Ma̱te̱yo̱ 19
19
Zoz ci ooge e̱e̱ti̱ ngaa
(Marko 10:1-12)
1Baling edeca Ye̱su̱ ke̱bi̱ne̱t yabzinet wa alalneke e̱e̱ti̱ gooni ko̱, utungek zin lo̱o̱c ci Ga̱li̱li̱ lo̱o̱c, kar kuk o̱to̱ne̱ ci lo̱o̱c ci een Ju̱de̱ya̱, kar zin kuk rok ti̱ti̱me̱ ci golla, o̱to̱ne̱ ci je̱e̱ni̱ ke̱, more ci een Jordan. 2Unuwet koole cik meelek nonno kar zin enne kangaru ol ne̱k anyak mo̱ri̱zzo̱k ke̱ kubunnta.
3I̱vi̱ta̱ zin ol uggak cik een Varacis orongit ki̱vi̱ta̱ ku̱cu̱btta̱ zoz ngati Ye̱su̱, ji̱ne̱ne̱t ci azi ne, “Ma dim abunna ming oog e̱e̱ti̱ ngaa cinne#19:3 E̱e̱t ci oog ngaa cinne: Ozoz Ye̱su̱ zoz ci obod ki rucenet ki ooginnet buwanine ciko:Ma̱te̱yo̱ 5:31-32; Marko 10:1-12; Lu̱ka̱ 16:18. Ozoz Pa̱u̱lo̱ zoz ci obod ki rucenet ki ooginnet buwe ci1 Ko̱ri̱nto̱ 7:1-40. zo̱ze̱ ci aave to?”
4O̱bo̱de̱k zin Ye̱su̱, “Ngen dim da̱ ikebit Waraga ci Ta̱mu̱ta̱dde̱no̱? Arrak oowa ‘eenyca Ta̱mu̱ta̱dde̱n nogo kizeto e̱e̱t ci maci ki ci nga̱a̱ye̱.’#Kananet 1:27 5Kar kize ne, ‘Eci zo̱ze̱ necu, ungnek atin e̱e̱ti̱ ci maci baatinne ki yaatinne lo̱o̱c kar koot kurumet baiz ki ngaa cinne, kar ol ne̱k een rama ko̱ kizeto ele co̱de̱.’#Kananet 2:24 6Iróng nege ngen e̱e̱ggi̱n ol rama, a̱vvu̱to̱ nege ko̱do̱ye̱, ma anyike e̱e̱t imma kenger nogo, eci Ta̱mu̱ta̱dde̱n urum nogo.”
7I̱jji̱nne̱t zin ol wak Varacisi ko̱ nonno, “Nya zin ming azi Musesi ne, anyik e̱e̱t keteherek ngaa cinne waraga ci ooginto kar zin koog?”
8O̱bo̱de̱k zin Ye̱su̱ nogo, “Elemi Musesi zoz ci eher ol waraga ci ooge e̱e̱ti̱ ngaa cinne, eci zi̱nze̱tti̱ cuggo̱k okkomi kak. Ma̱i̱je̱ ngatu, iróng zoz necu ba̱li̱ye̱ ogon niko arrak oowa. 9Ka̱du̱wa̱kku̱ng zin zoz cu: Ming oog e̱e̱ti̱ ngaa cinne kar ki̱ti̱k ngaa imma, ogon ki e̱e̱ti̱ ci orooto ki ngaa ci e̱e̱to̱. Oog wo̱ye̱ e̱e̱ti̱ ngaa cinne ming orooto ki e̱e̱t imma.”
10Izektek zin nuyaha cik Ye̱su̱ nonno ne, “Ming een zoz ci ngaa ki mac ki i̱yo̱ko̱, abunna ming iróng e̱e̱ti̱ aruce!”
11O̱bo̱de̱k zin Ye̱su̱ nogo, azi ne, “Iróng ol do̱o̱k elemi zoz ci iróng nege arucene, elemi ol wak aganik a̱vvu̱ze̱t do̱ ci iróng aruce. 12Een ne̱ko̱ zo̱zzo̱k cik iróng ol uggak arucene, ovvo ol uggak egerzan ol u̱gge̱ kar iróng a̱ri̱ti̱, ovvo uggak abure rucenet zo̱ze̱ ci ba̱a̱li̱ne̱t ci ta̱mu̱-kengo. Ming orong e̱e̱ti̱ baiz ci aave e̱e̱ti̱ ollin ko̱, anyik kelema.”
A̱mu̱yu̱k Ye̱su̱ dooli
(Marko 10:13-16; Lu̱ka̱ 18:15-17)
13Anyakttak ol uggak Ye̱su̱ dooli abunna okko enne a̱mu̱yu̱k nogo kar bo̱do̱k kalawek nogo Ta̱mu̱ta̱dde̱n. Ma̱i̱je̱ nuyaha acazit ol balik anyaha dooli ke̱.
14Ize zin Ye̱su̱ ne, “Aanycik dooli ne̱ko̱ ki̱vi̱ta̱n. Ma alamnyu nogo! Eci ba̱a̱li̱ne̱t ci ta̱mu̱-kengo een cinne̱ng.” 15Baling atadek Ye̱su̱ nogo azzin alawek Ta̱mu̱ta̱dde̱n, kar zin enne kuk.
E̱e̱t ci een bo̱to̱ro̱c
(Marko 10:17-31; Lu̱ka̱ 18:18-30)
16I̱ki̱ya̱k e̱e̱ti̱ imma Ye̱su̱ kar ki̱jji̱n zoz ci azi ne, “De̱me̱zo̱i̱t wa abunna, ku̱tu̱gu̱ nya ci abunna kar kuruba baiz ci aave udut?”
