Ma̱te̱yo̱ 21
21
I̱i̱zo̱ Ye̱su̱ Jerusalem
(Marko 11:1-11; Lu̱ka̱ 19:28-38; Jon 12:12-19)
1Baling ovvo ciko Ye̱su̱ ki nuyak waginnek ojongoz Jerusalem, i̱vi̱tta̱k zin orog ci een zara Bethphage, Biye ci I̱ngi̱ro̱u̱#21:1 Bee ci I̱ngi̱ro̱u̱: Biye cu, anyak keen cik meelek i̱ngi̱ro̱u̱. Okoli keet ci een i̱ngi̱ro̱c ko̱ o̱ya̱u̱ cik wo̱ye̱ adak ol icima amacca ol maal ci irez olli Ya̱u̱do̱ oroot ngati aahe da̱i̱ne̱t icima atukule urez., i̱tto̱n zin Ye̱su̱ nuyak rama koot oowa. 2A̱nne̱k nogo ne, “Oot o̱rge̱ ci aave oowe cunno̱ng, amudannu atin zi̱gi̱r ci E̱ce̱bje̱ nginati, ki mo̱o̱le̱t cinne aavtte abanyca e̱ce̱bje̱ keeta vu̱rrta̱. Oogtta zin kar anyaktang annita. 3Ming a̱jji̱nnu̱ng e̱e̱ti̱ imma, u̱du̱ktta̱k izet ne orong Manyi nogo, kar abunna okko enne i̱tto̱na̱ nogo.”
4Ogone kaala ne̱ko̱ kar zoz bali a̱du̱wa̱ a̱ri̱to̱i̱ti̱ ke̱ kakat mo̱o̱le̱t:
5“Du̱wa̱k ol cik Zioni,#21:5 Zion: Een zar u̱gge̱ cik Jerusalem.
‘Icinnet, a̱kku̱na̱kku̱ng alaani cunno̱ng i̱ge̱ta̱,
Een enne e̱e̱t ci iróng odong ele, ottod enne zi̱gi̱r owoye,
owo mo̱o̱lte̱ ci zi̱gi̱ro̱.’”#Zakaria 9:9
6Oot zin nuyaha ne̱ke̱ kar ku̱tu̱gu̱zzo̱ kaal balik u̱du̱wa̱k Ye̱su̱ nogo ke̱. 7Anyaktta zin nege zi̱gi̱r ki mo̱o̱le̱t, Aartik zin ru̱u̱ma̱ni̱ cigge̱k bo̱i̱c ci zi̱gi̱ro̱. Kar zin Ye̱su̱ kottod ka̱vvu̱ bo̱i̱ce̱ ci zi̱gi̱ro̱.
8Idimtta zin koole ci a̱ppwe̱ etevetek ru̱u̱ma̱ni̱ cigge̱k gool o̱o̱we̱ ci Ye̱su̱, ovvo uggak etteda varany kar ketevetek gool. 9Egerenyit zin koole ci a̱ppwe̱ ovvo oowa ko̱ ki cik annu gonoggi, azi ne,
“Kinnatit Ngerrti Da̱vi̱de̱!”
“U̱mu̱yu̱k Ta̱mu̱ta̱dde̱n e̱e̱t ci a̱kku̱ zare cik Manyi!#21:9 E̱e̱t ci a̱kku̱ zare cik Manyi: Een e̱e̱ti̱ neci Ye̱su̱.”#Caliwon 118:26
“Kinnatit Ta̱mu̱ta̱dde̱n wa aave ta̱mu̱-kenga.”
10Baling i̱tto̱ Ye̱su̱ Jerusalem, u̱ku̱lte̱k ol do̱o̱k je̱e̱n, kar zin ki̱jji̱nto̱, “Ngene gon necu?”
11O̱bo̱dde̱k zin koole gonoggi, a̱nne̱k ne, “Een necu Ye̱su̱, a̱ri̱to̱i̱t wa a̱kku̱ o̱rge̱ ci een Nazeret, Ga̱li̱li̱ya̱.”
