Ma̱te̱yo̱ 18
18
A̱ddi̱ki̱re̱ ngene ba̱a̱li̱nte̱ ci ta̱mu̱-kengo?
(Marko 9:33-37; Lu̱ka̱ 9:46-48)
1I̱vi̱tta̱k zin nuyaha Ye̱su̱ i̱i̱te̱n imma kar zin ki̱jji̱nne̱t nonno, kizeto ne, “Ngene ci ommog ol do̱o̱k ba̱a̱li̱nte̱ ci ta̱mu̱-kengo?”
2Utu zin Ye̱su̱ do̱le̱c cidici kar zin kaanyik kibil orgene cinne̱ng. 3Kar kize ne, “Ka̱du̱wa̱kku̱ng zoz ci een de̱de̱, abunna ming ungneku mu̱nye̱n cuggo̱k lo̱o̱c, kar u̱tu̱gu̱z ki i̱yo̱ko̱ dooli cikidik ko̱, iróng atin i̱zzo̱yu̱ ba̱a̱li̱ne̱t ci ta̱mu̱-kengo. 4Ming iróng e̱e̱ti̱ odong ele ki i̱yo̱ko̱ do̱le̱c icu ko̱, nonno ci ommog ol do̱o̱k ba̱a̱li̱nte̱ ci ta̱mu̱-kengo. 5Ming ivata e̱e̱ti̱ imma do̱le̱c cidici ki i̱yo̱ko̱ icu ko̱, ivatana enne annita bu̱k.
Ma acazu dooli cigannik
(Marko 9:42-48; Lu̱ka̱ 17:1-2)
6“Abarik ming aanyik e̱e̱ti̱ imma do̱le̱c cidici elemanna annit ko̱ ku̱tu̱gu̱ mu̱nye̱n, agano ming kecebek e̱e̱t neci rabaz i̱i̱nya̱ kar ku̱ju̱kte̱k nyatapar ci a̱ddi̱ki̱re̱ orgen.”
7Kar zin Ye̱su̱ bo̱do̱k kize ne, “O̱lle̱ cik lo̱o̱c cu eci anyike ol kabaccit. Aave ba̱ci̱ to, o̱lle̱ zin cik e̱e̱t wa anyaha ba̱ci̱. 8Ming aanyi a̱zzi̱ti̱ icima zoc cunne ba̱ci̱, ettedak tu̱. Abunna ming aave baiza ngati e̱e̱ni̱ ngool, gerza ming aave baiza ngati anyahe azzin ki zo̱o̱ do̱o̱k ming a̱tu̱be̱ kar bit gwo̱o̱ye̱ ci iróng adite udut. 9Kar bo̱do̱k ming aanyi e̱be̱re̱ci̱ cunne ba̱ci̱, arrak tu̱. Abarik abunna ming i̱i̱zo̱ ta̱mu̱-keng e̱be̱re̱ce̱ co̱de̱, gerza ming i̱i̱zo̱ gwo̱o̱ eberene do̱o̱k.
Nga̱ri̱do̱ ci a̱zze̱t ci a̱zze̱
(Lu̱ka̱ 15:3-7)
10-11“Ma zin ibbezzu do̱le̱c co̱de̱ ṯok doolinne ne̱ko̱. Ka̱du̱wa̱kku̱ng eci anjilonya cigge̱k acin ngu̱m ci Baatanni odohize wa aave ta̱mu̱-kenga.
12“I̱no̱nnu̱ niga nya zo̱ze̱ cu? Ming anyak e̱e̱ti̱ imma a̱zza̱ o̱bo̱n co̱de̱ (100), kar co̱de̱ ki̱zzi̱, iróng wo̱ye̱ enne ungnek moten torkoc ki torkoc bee kar kuk korong co̱de̱ ci a̱zze̱ ko̱? 13Ming okko enne aruba, ka̱du̱wa̱kku̱ng zoz ci een de̱de̱, okko enne atalne oroot zo̱ze̱ ci a̱zze̱t co̱de̱ ko̱, kommog ne̱k meelek iróng a̱zze̱ ko̱. 14Ogon zin bo̱do̱k niko ngatinna, iróng Baatunne ta̱mu̱-kenga orong do̱le̱c co̱de̱ ṯok ki̱zzi̱ doolinne cik cikidik ko̱.”