17O̱bo̱de̱k zin Ye̱su̱ nonno, “Nya ming a̱jji̱nna̱ gi̱i̱ ci abunna ko̱? Anyak e̱e̱t Co̱de̱ ṯok ci abunna. Ming orong i̱nna̱ ruba baiz, to̱ngo̱o̱lle̱ lo̱ti̱nno̱k.”
18I̱jji̱n zin e̱e̱ti̱ neci Ye̱su̱, “Ti̱lo̱wi̱ne̱t, jang?”
Kar zin Ye̱su̱ kobodek nonno, “‘Ma amunyi e̱e̱t ci diiri, ma orootonu ki ngaai cik ollu, ma ogorze, ma a̱du̱wa̱ zoz ngati ovolonge e̱e̱t imma, 19to̱ngo̱o̱lle̱ baatunne ki yaatunne,#Lu̱ge̱z 20:12-16; Deuteronomy 5:16-20 irez e̱e̱t ci locariyo#19:19 E̱e̱t ci locariyo: Oob Ye̱su̱ keng ci ireze i̱nna̱ locari cunne. IkebLu̱ka̱ 10:27-37. ki i̱yo̱ko̱ ming irezi i̱nna̱ ele cunne ko̱.’”#Leviticus 19:18
20O̱bo̱de̱k zin e̱e̱ti̱ neci Ye̱su̱, “Kazunne anna ti̱lo̱wi̱ne̱t ne̱ko̱ do̱o̱k. Nya bo̱do̱k ci ngen a̱zze̱ to?”
21Abariz zin Ye̱su̱, “Ming orongi i̱nna̱ ize e̱e̱t ci iróng anyai mu̱nye̱n, bit tuwoyi i̱jjo̱ cigunnek do̱o̱k, kar anyik o̱ro̱bi̱ya̱ ol cik amati, kar zin kaala cigunnek kadazze ta̱mu̱-kenga. Kar i̱jja̱ zin nuwan.”
22Baling izik lo̱gu̱t neci zoz ci a̱du̱wa̱ Ye̱su̱ ko̱, etteda zinin, kar odotek zin enne Ye̱su̱ lo̱o̱c, eci enne anyak kaal cik meelek, een enne bo̱to̱ro̱c oroot.
23Kar zin Ye̱su̱ kizek nuyak ciginnek ne, “Ka̱du̱wa̱kku̱ng zin zoz ci een de̱de̱, okkomi kak ngati e̱e̱t ci een bo̱to̱ro̱c ngati i̱zo̱we̱ ba̱a̱li̱ne̱t ci ta̱mu̱-kengo. 24Ka̱du̱wa̱kku̱ng dee, abarik obokce ngati naganagawo ngati i̱zo̱we̱ orotenit wa een volongnyoit ko̱, okkomi zin ngati e̱e̱t ci een bo̱to̱ro̱c kar ki̱tto̱ ba̱a̱li̱ne̱t ci Ta̱mu̱ta̱dde̱no̱ ta̱mu̱-kenga.”
25Baling iziyyet nuyaha zoz neci, u̱ku̱lte̱k je̱e̱n oroot, kar kizeto ne, “Ngene zin atin ci aruba ti̱ri̱ze̱ne̱t?”
26Egelem zin Ye̱su̱ nogo kar kize ne, “Ming een i̱no̱ni̱nte̱ ci e̱e̱t ci diiri okkomi kaala ne̱ko̱ kak, ma̱i̱je̱ ngati Ta̱mu̱ta̱dde̱no̱ i̱llo̱i̱ gi̱i̱ imma ci ommog nonno.”
27O̱bo̱de̱k Peturu nonno, “Kutungteya naga kaal do̱o̱k lo̱o̱c, kar abunna ming kanuyi i̱nne̱ta̱. Kamudanna zin atin naga nya?”
28O̱bo̱de̱k zin Ye̱su̱ nogo, “Ka̱du̱wa̱kku̱ng zoz ci een de̱de̱, ming kuwa anna Ngerrti E̱e̱to̱ ka̱vvu̱ lecere cinanni ba̱a̱li̱nte̱ ci Ta̱mu̱ta̱dde̱no̱ di̱ngdi̱ngo̱nta̱, ovvo niga ol balik e̱e̱ggi̱nnu̱ to̱ni̱a̱k wagannik ko̱ bu̱k kaavtte ki annit lecerete cik een omoto ki rama, ettedekku atin lo̱ki̱ko̱ booryyok wak Israilo e̱e̱ggi̱n omoto ki rama ko̱. 29Imma e̱e̱ti̱ ci ungnek ce̱e̱zi̱ icima gotonoggi icima ngonoggi icima baatinne icima yaatinne icima dooli icima kaal ciginnek zo̱ze̱ cinanni, amuda atin o̱bo̱n co̱de̱ (100) kaale ne̱k ungnek enne lo̱o̱c ke̱, kar atin karagiz baiz wa aave udut. 30Ma̱i̱je̱ ol wak meelek e̱e̱ggi̱n o̱o̱tti̱ i̱yo̱ko̱ ko̱, ovvo atin nege e̱e̱ggi̱n vu̱rrti̱, imma ol wak meelek e̱e̱ggi̱n vu̱rrti̱ ko̱, ovvo atin nege e̱e̱ggi̱n o̱o̱tti̱.”
Currently Selected:
Ma̱te̱yo̱ 19: tex
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.