Ottok Ye̱su̱ ol wak utene kaal Ce̱e̱ze̱ wa Ta̱mu̱ta̱dde̱no̱
(Marko 11:15-19; Lu̱ka̱ 19:45-48; Jon 2:13-22)
12I̱tto̱ Ye̱su̱ re̱e̱nu̱n ci Ce̱e̱z wa Ta̱mu̱ta̱dde̱no̱ kar zin kottok ol do̱o̱k wak ataline ki wak utene kaal nginati. Iyotek zin lo̱o̱c lebelet wak gon a̱gi̱le̱ne̱ nege o̱ro̱bi̱ya̱ ki lecerwa wak gon utene ol iballi wak ogon ki loberuknya ko̱. 13A̱nne̱k zin Ye̱su̱ nogo ne, “E̱he̱rye̱ Warage ci Ta̱mu̱ta̱dde̱no̱ azi ne, ‘Awu atin ol Ce̱e̱z cinanni kize Ce̱e̱z wa Lawinto,’#Isaya 56:7 abarik niga anyikku kize ‘nyaperit ci a̱lu̱ngnye̱ne̱ ogoryaha.’”#Jeremiah 7:11
14I̱vi̱tta̱k zin ol cik ru̱be̱ni̱k ki cik ngooltik Ye̱su̱, kar zin enne Ye̱su̱ kangaru nogo Ce̱e̱ze̱ wa Ta̱mu̱ta̱dde̱no̱ ecito. 15Baling icinnet alaata cik olli wawaco Ce̱e̱ze̱ wa Ta̱mu̱ta̱dde̱no̱ ki de̱me̱zzo̱k wak lo̱ti̱nno̱u̱ kaal cik a̱vu̱la̱ ogon Ye̱su̱ ko̱, kar bo̱do̱k kiziyet dooli cikidik ming egereny reene ci Ce̱e̱z wa Ta̱mu̱ta̱dde̱no̱, azi ne, “Kinnatit Ngerrti Da̱vi̱de̱.” Utuburet zin nege nong.
16I̱jji̱nne̱t zin nege nonno, “Aziyi i̱nna̱ zoz ci a̱du̱wa̱ dooli ne̱ko̱ ko̱?”
O̱bo̱de̱k zin Ye̱su̱ nogo, “I̱i̱ny, ngen niga i̱i̱te̱n imma ikebit Zoz ci Ta̱mu̱ta̱dde̱no̱?
“‘I̱nne̱ta̱, Ta̱mu̱ta̱dde̱n edemezi dooli cikidik abunna
ming inati i̱nne̱ta̱.’”#Caliwon 8:2
17Kar zin Ye̱su̱ kutungek nogo lo̱o̱c kar ki̱mi̱re̱ kuk rok orog ci Bethany, kar ka̱ta̱ngu̱ nginati kaal.
Otor Ye̱su̱ keet ci een munec
(Marko 11:12-14,20-24)
18Imma bali nge̱rre̱t ingani, baling okko Ye̱su̱ a̱mi̱re̱ rok Jerusalem, adak da̱ nonno magiz. 19Baling icin enne keet ci een munec aave gool abanyca, uk zin enne orong kar kicin ming anyak muneci neci o̱ya̱u̱ u̱gge̱ cik a̱bbi̱re̱, abarik amuda een varany do̱. Kar zin enne kizek keet neci ne, “Ma ngen okoli bo̱do̱k o̱ya̱u̱ u̱gge̱ dee!” Ataman niko odok keet neci kak.
20Baling icinnet nuyaha zoz ci otore Ye̱su̱ keet ci een munec ko̱, u̱ku̱lte̱k je̱e̱n, kar kizeto ne, “Odoi keet ci een munec ko̱ ataman niko ku̱?”
21O̱bo̱de̱k zin Ye̱su̱ nogo, “Ka̱du̱wa̱kku̱ng zoz ci een de̱de̱, ming anyakku niga tu̱we̱ne̱t kar iróng zi̱nze̱tti̱ engerye lak rama, ogonnu wo̱ye̱ niga kaal cik meelek ki i̱yo̱ko̱ anna ko̱, ki bo̱do̱k u̱gge̱ cik meelek. A̱nne̱kku̱ wo̱ye̱ niga bee cu ne, ‘Dong ele cunne, bit ju̱ke̱k nyatapar ci a̱ddi̱ki̱re̱,’ ogone atin ki ming a̱du̱wa̱nnu̱ niga ko̱. 22Ming elemnyyu niga, a̱a̱nyu̱ng atin Ta̱mu̱ta̱dde̱n kaal cik a̱jji̱na̱nu̱ niga lawinta.”
I̱jji̱nne̱t ol alaanzet ci Ye̱su̱
(Marko 11:27-33; Lu̱ka̱ 20:1-8)
23I̱tto̱ Ye̱su̱ re̱e̱nu̱n ci Ce̱e̱z wa Ta̱mu̱ta̱dde̱no̱ kar zin kakate de̱mzi̱ne̱t, i̱vi̱tta̱k zin nonno alaata cik olli wawaco Ce̱e̱ze̱ wa Ta̱mu̱ta̱dde̱no̱ ki ddi̱ki̱ryyo̱k wak Ya̱u̱do̱. Kar zin ki̱jji̱nne̱t nonno, “Ogoni i̱nna̱ kaal ne̱ko̱ alaanzete ci ngene? Ngene ci aanyi i̱nne̱t komiz necu?”
