Marko 2
2
Angaru Ye̱su̱ e̱e̱t ci nganynganyi
(Ma̱te̱yo̱ 9:1-8; Lu̱ka̱ 5:17-26)
1Ma̱i̱je̱ bali i̱i̱nya̱ u̱gge̱, baling okko Ye̱su̱ i̱i̱zo̱ orog ci een Kapernaum, iziyyet ol ming i̱ki̱ya̱k enne ce̱e̱z. 2Ulutai zin ol nginati ki̱zzi̱ rok nginti arike e̱e̱ti̱ zoc, rok tatuga bu̱k reena, kar enne kuwahek nogo zoz ci Ta̱mu̱ta̱dde̱no̱. 3I̱vi̱ta̱ ol uggak, anyahak nonno e̱e̱t ci nganynganyik zoona, odonga ol cik een we̱c. 4Baling iróng nege azucane nonno Ye̱su̱ eci a̱ppwa̱ koole, etteddit zin nege loriri ta̱dde̱na̱#2:4 Loruhun ta̱dde̱n: Imma bali i̱i̱nya̱ ne̱ke̱ adiman ol ce̱e̱zi̱ cigge̱k cik anyak loruhun ci ogon ki le̱be̱le̱ ta̱dde̱na̱ kar gon nege koot ta̱dde̱na̱ loruhuna kar ku̱tu̱gu̱zzo̱ kaal cigge̱k., kar zin kodongta e̱e̱t neci kwe̱e̱na̱ kar zin kulucak ngati aave Ye̱su̱ ca̱a̱to̱.
5Baling icin Ye̱su̱ gool ci a̱tu̱we̱ nege Ta̱mu̱ta̱dde̱n, iizek zin enne e̱e̱t ci nganynganyi zoona ko̱ ne, “Ngeranni, i̱ti̱vi̱lta̱i̱ i̱nne̱t mu̱nye̱na̱ do̱o̱k.”
6I̱yo̱ko̱ aavtte da̱ de̱me̱zzo̱wa̱ uggak wak lo̱ti̱nno̱u̱ nginati, i̱no̱n nege zi̱nze̱tti̱nne̱ cigge̱k, 7“Nya ming ozoz e̱e̱ti̱ cu ki i̱yo̱ko̱? A̱wu̱l enne zoz ci Ta̱mu̱ta̱dde̱no̱. Ngene wo̱ye̱ ci alalek ol ba̱ci̱nno̱k, iróng een Ta̱mu̱ta̱dde̱n do̱ niko?”
8Ataman niko a̱gga̱ Ye̱su̱ vongize cinne zoz ci i̱no̱n nege, kar kizek nogo ne, “Nya ming i̱no̱nnu̱ niga zoz necu? 9Jang ci obokce: ka̱nne̱k e̱e̱t ci nganynganyi zoona ne, ‘Alalei Ta̱mu̱ta̱dde̱n i̱nne̱t mu̱nye̱n cigunnek,’ icima ‘Tinga je̱e̱na̱, lu̱c kwe̱e̱n cunne bito’? 10Abarik korongi ki̱ye̱le̱u̱ng abunna ming a̱gga̱yyu̱ anyak Ngerrti E̱e̱to̱#2:10 Ngerrti E̱e̱to̱: Awu Ye̱su̱ ele cinne azi ne, ke̱e̱ni̱ enne Ngerrti E̱e̱to̱. I̱ye̱la̱ zoz necu azi ne, een enne Ki̱ri̱sto̱, alaan ci ba̱a̱li̱ne̱t ci abak udut. IkebDaniel 7:13-14. doiz lo̱o̱ta̱ ngatu ci alalneke ol mu̱nye̱n.” Izek zin enne e̱e̱t ci nganynganyi zoona ko̱ ne, 11“Ka̱du̱wa̱ki̱n, tinga je̱e̱na̱, dima kwe̱e̱n cunne, bit ce̱e̱za̱.” 12Itinga e̱e̱ti̱ neci je̱e̱na̱ kar ku̱lu̱c kwe̱e̱n cinne kar koto kicinnet ebere do̱o̱k. A̱ma̱li̱ltte̱ ol ne̱ko̱ do̱o̱k o̱o̱tti̱ kar kinnatit Ta̱mu̱ta̱dde̱n, kizeto ne, “Ngen kicinnta gi̱i̱ imma ci ogon ki necu udut.”
Awu Ye̱su̱ Le̱vi̱
(Ma̱te̱yo̱ 9:9-13; Lu̱ka̱ 5:27-32)
13Iyowa Ye̱su̱ re̱e̱nu̱n kar ki̱mi̱re̱ bo̱do̱k kuk nyatapara Ga̱li̱li̱ya̱. I̱vi̱tta̱k zin zu̱we̱ ci a̱ppwe̱ nonno, kar zin enne kakate kedemez nogo. 14Baling owo enne ti̱ti̱ma̱, icin Le̱vi̱, ngerrti Alipeyosi ming aave ngati a̱gga̱me̱ ol mucuru. A̱nne̱k zin Ye̱su̱ nonno ne, “Nuwan” Itinga zin Le̱vi̱ kar kunu nonno.