Diman gotonet ci abaci zoz
(Lu̱ka̱ 17:3)
15“Ming abac gotoneti, imma mu̱nye̱nu̱ ngatunne, bit ngatinne lo̱mu̱k kar zin du̱wa̱k ba̱ci̱ neci. Ming elema gotoneti neci kar bo̱do̱k kize ne, lalean, a̱vvu̱t zin ki nonno labak. 16Ma̱i̱je̱ ming iróng enne atin elemi zoz cunne, ming anyak e̱e̱t ci ozoz azi ne u̱tu̱gu̱ e̱e̱ti̱ imma gerzet, orong ming anyak bbacak rama icima i̱i̱yo̱#18:16 Bbacak rama icima i̱i̱yo̱: Orong lo̱ti̱nno̱wa̱ cik Musesi bbacak rama icima i̱i̱yo̱ lo̱ki̱ka̱ kar apaktek ol e̱e̱t zoz ju̱rru̱m. IkebDeuteronomy 19:15; 2 Ko̱ri̱nto̱ 13:1; 1 Ti̱mo̱te̱yo̱ 5:19; I̱bu̱ru̱ 10:28. cik icinnet ba̱ci̱ neci.#Deuteronomy 19:15 17Ka̱du̱wa̱kku̱ng zin zoz cu: Ming abure e̱e̱ti̱ neci iróng aziye zoz cinne̱ng, bite zin zoz neci ke̱le̱ci̱a̱; kar ming abure zoz ci olli ke̱le̱ci̱o̱, dotek nonno lo̱o̱c, ma ngen edeconik nonno, cin nonno kiwagon e̱e̱ti̱ ci iróng a̱gga̱ Ta̱mu̱ta̱dde̱no̱ icima ki e̱e̱ti̱ ci a̱gga̱ma̱ ol mucuru.
18“Ka̱du̱wa̱kku̱ng anna i̱ge̱t zoz ci een de̱de̱, ming ecebju zoz lo̱o̱ta̱ ngatu, eceb Ta̱mu̱ta̱dde̱n bu̱k ta̱mu̱-kenga, kar bo̱do̱k ming oogju zoz lo̱o̱ta̱ ngatu, oog Ta̱mu̱ta̱dde̱n bu̱k ta̱mu̱-kenga.
19“Ka̱du̱wa̱kku̱ng bo̱do̱k zoz cu dee, ming elemtta ol cik een rama zo̱ze̱ emani lo̱o̱ta̱ ngatu kaale cik a̱jji̱nnu̱, ogon atin Baba bu̱k ta̱mu̱-kenga. 20Eci ming alute ol cik een rama icima i̱i̱yo̱ zo̱ze̱ ci zar cigannik, kaave anna orgene cinne̱ng.”
Tubzenet ci e̱e̱t ci iróng alalek gooni
21I̱ki̱ya̱k zin Peturu Ye̱su̱ kar ki̱jji̱n, “Manyi, i̱yo̱ko̱ ming U̱tu̱gu̱we̱ya̱ gotoneti gi̱i̱ ci een mu̱nye̱n gerze, kalalek nonno lak izong? Lak turgerem?”
22O̱bo̱de̱k zin Ye̱su̱ nonno, “Iróng een lak turgerem, abarik een lak moten turgerem lak turgerem#18:22 Moten turgerem lak turgerem: A̱du̱wa̱ Ye̱su̱ ti̱gi̱le̱ne̱t ci a̱ppwe̱ ko̱, eci enne orong ol alaltek gotonoggi odohize..