24O̱bo̱de̱k zin Ye̱su̱ nogo, “Ka̱jji̱nnu̱ng atin ji̱ne̱ne̱t co̱de̱. Ming abarizang zo̱ze̱ necu, ka̱du̱wa̱kku̱ng atidic alaanzet ci kogonne anna kaal ne̱ko̱ ko̱. 25A̱kku̱ ba̱ti̱ti̱mo̱ wa a̱gga̱me̱k Joni ol ko̱ nga? A̱kku̱ ta̱mu̱-kenga yo, icima anyaha e̱e̱ti̱ ci diiri?”
Ozozzit zin ol ne̱ke̱ e̱le̱tti̱ne̱ cigge̱k do̱. Anno ne, “Ming kizetta naga ne, ‘A̱kku̱ ba̱ti̱ti̱mo̱ ci Joni ta̱mu̱-kenga,’ a̱jji̱nne̱t atidic enne azi ne, ‘Nya ming iróng niga elemnyyu zoz cinne ko̱?’ 26Abarik ming kizetta ne, ‘A̱kku̱ zoz neci ngati e̱e̱t ci diiri,’ ko̱ngo̱o̱le̱ naga ol, eci nege do̱o̱k i̱no̱n ming een Joni a̱ri̱to̱i̱t ci zoz ci Ta̱mu̱ta̱dde̱no̱.”
27Kar zin vu̱rrta̱ nege kabariztek Ye̱su̱, “Iróng naga ka̱gga̱yya̱.”
Kar zin enne kizek nogo ne, “Iróng zin anna bu̱k atidic ka̱du̱wa̱kku̱ng alaanzet ci ngene ci kogonne anna kaal ne̱ko̱ ko̱.”
Tubzenet ci logoz cik een rama
28U̱du̱wa̱k zin Ye̱su̱ nogo tubzenet ci azi ne, “I̱no̱nnu̱ niga nya zo̱ze̱ ci kokko anna kozozi ko̱? Anyak e̱e̱ti̱ imma dooli rama kar ku̱du̱wa̱k ngerinne wa a̱ddi̱ki̱re̱ zoz ci azi ne, ‘Ngeranni, bit li̱ngli̱ngo̱n manato wazin necu.’
29“O̱bo̱de̱k zin ngerinne nonno azi ne, ‘Iróng anna kokko,’ imma bali vu̱rrta̱ i̱no̱n niko kar zin kuk manato.
30“Iizek zin be̱e̱ti̱ do̱le̱co̱ do̱le̱c co̱de̱ ke̱ ne, ‘Bit zin i̱nna̱ manato,’ O̱bo̱de̱k enne baatinne, ‘Kokko atidic,’ ma̱i̱je̱ ngatu iróng ngen okko.”
31I̱jji̱n Ye̱su̱ nogo, azi ne, “I̱yo̱ko̱ zin, do̱le̱c jang ci ogon zoz ci a̱du̱wa̱ baatinne?”
O̱bo̱dde̱k zin nege, “Do̱le̱c wa oowu.”
Oobek zin Ye̱su̱ nogo ungec ci zozo: Azi ne, “Ka̱du̱wa̱kku̱ng zoz ci een de̱de̱, i̱i̱zo̱ atin ol wak a̱gga̱ma̱ ol mucuru o̱ro̱gjo̱we̱ ki a̱li̱ya̱k, ba̱a̱li̱ne̱t ci Ta̱mu̱ta̱dde̱no̱ o̱o̱we̱ cunno̱ng. 32Eci Joni a̱kku̱na̱kku̱ng i̱ge̱t abunna i̱ye̱le̱kku̱ng gool ci abunna, iróng zin niga elemnyyu zoz cinne, ma̱i̱je̱ ol wak a̱gga̱ma̱ ol mucuru ki a̱li̱ya̱k, a̱tu̱ nege zoz cinne. Imma baling icinntu niga nu̱nu̱n ol ne̱ke̱ ming elemtta zoz ci Joni, iróng niga ungneku mu̱nye̱n lo̱o̱c kar u̱tu̱we̱t zoz cinne.”
Tubzenet ci ol wak a̱li̱ngli̱ng manato
(Marko 12:1-12; Lu̱ka̱ 20:9-19)
33U̱du̱wa̱k zin bo̱do̱k Ye̱su̱ nogo tubzenet ci azi ne, “I̱yo̱ko̱ ijaktte da̱, iziyyet tubzenet cu, arirek da̱ e̱e̱ti̱ imma ma̱na̱ cinne keen cik een vi̱no̱,#21:33 Keet ci een vi̱no̱: Arir ol keet ci een vi̱no̱ ko̱, amacu olli Ya̱u̱do̱ o̱ya̱u̱ ciginnek kize merte. Ozoz gon Ta̱mu̱ta̱dde̱n azi ne ogon olli Ya̱u̱do̱ ki keet ci vi̱no̱ riili, wak orong enne abunna ming a̱bbi̱rna̱ o̱ya̱u̱ cik abunna. IkebCaliwon 80:8-16; Isaya 5:1-7; Jeremiah 2:21; Marko 12:1-12; Lu̱ka̱ 20:9-19. idimanek luwat ku̱lu̱c, kar kidiman nginti ogone ol merte kar bo̱do̱k keteny ce̱e̱z ci anyak le̱be̱le̱ ci ebehe ol ngin neci kar zin kutungek ol u̱gge̱ kar ku̱lu̱k kuk o̱rge̱ emani. 34Baling ize te̱di̱ne̱t ma̱na̱ neci, i̱tto̱na̱ zin enne du̱cca̱k waginnek abunna ovvo ettedak nonno ciginnek.
