnyi hnyimakök: ke ame he ka ie o ka hnyi uma umen Than wale öbun e elâm; me ûthumetuiny ûhihinyköu at öbun e senyinâ, wâ bi, e ame o, haingö Iehova tuhan sabaoth. 2Ke ie at ame he ka hokhnyokâ bonginy o a e? ke ie at ame he ka tot, e ka manen dut? anyin a e ûcû me meic hlogon at ame leû fao, me helâ me sop anyin at ame hnû khaû: 3ke e ame he ka laba helâ me at le me ânyâwia sileva, ke e ame he ka obosoâ je laku Levi, me ânyâwi ʼödra helâ me gol me sileva; ke adre me he ka hudo kö Iehova je hut hnyi hwakecin ae wisa. 4Me Iehova ame he ka senyinâ hut anyi Juda me Jerusalema, helâ me hnyi je bong kâu adrem, me je huna a bân. 5Ke oge me he ka hakekeny köbun he ka owisa; ke oge me he ka ie omanenâ at ae tren khong, me tavat bi ûnyi monu, me tavat khemanyin thoi; me tavat ovecâ at ame huliwa ge hwaban e, me safac, me nakahme, me tavat ohavâ wisa ka atkanyua, me ca outö nya, haingö Iehova tuhan sabaoth. 6Anyin a inya Iehova oge me ca hwio; anyin a wale, adre ca ohiʼ öbun je laku Jekob.
7Hwân hnyi je bong bonginy je lakamöbun öbun e hna degecâ anyik je hnanyibu, me ca tuö e. Hmetu ju öbun könya ke oge me he ka hmetu köbun, haingö Iehova tuhan sabaoth. Ke haingöbun, ka habe, Ohmun e he ka hmetu ka hnyi ieû? 8Hawa, ame he at ka venâu je ûnyi anyin Khong? Ke so bi öbun e hia but venâu anyik ta je ûnyi. Ke haingöbun, Ie ûnyi öhmun e venâu gam? Wale je ke keihen a libenyitainy me je hut. 9Ame ti ohnaûhangʼ öbun; anyin öbun e venâu gak, wale hnyei hia ang. 10Hom dʼ öbun libenyitainy ae bekhöt ka hnyi uma hnân hip omjeû, me me hu han hnyi umök uma, me cubic nya ju walang ang hnen e, haingö Iehova tuhan sabaoth, oge ne ca he ka khong ut köbun je hlinginy drany, me hingâlâ hubun hnahic, ke ne o but ame ba hnen e. 11Ke oge me he ka thawâ hobi köbun at ame ohia, ke e ame ca he ka ohia jeûiny könöbun kânâ; ke ame ca he ka ba wan halebun vine hnyi ta hnyei, haingö Iehova tuhan sabaoth. 12Ke ame he je hnyei hia ka ha hnahici öbun: anyin a öbun e he ka hnyei hnân wenyâ, haingö Iehova tuhan sabaoth.
13E hwege ifucibun ûcûk, haingö Iehova, Ke haingöbun, ka habe, Ieû öhmun e ha gam? 14Öbun e hia but ha, ka habe, E ûnyi baû he ka bi athnyaba ka Khong: ke ieû troban hnöta hna tuö hnen je hna otilâ, me tenge tot hnyi hnyimakö Iehova tuhan sabaoth? 15Ke walang ang ate me he ka ha me hnahic ut at ame bi gan; eke, adre me op goranyai tavat adre me ânyâ hulö; eke, adre me cubic Iehova, ke ödra ka möt bi. 16Me ame ûhnenamököuâ tavat adre me outö Iehova: ke Iehova ame tevehlöng me long, me adre me sihnalimen tusi hnân oûnykûmeâ hnyi hnyimakan, hobi kâu tavat adre me outö Iehova, me ûnykûme ien. 17Ke haba ödra me tang omjehek, haingö Iehova, hnyi bong oge me thu; ke oge me he ka betenge gadra helâ me at ame betenge ge nokon at ame huliwa kâu. 18Me öbun e he ka hmetu me wâhmakhmetoâ at ae wisa me at ae kong, ke at ame bi athnyaba ka Khong ke at ame ca ânyâ.
Currently Selected:
Malaki 3: IAAI
Highlight
Share
Copy
Want to have your highlights saved across all your devices? Sign up or sign in
maintained by the British and Foreign Bible Society