23“Eci zoz neci u̱tu̱gu̱ niko, katubek ba̱a̱li̱ne̱t ci ta̱mu̱-kengo ki alaan ci orong kikeb kaal balik ovvoye du̱cca̱ha̱ ciginnek ngatinne ke̱. 24Baling orong enne ki̱ti̱gi̱l kaal ciginnek du̱ca̱he̱ ne̱ke̱, anyaktta zin ol e̱e̱t co̱de̱ ci een nga̱bo̱le̱ni̱t cinne okkoye ba̱li̱ye̱ enne lo̱do̱ i̱bbo̱nge̱t omoto (10,000) cik een dhahab.#18:24 Lo̱do̱ ci dhahabo: A̱li̱ngli̱ng wo̱ye̱ e̱e̱ti̱ e̱rki̱nya̱ omoto ki tu̱r kar ku̱ru̱k o̱ro̱bi̱ya̱ cik een Lo̱do̱ ci dhahabo. 25Iróng zin enne ngen uule kar ku̱ru̱k nga̱bo̱lo̱, ize zin alaani ne, u̱tu̱yye̱k nonno, ki ngaa cinne ki dooli ki kaal cik anyak enne do̱o̱k tu̱, abunna ming a̱ru̱we̱ enne o̱ro̱bi̱ya̱ ne̱ke̱ nga̱bo̱lo̱ cinanni.
26“U̱lu̱le̱ zin du̱ca̱i̱ti̱, akat u̱zu̱ngti̱nne̱ ngati alaano kar zin kilalek nonno, kize ne, ‘Alaan bai, anyik zinin cunne kalal. Ka̱ru̱i̱ atin ngabolet ne̱ko̱ do̱o̱k.’ 27Atamatek zin enne nonno, kar zin enne kalalek nonno kar kaanyik kuk ci iróng atin ngen a̱ru̱k nga̱bo̱lo̱ neci.
28“Imma baling utungek du̱ca̱i̱ti̱ necu alaan lo̱o̱c, uk zin enne rok e̱e̱t ci een nga̱bo̱le̱ni̱t cinne, adak da̱ o̱ro̱bi̱ya̱ o̱bo̱n co̱de̱ (100) cik e̱e̱ggi̱n ziik.#18:28 O̱ro̱bi̱ya̱ cik e̱e̱ggi̱n ziik: Een o̱ro̱bi̱ya̱c co̱de̱ ci een zi̱i̱t ci a̱li̱ngli̱nge̱ e̱e̱ti̱ i̱i̱te̱n co̱de̱. A̱gga̱m zin enne elem ci e̱e̱t neci kar kize ne, ‘Ru̱g o̱ro̱bi̱ya̱ cigannik i̱yo̱ko̱ niko.’
29“Akatek zin e̱e̱ti̱ neci ngatinne u̱zu̱ngti̱nne̱ kar kilalek nonno arrak do̱yo̱i̱t, a̱nne̱k ne, ‘Anyik zinin cunne ka̱vvu̱ lo̱o̱ta̱, ka̱ru̱i̱ atin anna o̱ro̱bi̱ya̱ cigunnek.’
30“Ma̱i̱je̱, manyi o̱ro̱bi̱ya̱ abure. Abarik, orong o̱ro̱bi̱ya̱ ciginnek ku̱ru̱kte̱ i̱yo̱ko̱ niko. Okolek zin e̱e̱t neci lagam kecebe, kar atin koogjai ming u̱ru̱k o̱ro̱bi̱ya̱ ne̱ke̱. 31Baling icinnet du̱cca̱ha̱ uggak zoz neci, utuburet nege nong oroot. Oot zin u̱du̱kta̱k alaan zoz neci veelek.
32“Utu zin alaani du̱ca̱i̱t bali een nga̱bo̱le̱ni̱t cinne ke̱, kar kizek ne, ‘E̱e̱ni̱ i̱nna̱ du̱ca̱i̱t ci gerze! Kutungei anna i̱nne̱t nga̱bo̱lo̱ bali okkoye i̱nna̱ ke̱, eci i̱nna̱ ilaleka oroot. 33Iróng wo̱ye̱ i̱nna̱ anyai bunnat kar tungek goonu ci een du̱ca̱i̱t ki i̱nna̱ ko̱ nga̱bo̱lo̱, ki bali ming kalalneki anna i̱nne̱t ko̱ nya?’ 34Kar zin alaani kaanyik nonno ol wak eceb ol lagama, ki̱bi̱ce̱ ju̱rru̱m nginti a̱ru̱we̱ enne nga̱bo̱lo̱ cinne.
35“Gool zin ci atin ogonekku̱ng atin Baba wa aave ta̱mu̱-kenga ko̱ necu, ming iróng niga alalnekku goonu zinine cunne.”
Currently Selected:
Ma̱te̱yo̱ 18: tex
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.