Marko 5
5
Angaru Ye̱su̱ e̱e̱t ci anyak kuulo cik lo̱rye̱nta̱k
(Ma̱te̱yo̱ 8:28-34; Lu̱ka̱ 8:26-39)
1Etteddit nege nyatapar oot ki ti̱ti̱m wa lo̱o̱c ci een Gerasenes. 2Baling iyowa Ye̱su̱ i̱bo̱wa̱, i̱ki̱ya̱ zin e̱e̱ti̱ ci anyak kuulo cik lo̱rye̱nta̱k ilomete, orong ki̱ki̱ya̱ kurumto ki nonno. 3Abak e̱e̱ti̱ necu ilomete, iróng e̱e̱ti̱ imma uule keceb nonno udut, ming eceb ol nonno wo̱ye̱ diditaca wa een ziik nu̱nu̱n, iróng uule. 4Eci gon ba̱li̱ye̱ e̱ce̱bje̱ nonno azzina ki zo̱o̱, abarik etted diditac kar zin ku̱du̱l ziik ne̱k zoone ciginnek ko̱. I̱llo̱i̱ e̱e̱t imma ci okkomi kar keceb nonno. 5Oong enne ba̱a̱li̱n kaal ki wazin tu̱p ilomete ki biyene, kar zin gon ku̱tu̱lu̱ oroot bak etted ele cinne biyene.
6Baling edenya enne Ye̱su̱ reena, i̱vi̱ra̱k nonno kar zin kakate u̱zu̱ngtti̱ lo̱o̱c ngu̱me̱ cinne. 7Egereny zin enne muluwe ci a̱ppwe̱, “Orongi i̱nna̱ nya ngatinanni, Ye̱su̱, Ngerrti Ta̱mu̱ta̱dde̱n wa a̱ddi̱ki̱re̱? Du̱l da̱ keet zare cik Ta̱mu̱ta̱dde̱no̱ ize ne iróng atidic i̱nna̱ a̱gi̱dda̱n!” 8Izek zin Ye̱su̱ nonno ne, “Iyowa ngati e̱e̱t necu, i̱nna̱ kuuloci ci lo̱rye̱nto̱.”
9I̱jji̱n zin Ye̱su̱ nonno, “Azi zar cigunnek ne ngene?”
Abariz zin e̱e̱ti̱ ci anyak kuuloc ci lo̱rye̱nto̱ ko̱, azi ne, “Azi zar cigannik ne Legion, ma̱rri̱t ming ke̱e̱ggi̱nna̱ naga meele.” 10Ilalek zin kuuloci Ye̱su̱ izek ne, ma ottoweket lo̱o̱c imma.
11Anyak da̱ teny ci batakwanu ege biya abanyca. 12Ilalttek zin kuulo cik lo̱rye̱nta̱k Ye̱su̱ izektek ne, “To̱ne̱i̱t agit ki̱tto̱za̱ batakwa; inyet ki̱tto̱za̱ nogo.” 13Elema zin Ye̱su̱, kar zin kuulo cik lo̱rye̱nta̱k kiyokta ngati e̱e̱t neci i̱to̱zzo̱ zin batakwa. Een teny ci batakwanu ne̱ke̱ i̱bbo̱nge̱t rama (2,000), i̱rra̱ne̱ batakwana ti̱ti̱ma̱ ku̱lu̱ce̱ koot zi̱la̱ ki̱ta̱za̱k nyatapar kutuddudde do̱o̱k.
14Ma̱i̱je̱ ol wak uuwa batakwa ko̱ i̱vi̱re̱t oot u̱du̱kta̱k ol olo zoz neci, kar zin ol koot kicinnet nya ci adak batakwa. 15Baling i̱vi̱tta̱k ol Ye̱su̱, amuda abarik e̱e̱t bali gon anyak kuulo cik lo̱rye̱nta̱k ko̱ ming aave lo̱o̱ta̱, aim ru̱u̱ma̱ni̱ ju̱rru̱m, kubunna oo, kar zin ol ko̱to̱ngo̱o̱ltte̱ lo̱o̱c niko. 16U̱du̱kta̱k zin ol balik icinnet zoz neci ke̱, ol u̱gge̱ gi̱i̱ bali ogonik Ye̱su̱ e̱e̱t ci anyak kuulo cik lo̱rye̱nta̱k ke̱ ki batakwa. 17Ilalttek zin ol Ye̱su̱ abunna ming ungnek orog cinne̱ng ko̱ lo̱o̱c.
18Baling okko Ye̱su̱ ottod i̱bo̱ niko, ilalek e̱e̱ti̱ ci wanai anyak kuulo cik lo̱rye̱nta̱k ko̱ nonno, orong korkorrit ki nonno bu̱k. 19Iróng Ye̱su̱ ngen elemi, abarik a̱nne̱k ne, “Bit olo, boore wagunnek kar du̱wa̱k nogo irezi Manyi i̱nne̱t ku̱, kar gool ci amanik i̱nna̱ nonno kaanyi deten.” 20Uk zin e̱e̱ti̱ kar kakate ku̱du̱wa̱k ol o̱ro̱gjo̱we̱ cik een omoto een zara Dikapolis zoz ci u̱tu̱gu̱we̱k Ye̱su̱ nonno. U̱ku̱lte̱k zin ol do̱o̱k je̱e̱n.
