Ma̱te̱yo̱ 7
7
Ma apahek ol lo̱ki̱ko̱
(Lu̱ka̱ 6:37-42)
1“Ma apahek ol ba̱ci̱nno̱k okko atin apahoniki ba̱ci̱ i̱nne̱ta̱ bu̱k. 2Ogon zin niko bu̱k, go̱o̱le̱ ci apahek i̱nna̱ ol ba̱ci̱ ko̱, okko atin Ta̱mu̱ta̱dde̱n apaheki i̱nne̱t bu̱k ba̱ci̱ cunne niko. Okko atin enne ogoniki i̱nne̱t bu̱k kaal balik ogonik i̱nna̱ ol ke̱.
3“Nya i̱nna̱ ming acinni artenit cidicilim e̱be̱re̱ce̱ ci gononu ko̱, imma ngatu ibbezi keet ci a̱ddi̱ki̱re̱ e̱be̱re̱ce̱ cunne? 4A̱nne̱k wo̱ye̱ i̱nna̱ goonu ne, ‘Ja kidima artenit cidicilim e̱be̱re̱ce̱ cunne,’ imma ngatu anyai i̱nna̱ keet ci a̱ddi̱ki̱re̱ e̱be̱re̱ce̱ cunne? 5E̱e̱ni̱ i̱nna̱ e̱e̱t ci a̱ru̱wa̱ talaben, aara arrak keet ci a̱ddi̱ki̱re̱ e̱be̱re̱ce̱ cunne, kar zin cinno ju̱rru̱m kar aara artenit cidicilim e̱be̱re̱ce̱ ci gononu ko̱.
6“Ma adima kaal cik a̱li̱le̱ kar ju̱ke̱k urzi; ma a̱ju̱ke̱k kaal cik riilik kodurukwa, ovvo atin nege orocik lo̱o̱c egerzan zone. Kar atin nege vu̱rrta̱ kerecin.
Ji̱no̱, rongo, ṯokṯowan tatug
(Lu̱ka̱ 11:9-13)
7“I̱jji̱nne̱t Ta̱mu̱ta̱dde̱n, a̱a̱nyu̱ng atin gi̱i̱ ci orongnyu niga. Orongtta ngati Ta̱mu̱ta̱dde̱no̱ kaal cik orongnyu, ovvo atin niga amudannu gi̱i̱ ci orongnyu. Oṯokṯowanit tatug ci Ta̱mu̱ta̱dde̱no̱, owikung atin enne i̱ge̱ta̱. 8Ma̱i̱je̱ e̱e̱ti̱ ci a̱jji̱n Ta̱mu̱ta̱dde̱n gi̱i̱ye̱ ci orong enne, aanyik atin Ta̱mu̱ta̱dde̱n nonno; ma e̱e̱ti̱ ci orongnye gi̱i̱ye̱ ci orongi, anyike atin Ta̱mu̱ta̱dde̱n nonno kumuda; ma e̱e̱ti̱ ci oṯokṯowan tatug, oowik atin Ta̱mu̱ta̱dde̱n nonno tatug.
9“Ngene ngatinno̱ng ci ogon zoz necu, ming a̱jji̱n do̱le̱c cinne umune, okko wo̱ye̱ enne abarik anyike nonno bee? 10Icima ming a̱jji̱n do̱le̱c cinne u̱lu̱gi̱t, okko wo̱ye̱ enne anyike nonno uwat? 11Ming wo̱ye̱ e̱e̱ggi̱nnu̱ ol cik gerzek nu̱nu̱n, a̱gga̱yyu̱ niga amuccu dooli cuggo̱k kaale cik abunna. Amuccu̱ng wo̱ye̱ Be̱e̱ti̱nno̱ng wa aave ta̱mu̱-kenga ko̱ ku̱ ming a̱jji̱nnu̱ nonno!
Ti̱lo̱wi̱ne̱t ci riili
12“Imma kaale do̱o̱k, u̱tu̱gu̱zze̱k ol kaal cik abunna orongnyu niga ku̱tu̱gu̱ze̱u̱ng nege i̱ge̱ta̱. Een ne̱ko̱ zo̱zzo̱k cik aruma lo̱ti̱nno̱k cik Musesi do̱o̱k ki zoz ci a̱ri̱tto̱u̱.
Aran ci luduci ki ci walwali
(Lu̱ka̱ 13:24)
13“I̱tto̱z go̱o̱le̱ ci anyak aran ci luduci. Imma arani ci walwali ko̱, okkoyet go̱o̱le̱ ci li̱be̱nto̱, i̱to̱zzo̱ ol cik meelek aran necu. 14Ma̱i̱je̱ gool ci een lorit anyak aran ci luduci ko̱ een gool ci okkoyet baize ci abunna, i̱i̱zo̱ ol cikidik do̱ niko.