15Baling ngen Ye̱su̱ adak á̱há̱t ci yo̱mo̱no̱ ce̱e̱ze̱ ci Le̱vi̱, adakce da̱ enne ki nuyak waginnek ki ol wak aluta mucuru olle ki ol wak mu̱nye̱nu̱, eci anyak ol cik meelek giir bali annu nonno. 16Baling icinnet de̱me̱zzo̱wa̱ wak lo̱ti̱nno̱u̱ wak een Varacis#2:16 Varacis: E̱e̱ggi̱n Varacis de̱me̱zzo̱k wak edemez ol lo̱ti̱nno̱k wak Musesi, a̱tu̱ nege vongiz, ki anjilo ci Ta̱mu̱ta̱dde̱no̱, ki bo̱do̱k zoz ci azi ne ingazi atin ol daiza. IkebBuk wa To̱ni̱a̱u̱ 23:8. Ye̱su̱ ming adakce ki olli mu̱nye̱nu̱ ki bo̱do̱k ol wak aluta ol mucuru, i̱jji̱nne̱t zin nege nuyak cik Ye̱su̱, “Nya ming adakce enne ki ol wak mu̱nye̱nu̱ ki bo̱do̱k ol wak alut mucuru ko̱?”
17Baling izik Ye̱su̱ zoz necu, izek enne nogo ne, “Iróng e̱e̱ti̱ ci abunna ele ci orong ngari, abarik e̱e̱t ci omori ci orongi. Iróng bali anna ka̱kku̱ni̱ ki̱ki̱ya̱k kutu ol wak abunna, abarik Ka̱kku̱na̱k ol wak mu̱nye̱nu̱.”
Zoz ci obod ki i̱ya̱wi̱ne̱t
(Ma̱te̱yo̱ 9:14-17; Lu̱ka̱ 5:33-39)
18I̱yo̱ko̱ i̱ya̱ye̱ nuyaha cik Joni ki olli Varacisi. I̱vi̱ta̱ ol uggak i̱jji̱nne̱t Ye̱su̱, “Nya nuyaha cik Joni ki nuyak cik Varacisi ming i̱ya̱ye̱ ko̱, ma̱i̱je̱ cigunnek iróng i̱ya̱ye̱?”
19O̱bo̱de̱k zin Ye̱su̱ nogo, “I̱ya̱ye̱ wo̱ye̱ e̱re̱nno̱wa̱ cik e̱e̱t ci aruce ku̱ ming aave enne ki nogo?” Iróng wo̱ye̱ nege i̱ya̱ye̱, ming aave enne ki nogo. 20A̱kku̱ atin wazini ci okko e̱e̱ti̱ ci aruce odongnyai ngatinne̱ng, ovvo atin nege i̱ya̱ye̱ wazin neci.
21Izek bo̱do̱k Ye̱su̱ nogo ne, “I̱llo̱i̱ e̱e̱t ci aubek ru̱u̱m ci een jor ru̱u̱m ci unuk erece. Ming u̱tu̱gu̱ enne niko, ereca ucca ru̱u̱m ci een jor ko̱ ru̱u̱m ci unuk ko̱, kize gerza ru̱u̱m necu udut. 22Izek bo̱do̱k Ye̱su̱ nogo ne, iróng ngaa a̱ddu̱te̱k merte ci een jor#2:22 Merte ci een jor: Een de̱mzi̱ne̱t ci Ye̱su̱ kaviyak cik abunna cik ogon ki merte ci een jor. Ovvo Lo̱ti̱nno̱wa̱ cik Musesi ogon ki merte ci unuwa. I̱ta̱ng olli Ya̱u̱do̱ merte cinne̱ng e̱rki̱t co̱de̱ icima e̱rki̱nya̱ rama. í̱jjó̱ ci anyak ti̱lo̱k. Ming u̱tu̱gu̱ enne niko, egerzan wo̱ye̱ merte neci í̱jjó̱ neci, kar merte ki í̱jjó̱ necu do̱o̱k kegerezante. I̱llo̱i̱, a̱ddu̱te̱k enne merte ci een jor í̱jjó̱ ci een jor.”
I̱i̱te̱n wa Yu̱bze̱nto̱
(Ma̱te̱yo̱ 12:1-8; Lu̱ka̱ 6:1-5)
23Imma I̱i̱te̱ne̱ wa Yu̱bze̱nto̱, owo da̱ Ye̱su̱ ma̱ne̱ ci labinu, kar nuyaha kotozzo ki nonno, u̱du̱lta̱ zin labi u̱gge̱ orong kadait. 24Izektek zin Varacisi Ye̱su̱ ne, “Cin di̱ nuyak cigunnek ko̱, nya ming ogon nege gi̱i̱ ci akaka I̱i̱te̱ne̱ wa Yu̱bze̱nto̱?”
