Popular Bible Verses from Ma̱te̱yo̱ 7

Share

“I̱jji̱nne̱t Ta̱mu̱ta̱dde̱n, a̱a̱nyu̱ng atin gi̱i̱ ci orongnyu niga. Orongtta ngati Ta̱mu̱ta̱dde̱no̱ kaal cik orongnyu, ovvo atin niga amudannu gi̱i̱ ci orongnyu. Oṯokṯowanit tatug ci Ta̱mu̱ta̱dde̱no̱, owikung atin enne i̱ge̱ta̱.

Ma̱i̱je̱ e̱e̱ti̱ ci a̱jji̱n Ta̱mu̱ta̱dde̱n gi̱i̱ye̱ ci orong enne, aanyik atin Ta̱mu̱ta̱dde̱n nonno; ma e̱e̱ti̱ ci orongnye gi̱i̱ye̱ ci orongi, anyike atin Ta̱mu̱ta̱dde̱n nonno kumuda; ma e̱e̱ti̱ ci oṯokṯowan tatug, oowik atin Ta̱mu̱ta̱dde̱n nonno tatug.

“I̱yo̱ko̱ zin, ming aziye e̱e̱ti̱ imma zoz cinanni ko̱, kar ki̱li̱ngli̱nge̱, ogon enne ki e̱e̱ti̱ ci egenyi eenycek ce̱e̱z nginti odong ele.

“Imma kaale do̱o̱k, u̱tu̱gu̱zze̱k ol kaal cik abunna orongnyu niga ku̱tu̱gu̱ze̱u̱ng nege i̱ge̱ta̱. Een ne̱ko̱ zo̱zzo̱k cik aruma lo̱ti̱nno̱k cik Musesi do̱o̱k ki zoz ci a̱ri̱tto̱u̱.

Ma̱i̱je̱ gool ci een lorit anyak aran ci luduci ko̱ een gool ci okkoyet baize ci abunna, i̱i̱zo̱ ol cikidik do̱ niko.

“I̱tto̱z go̱o̱le̱ ci anyak aran ci luduci. Imma arani ci walwali ko̱, okkoyet go̱o̱le̱ ci li̱be̱nto̱, i̱to̱zzo̱ ol cik meelek aran necu.

Ming wo̱ye̱ e̱e̱ggi̱nnu̱ ol cik gerzek nu̱nu̱n, a̱gga̱yyu̱ niga amuccu dooli cuggo̱k kaale cik abunna. Amuccu̱ng wo̱ye̱ Be̱e̱ti̱nno̱ng wa aave ta̱mu̱-kenga ko̱ ku̱ ming a̱jji̱nnu̱ nonno!

“Ma apahek ol ba̱ci̱nno̱k okko atin apahoniki ba̱ci̱ i̱nne̱ta̱ bu̱k. Ogon zin niko bu̱k, go̱o̱le̱ ci apahek i̱nna̱ ol ba̱ci̱ ko̱, okko atin Ta̱mu̱ta̱dde̱n apaheki i̱nne̱t bu̱k ba̱ci̱ cunne niko. Okko atin enne ogoniki i̱nne̱t bu̱k kaal balik ogonik i̱nna̱ ol ke̱.

Ma̱i̱je̱ e̱e̱ti̱ ci aziye zoz cinanni ko̱, kar iróng a̱li̱ngli̱nge̱ go̱o̱le̱ ci koronge anna, ogon enne ki e̱e̱ti̱ ci tarbali eenycek ce̱e̱z nginti een azac.

“Nya i̱nna̱ ming acinni artenit cidicilim e̱be̱re̱ce̱ ci gononu ko̱, imma ngatu ibbezi keet ci a̱ddi̱ki̱re̱ e̱be̱re̱ce̱ cunne? A̱nne̱k wo̱ye̱ i̱nna̱ goonu ne, ‘Ja kidima artenit cidicilim e̱be̱re̱ce̱ cunne,’ imma ngatu anyai i̱nna̱ keet ci a̱ddi̱ki̱re̱ e̱be̱re̱ce̱ cunne?

“Igenyit zo̱ze̱ ci a̱ri̱tto̱k wak een volongnyok. A̱vvu̱na̱kku̱ng nege gunune ogon ki i̱yo̱ko̱ a̱zza̱ ko̱, imma zi̱nze̱tti̱ ogon ki i̱yo̱ko̱ u̱du̱ma̱na̱ ko̱. I̱ye̱za̱nu̱ niga nogo kaale cik ogon nege. Iróng gon ol ebera i̱mmi̱ icima i̱lo̱ngo̱ keete ci anyak biila.

Ogon bu̱k niko, a̱bbi̱rna̱ keet ci abunna o̱ya̱u̱ cik abunna, ma̱i̱je̱ keet ci gerze a̱bbi̱rna̱ o̱ya̱u̱ cik gerzek.

Iróng keet ci abunna a̱bbi̱rna̱ o̱ya̱u̱ cik gerzek, iróng wo̱ye̱ bo̱do̱k keet ci gerze a̱bbi̱rna̱ o̱ya̱u̱ cik abunna.

Imma zin keena wak iróng a̱bbi̱rna̱ o̱ya̱u̱ cik abunna, ettedak ol tu̱ kar kokolttek gwo̱o̱.