Keet ki o̱ya̱u̱ ciginnek
(Lu̱ka̱ 6:43-45)
15“Igenyit zo̱ze̱ ci a̱ri̱tto̱k wak een volongnyok. A̱vvu̱na̱kku̱ng nege gunune ogon ki i̱yo̱ko̱ a̱zza̱ ko̱, imma zi̱nze̱tti̱ ogon ki i̱yo̱ko̱ u̱du̱ma̱na̱ ko̱. 16I̱ye̱za̱nu̱ niga nogo kaale cik ogon nege. Iróng gon ol ebera i̱mmi̱ icima i̱lo̱ngo̱ keete ci anyak biila. 17Ogon bu̱k niko, a̱bbi̱rna̱ keet ci abunna o̱ya̱u̱ cik abunna, ma̱i̱je̱ keet ci gerze a̱bbi̱rna̱ o̱ya̱u̱ cik gerzek. 18Iróng keet ci abunna a̱bbi̱rna̱ o̱ya̱u̱ cik gerzek, iróng wo̱ye̱ bo̱do̱k keet ci gerze a̱bbi̱rna̱ o̱ya̱u̱ cik abunna. 19Imma zin keena wak iróng a̱bbi̱rna̱ o̱ya̱u̱ cik abunna, ettedak ol tu̱ kar kokolttek gwo̱o̱. 20I̱yo̱ko̱ zin, i̱ye̱za̱nu̱ atin niga a̱ri̱tto̱k cik volongak kaale cik ogon nege.
U̱zu̱tte̱
(Lu̱ka̱ 13:26-27)
21“Iróng ol do̱o̱k wak a̱nne̱ka̱ ne, ‘Manyi, Manyi,’ i̱i̱zo̱ atin ba̱a̱li̱ne̱t ci ta̱mu̱-kengo, abarik i̱i̱zo̱ atin ol wak azunne ti̱lo̱wi̱ne̱t ci Baba wa aave ta̱mu̱-kenga. 22Anyak ol cik meelek atin a̱nne̱ka̱ i̱i̱te̱ne̱ ci lo̱ki̱ko̱ ko̱ ne, ‘Manyi, Manyi ba̱li̱ye̱ naga kuwaheka ol kaviyak zare cigunnek, ma zin go̱o̱le̱ neci kottoktta kuulo cik lo̱rye̱nta̱k ngati ol cik meelek, kar bo̱do̱k ku̱tu̱gu̱zza̱ kaal cik meelek a̱vu̱la̱.’ 23Kovocak atin anna nogo zoz, ‘Iróng anna ka̱gga̱yyu̱ng. Oot reena ngatinanni niga ol wak gon ogonnu mu̱nye̱n ko̱.’
Tehenyiak cik egenyi ki cik tarbalik
(Lu̱ka̱ 6:47-49)
24“I̱yo̱ko̱ zin, ming aziye e̱e̱ti̱ imma zoz cinanni ko̱, kar ki̱li̱ngli̱nge̱, ogon enne ki e̱e̱ti̱ ci egenyi eenycek ce̱e̱z nginti odong ele. 25Ming okko ta̱mu̱ aṯile, ki̱ri̱yye̱t morena, okko ngooti ci a̱ppwe̱ a̱kku̱, iróng zin ce̱e̱z cinne a̱yu̱we̱ eci lolanya ciginnek adawonik nginti odong ele. 26Ma̱i̱je̱ e̱e̱ti̱ ci aziye zoz cinanni ko̱, kar iróng a̱li̱ngli̱nge̱ go̱o̱le̱ ci koronge anna, ogon enne ki e̱e̱ti̱ ci tarbali eenycek ce̱e̱z nginti een azac. 27Ming okko ta̱mu̱ aṯile, a̱ri̱ya̱k tawani ce̱e̱z kar bo̱do̱k ki̱ki̱ya̱ ngooti ci a̱ppwe̱, a̱li̱be̱ zin ce̱e̱z neci ku̱yu̱we̱ ru̱k.”
28Baling okko Ye̱su̱ edeca zo̱zzo̱k ne̱ko̱ do̱o̱k, a̱ma̱li̱ltte̱ ol o̱o̱tti̱ de̱mzi̱nte̱ cinne. 29A̱ma̱li̱ltte̱ ol o̱o̱tti̱ eci Ye̱su̱ edemez nogo alaanzete cinne, iróng ogon ki de̱me̱zzo̱wa̱ wak lo̱ti̱nno̱k wak Musesi ko̱.
Currently Selected:
Ma̱te̱yo̱ 7: tex
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.