25O̱bo̱de̱k zin enne, “Ngen da̱ niga ikebit gi̱i̱ bali ogon Da̱vi̱de̱#2:25 Da̱vi̱de̱: Atahala Ta̱mu̱ta̱dde̱n nonno kize alaan ci Israilo kar bo̱do̱k a̱kku̱ atin alaani ci riili boore cinne, ci atin abal lo̱o̱c udut. Een alaani neci Ye̱su̱ Ki̱ri̱sto̱. IkebCaliwon 132:11-12; Buk wa To̱ni̱a̱u̱ 2:30. Abak bali Da̱vi̱de̱ e̱rki̱nya̱ i̱bbo̱ng co̱de̱ baling ngen Ye̱su̱ ki̱ti̱rra̱i̱. Ikeb1 Samwel 16-30; 2 Samwel 1-24; 1 Alaat 1-2. ki ol ciginnek baling adak nogo magiz? 26Imma e̱rki̱te̱ wa bali Abiazari, alaan ci a̱ddi̱ki̱re̱ wawaco#2:26 Alaan ci a̱ddi̱ki̱re̱ wawaco: Ommog alaani ci a̱ddi̱ki̱re̱ wawaco ko̱ alaat cik olli wawaco eci een nonno do̱ ṯok ci gon i̱i̱zo̱ Ce̱e̱z wa Ta̱mu̱ta̱dde̱no̱ Ngin wa A̱li̱le̱ Oroot e̱rki̱ta̱ lak co̱de̱. Anyaha enne bi̱ye̱ cik kar kutuny mu̱nye̱n cigge̱k. Aave Ta̱mu̱ta̱dde̱n di̱ngdi̱ngo̱nta̱ Ngin wa A̱li̱le̱ Oroot, zoz zin ci iróng alaani ci a̱ddi̱ki̱re̱ wawaco ko̱ i̱i̱zo̱ ngintu i̱i̱te̱n imma e̱rki̱ta̱. IkebLeviticus 16; I̱bu̱ru̱ 9:1-7. Ce̱e̱ze̱ wa Ta̱mu̱ta̱dde̱no̱, i̱tto̱ Da̱vi̱de̱ Ce̱e̱z wa Ta̱mu̱ta̱dde̱no̱#2:26 Ce̱e̱z wa Ta̱mu̱ta̱dde̱no̱: Anyak Ce̱e̱z wa Ta̱mu̱ta̱dde̱no̱ co̱de̱ ṯok Jerusalema, otodongek ol cik wawaco Ta̱mu̱ta̱dde̱n muci nginati ki bali ming a̱du̱wa̱ lo̱ti̱nno̱wa̱ cik Musesi ke̱. Aave Ta̱mu̱ta̱dde̱n Ce̱e̱ze̱ wa Ta̱mu̱ta̱dde̱no̱ Ngati A̱li̱le̱ Oroot di̱ngdi̱ngo̱nta̱. Alaan ci a̱ddi̱ki̱re̱ wawaco do̱ ci okko Ngati A̱li̱le̱ Oroot Ce̱e̱ze̱ wa Ta̱mu̱ta̱dde̱no̱, okko anyaha bi̱ye̱ cik unye mu̱nye̱n cik ollu ngu̱me̱ ci Ta̱mu̱ta̱dde̱no̱, e̱rki̱ta̱ lak co̱de̱. IkebLeviticus 16; I̱bu̱ru̱ 9:1-7. kar kadak umune ci a̱li̱le̱ ci adak ol wak wawaco do̱ niko. Kar bo̱do̱k Da̱vi̱de̱ kaanyik imma ol ciginnek.”
27Kar zin Ye̱su̱ kizek nogo ne, “Adimanai I̱i̱te̱n wa Yu̱bze̱nto̱ ko̱ kize ci e̱e̱t ci diiri, iróng abarik Ta̱mu̱ta̱dde̱n adiman e̱e̱t ci diiri kize ci I̱i̱te̱n wa Yu̱bze̱nto̱. 28Een zin Ngerrti E̱e̱to̱ Manyi ki I̱i̱te̱n wa Yu̱bze̱nto̱#2:28 Manyi I̱i̱te̱n wa Yu̱bze̱nto̱: U̱du̱wa̱k Ta̱mu̱ta̱dde̱n olli Ya̱u̱do̱ ku̱zu̱tte̱ I̱i̱te̱n wa Yu̱bze̱nto̱ eci enne Eteehenya ta̱mu̱-keng ki lo̱o̱c. Zoz zin ci een Ta̱mu̱ta̱dde̱n do̱ Tehenyait ko̱ nenen necu kar kize bo̱do̱k Manyi I̱i̱te̱n wa Yu̱bze̱nto̱. I̱yo̱ko̱ zin, baling azi Ye̱su̱ ne ke̱e̱ni̱ enne Manyi I̱i̱te̱n wa Yu̱bze̱nto̱, azi keng cinne ne, ke̱e̱ni̱ enne Ta̱mu̱ta̱dde̱n ci keteheenya kaal do̱o̱k. IkebLu̱ge̱z 20:8-11. bu̱k.”
Currently Selected:
Marko 2: tex
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.