35“Abarik zin ol ne̱k ebek ma̱na̱ ke̱ a̱gga̱mi̱t du̱cca̱k ne̱ke̱ kar zin ku̱ru̱we̱t co̱de̱, kar ku̱ru̱we̱t co̱de̱ ka̱da̱k, kar kovoccit co̱de̱ biyene. 36Kar zin manyi ma̱na̱ ki̱tto̱n bo̱do̱k du̱cca̱k ciginnek u̱gge̱ abunna ovvo aducak nonno o̱ya̱u̱ cik keet neci manatoto, ma̱i̱je̱ ol ne̱k ebekce ke̱ u̱tu̱gu̱zzo̱ zoz bali ogonike nege du̱cca̱k balik o̱o̱tti̱nu̱ ke̱. 37Imma bali vu̱rrta̱, i̱tto̱n manyi ma̱na̱ ngerinne, i̱no̱n azi ne, ‘O̱ngo̱o̱le̱ atin ol ne̱ke̱ ngeranni.’
38“Imma baling ovvo ol ne̱k ebek ma̱na̱ ko̱ acin ngerrti manyi ma̱na̱ ming a̱kku̱, ozozzit zin nege do̱, izeto ne, ‘I̱ki̱ya̱ zin e̱e̱ti̱ ci okko aragiz lo̱o̱c. Ku̱ru̱we̱t nonno ka̱da̱k kar zin karagizet ma̱na̱ cinne.’ 39A̱gga̱mi̱t zin nege nonno kar ku̱ju̱kte̱k ma̱na̱ abanyca kar zin ku̱ru̱we̱t nonno ka̱da̱k.
40“Ming okko manyi ma̱na̱ a̱kku̱, i̱no̱nnu̱ niga okko atin enne ogonek ol wak a̱li̱ngli̱ng ma̱ne̱ cinne ko̱ nya?”
41“O̱bo̱dde̱k zin nege nonno, ‘A̱kku̱ ucca manyi ma̱na̱ kar ku̱ru̱k ol cik gerzek ko̱ ka̱da̱i̱to̱, kar zin kaanyik ma̱na̱ cinne ol cik abunna ki̱li̱ngli̱nge̱t kar gon kengerit ki nonno o̱ya̱u̱ cik a̱bbi̱rna̱ ma̱ne̱ neci.’”
42I̱jji̱n zin Ye̱su̱ nogo, “Ngen niga ikebit zoz necu Warage ci Ta̱mu̱ta̱dde̱no̱? Azi ne,
“‘Okko bee bali abure ol wak eenyce ko̱
ize bee ci abilne ce̱e̱z kommog veelek.
U̱tu̱gu̱ Manyi zoz necu,
a̱zi̱ze̱ oroot ming kacin naga eberene.’#Caliwon 118:22-23
43“Ka̱du̱wa̱kku̱ng anna, a̱gga̱ma̱ atin Ta̱mu̱ta̱dde̱n ba̱a̱li̱ne̱t cinne ngatinno̱ng, kar zin kanyik ol wak atin a̱li̱ngli̱ng zoz ci abunna oroot. 44Ming i̱i̱na̱k e̱e̱ti̱ bee neci, a̱du̱le̱ atin enne, ma̱i̱je̱ e̱e̱ti̱ ci i̱i̱na̱k bee nonno a̱du̱le̱ atin.”
45Baling iziyyet alaata cik olli wawaco Ce̱e̱ze̱ wa Ta̱mu̱ta̱dde̱no̱ ki ol wak een Varacis tubzenet cik Ye̱su̱ ko̱ do̱o̱k, a̱gga̱c niko aaruk Ye̱su̱ nogo. 46Orongit zin nege ke̱ce̱bbi̱t Ye̱su̱, ma̱i̱je̱ nege o̱ngo̱o̱le̱ kar ke̱ce̱bbi̱t nonno, eci zu̱we̱ a̱gga̱ een enne a̱ri̱to̱i̱t de̱de̱.
Currently Selected:
Ma̱te̱yo̱ 21: tex
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.