Ma̱te̱yo̱ 3
3
Li̱ngli̱ngo̱n ci Joni wa a̱gga̱me̱k ol ba̱ti̱ti̱mo̱
(Marko 1:1-8; Lu̱ka̱ 3:1-18; Jon 1:19-28)
1Ma bali i̱nya̱we̱ ne̱ke̱, uwahek Joni Ba̱ti̱ti̱mo̱ ol zoz ci Ta̱mu̱ta̱dde̱no̱ balale ci gi̱da̱ngi̱, Ju̱de̱ya̱kte̱ ke̱, 2a̱nne̱k ol ne, “Uturtta mu̱nye̱n ciggo̱k eci ba̱a̱li̱ne̱t ci ta̱mu̱-kengo ize ojon.” 3Een zoz ci Joni ci bali u̱du̱wa̱ a̱ri̱to̱i̱ti̱ ci een Isaya, azi ne,
“Egereny mului ci e̱e̱to̱ balale ci gi̱da̱ngi̱, azi ne,
‘Idimantek Manyi gool,
idimantek nonno gool ci abile ṯop.’”#Isaya 40:3
4Aim bali Joni ceremwa cik adimanai immane cik naganagawak. A̱lu̱ce̱k bo̱do̱k arut nyakadingo ci adimanai rucenta, adak enne giroc ki lete. 5A̱vvu̱ ol cik meelek Jerusalema ki lo̱o̱ce̱ ci Ju̱de̱ya̱ do̱o̱k ki ol do̱o̱k lo̱o̱ce̱ ci aburuk moro ci Jordani, ovvo nege acin Jon. 6Baling uturtta nege mu̱nye̱n cigge̱k, kar enne ka̱gga̱me̱k nogo ba̱ti̱ti̱mo̱#3:6 Ba̱ti̱ti̱mo̱: Elemna ol a̱gga̱ma̱ ba̱ti̱ti̱mo̱ kar ki̱ye̱la̱ azi ne, utungtek nege mu̱nye̱n cigge̱k lo̱o̱c kar kunuwet Ta̱mu̱ta̱dde̱n. moro ci Jordani.
7I̱vi̱tta̱k ol cik een Varacis ki Saddocis#3:7 Varacis ki Saddocis: E̱e̱ggi̱n Varacisi de̱me̱zzo̱k wak edemez ol lo̱ti̱nno̱k wak Musesi, a̱tu̱ nege vongiz, ki anjilo ci Ta̱mu̱ta̱dde̱no̱, ki bo̱do̱k zoz ci azi ne ingazi atin ol daiza. Imma Saddocis iróng a̱tu̱ zoz ci vongizo ki anjilo ki zoz ci ingazi atin ol daiza. Ikeb buk wa To̱ni̱a̱u̱ 23:8. cik meelek nonno kar ka̱gga̱mto̱zi̱k ba̱ti̱ti̱mo̱ nogo bu̱k. Abarik zin Joni a̱nne̱k nogo ne, “Niga cik ogonnu ki uwanya ko̱! Nya ci a̱a̱nyu̱ng utuhuyek Ta̱mu̱ta̱dde̱n bo̱i̱ci̱ kar i̱vi̱re̱t lo̱ki̱ko̱ cinne ko̱? 8U̱tu̱gu̱z kaal cik abunna kar ol ka̱gga̱yyu̱ng elemttau niga Ta̱mu̱ta̱dde̱n de̱de̱ zi̱nze̱tti̱nne̱ ciggo̱k. 9Ma a̱nne̱kku̱ zi̱nze̱tti̱ ne, ‘Kanyaka be̱e̱ti̱nna̱ng Aburaham.’ Ka̱du̱wa̱kku̱ng adimanek wo̱ye̱ Ta̱mu̱ta̱dde̱n Aburaham dooli biyene ciko. 10E̱re̱ye̱ melei egeroi ju̱rru̱m kar ketengedak keen cik iróng a̱bbi̱rna̱ o̱ya̱u̱ cik abunna, kar ku̱ju̱kto̱zi̱k gwo̱o̱.
11“Ka̱gga̱me̱kku̱ng anna i̱ge̱t ba̱ti̱ti̱mo̱ maame kar kize gool ci urtannu niga do̱o̱k mu̱nye̱n cuggo̱k. Ma̱i̱je̱ vu̱rrte̱ cinanni a̱kku̱ atin e̱e̱ti̱ ci ommogja annit oroot, iróng wo̱ye̱ anna ke̱e̱ni̱ du̱ca̱i̱t cinne ci kuuli kodong caava ciginnek. Okko atin enne a̱gga̱me̱k ol ba̱ti̱ti̱mo̱ Vongize ci A̱li̱le̱ ki gwo̱o̱. 12Ogon enne ki e̱e̱ti̱ ci anyak uduc ci aanye labi kar kidima lotulany#3:12 Labi ki lotulany: Azi keng ci labinu ne, ol cik elemna Ki̱ri̱sto̱, kar lotulany azi keng cinne ne ol cik abure Ki̱ri̱sto̱. kutuz gwo̱o̱ye̱ ci iróng adite, kar kidima labi cik caalek ku̱du̱te̱k de̱he̱r.”
Ba̱ti̱ti̱mo̱ ci Ye̱su̱
(Marko 1:9-11; Lu̱ka̱ 3:21-22)
13A̱kku̱ Ye̱su̱ lo̱o̱ce̱ ci Ga̱li̱li̱, a̱kku̱nna̱k moro ci Jordani kar Joni ka̱gga̱me̱k nonno ba̱ti̱ti̱mo̱. 14Baling okko Joni acin nonno, utubur iróng ngen orong kar ka̱gga̱me̱k nonno ba̱ti̱ti̱mo̱, azi ne, “Korongi anna abunna ming a̱gga̱me̱ka̱ i̱nna̱ annit ba̱ti̱ti̱mo̱, abarik i̱nna̱ a̱kku̱nna̱ka̱ annita?”
15A̱nne̱k Ye̱su̱ nonno ne, “Ma aburi, abunna kogon naga gi̱i̱ necu kar ku̱tu̱gu̱we̱ bunnati ci Ta̱mu̱ta̱dde̱no̱ olle do̱o̱k.” Elema zin Joni zoz neci.
16A̱gga̱me̱k zin Joni Ye̱su̱ ba̱ti̱ti̱mo̱, baling okko Ye̱su̱ iyowa maame, oowe ta̱mu̱-kengi, icin zin Ye̱su̱ Vongiz ci Ta̱mu̱ta̱dde̱no̱ a̱kku̱nna̱k lo̱o̱c kiwagon lu̱be̱ ki̱ta̱k nonno iba. 17Iyowa zin mului ci a̱kku̱ ta̱mu̱-kenga, ize ne, “Een necu Ngeranni, kirezi nonno oroot; katalne anna zo̱ze̱ cinne.”
Currently Selected:
Ma̱te̱yo̱ 3: tex
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.