Do̱le̱c ci a̱da̱k ki ngaa ci omori
(Ma̱te̱yo̱ 9:18-26; Lu̱ka̱ 8:40-56)
21Baling i̱mi̱ro̱zi̱k Ye̱su̱ i̱bo̱ kar ketted nyatapar kuk ti̱ti̱me̱ co̱de̱ ko̱, u̱lu̱tte̱ zin koole ci a̱ppwe̱ uburuktek nonno orgen. 22Kar zin ddi̱ki̱ryo̱i̱ti̱ co̱de̱ ci Ce̱e̱ze̱ wa Lawinto een Jairus i̱ki̱ya̱k nogo, ma baling icin Ye̱su̱, akat u̱zu̱ngti̱nne̱ zoone ciginnek. 23Kar zin kilalek nonno kizek ne, “Een buweenyanni wadici daizoit, a̱vvu̱ lo̱o̱k utuga. I̱jja̱ tadek a̱zzi̱t nonno ngaru kar kubunna kurug.” 24Orkorrit zin Ye̱su̱ ki nonno.
Unuwet zin koole ci a̱ppwe̱ nonno kar kuburuktek orgen. 25Aave da̱ nginati ngaa ci adak bi̱ye̱ta̱ e̱rki̱to̱k omoto ki rama, iróng bu̱k abile. 26Ippira da̱ enne we̱t ngarret zee kedeccai kaala ciginnek do̱o̱k, abarik weete kubunna, otorye morizi kize gerza. 27Baling izik enne zoz ci angaruwe Ye̱su̱ ol, i̱ki̱ya̱k enne koole kar ku̱u̱m ru̱u̱m ci Ye̱su̱ eci vu̱rrto̱. 28Eci enne i̱no̱n azi ne, “Ming ku̱u̱ma̱ zar ru̱u̱m cinne ko̱ do̱, kangaruwe niko ki̱zzi̱ morizi to.” 29Ataman niko ibilet bi̱ye̱ta̱ ne̱ke̱, a̱gga̱ enne eliya niko i̱zzi̱ pirnanet ngatinne to.
30Ma̱i̱je̱ Ye̱su̱ a̱gga̱ niko ming iyowa komizi imma eliye cinne. Utuhuwe zin enne icin koole kar ki̱jji̱no̱, “Ngene ci u̱u̱m ru̱u̱m cinanni?”
31Abarizek zin nuyaha waginnek nonno, “A̱gga̱ i̱nna̱ ming apudani ol cik meelek i̱nne̱ta̱, imma ngatu a̱jji̱nne̱, ngene ci u̱u̱mnya̱n?”
32Ma̱i̱je̱ Ye̱su̱ ereny ol do̱o̱k kar kicin ngene ci u̱tu̱gu̱ zoz necu. 33Kar ngaa ci a̱gga̱ nya ci ogonik Manyi nonno, i̱ki̱ya̱ kar kakatek u̱zu̱ngti̱nne̱ ngati Ye̱su̱, a̱bba̱ri̱t dalanzetena, u̱du̱wa̱k zin nonno zoz ci een de̱de̱. 34Izek zin Ye̱su̱ ngaa neci ne, “Buweenyanni, angaruwi i̱nne̱t tu̱we̱ne̱t cunne. Bit labak, iróng atin i̱nna̱ bo̱do̱k apirna.”
35Baling ngen Ye̱su̱ ozozi, i̱vi̱ta̱ ol uggak ce̱e̱ze̱ ci Jairusi, ddi̱ki̱ryo̱i̱t ci Ce̱e̱z wa Lawinto. Izeto zin ne, “A̱da̱k buweenyinne, ma ngen acunani de̱me̱zo̱i̱t gaganiko.”
36Ibbez Ye̱su̱ zoz ci ozoz nege ke̱, kar ku̱du̱wa̱k ddi̱ki̱ryo̱i̱t ci Ce̱e̱z wa Lawinto, “Ma o̱ngo̱o̱le̱; abunna ming a̱tu̱we̱nu̱ dee.”
37Iróng Ye̱su̱ ngen elemi ol do̱o̱k kunuwet nonno, elemi Peturu, ki Je̱mi̱s ki Jon gotoni Je̱mi̱s do̱ niko cik annu nonno. 38Baling uzuca ce̱e̱z ci ddi̱ki̱ryo̱i̱t ci Ce̱e̱z wa Lawinto, edenya Ye̱su̱ ol cik ovoce e̱le̱tti̱ lo̱o̱c, a̱lu̱ uggak oroot. 39I̱tto̱ enne ce̱e̱z kar zin kizek ol ne, “Nya ming ovocu e̱le̱tti̱ lo̱o̱c ko̱, ki u̱lu̱wa̱ necu do̱o̱k? Ngen do̱le̱c ka̱da̱k, abarik adunge labak.” 40Abarik nege aranne nonno.
Baling ottowek Ye̱su̱ nogo do̱o̱k re̱e̱nu̱n, kar zin kidima be̱e̱ti̱ do̱le̱co̱ ki yaatinne ki nuyak balik ovvo ki nonno ke̱, kar ki̱tto̱zo̱ rok nginti aave do̱le̱c. 41Odong zin Ye̱su̱ do̱le̱c azzine kar kizek ne, “Taliza kuum.” Azi ungec ci zoz necu ne, “Do̱le̱c wa dici, ka̱nne̱ki̱ ne, tinga je̱e̱na̱!” 42Ataman niko ibil do̱le̱c je̱e̱na̱, kar koto ku̱lu̱c lo̱o̱c. (Een da̱ e̱rki̱to̱wa̱ cik do̱le̱c neci omoto ki rama). A̱ma̱li̱ltte̱ ol o̱o̱tti̱ zo̱ze̱ necu oroot. 43I̱ti̱lo̱ zin Ye̱su̱ nogo gerza ming a̱du̱wa̱kku̱ e̱e̱t imma ka̱gga̱ zoz necu, kar ku̱du̱wa̱k nogo kanycik do̱le̱c gi̱i̱ kadak.
Currently Selected:
Marko 5: tex
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.