Ma̱te̱yo̱ 14
14
U̱ru̱k He̱ro̱di̱ Jon Ba̱ti̱ti̱mo̱ ka̱da̱k
(Marko 6:14-29; Lu̱ka̱ 9:7-9)
1Baling izik alaani He̱ro̱di̱#14:1 Alaan He̱ro̱d: Awu ol alaan cu azi ne, He̱ro̱d Antipas. Bali vu̱rrta̱ ming okko He̱ro̱d wa A̱ddi̱ki̱re̱ a̱da̱i̱, ize ngerinne He̱ro̱di̱ Antipas alaan. Een enne alaan i̱i̱te̱ne̱ bali a̱gga̱me̱k Joni Ye̱su̱ ba̱ti̱ti̱mo̱ ke̱. Ikeb Marko 6:14; Lu̱ka̱ 3:1; To̱na̱i̱t 4:27. Awu ol He̱ro̱d azi ne, He̱ro̱d wa A̱ddi̱ki̱re̱. Een bali enne alaan koor bali a̱rri̱ta̱i̱ Ye̱su̱ ke̱. Ikeb Ma̱te̱yo̱ 2:1-8; Lu̱ka̱ 1:5. Imma bali vu̱rrta̱ anyak alaan ci een He̱ro̱d Agirippa, ngerrti do̱le̱c ci He̱ro̱d wa A̱ddi̱ki̱re̱. Ikeb To̱na̱i̱t 12:1-23. kaal cik ogon Ye̱su̱ do̱o̱k, 2izek zin enne ddi̱ki̱ryyo̱k ciginnek ne, “Een e̱e̱ti̱ neci Jon Ba̱ti̱ti̱mo̱; itinga enne daiza! Zoz zin ci ogone enne kaal cik a̱vu̱la̱ ko̱.”
3Imma zin ba̱li̱ye̱ alaani He̱ro̱di̱, eceb Jon kar kokolek lagam, eci enne ovocek nonno zoz ci okkoye enne Herodias, ngaa ci gotononi wa een zara Vilip.#14:3 Vilip: Ngen bali Vilipi aruge baling okkoye alaani He̱ro̱di̱ ngaa ci gotononi Vilipi, een zara Herodias. 4A̱nne̱k da̱ Joni He̱ro̱d ne, “Gerza zoz necu, akaka ming abakku ki ngaa necu.” 5Utuburek He̱ro̱di̱ Jon Ba̱ti̱ti̱mo̱ nong, orong ku̱ru̱k nonno, abarik o̱to̱ngo̱o̱le̱ ol, eci ol a̱gga̱ Jon ming een a̱ri̱to̱i̱t ci zoz ci Ta̱mu̱ta̱dde̱no̱.
6Ma̱i̱je̱ baling adait ol kwo̱o̱r ci i̱i̱te̱n bali a̱rri̱ta̱ne̱ ol He̱ro̱d, urugum zin buweenyi ngaa ci een Herodias, atal zin bali He̱ro̱di̱ oroot rugumente neci. 7Izek zin alaani He̱ro̱di̱ do̱le̱c ne ki̱tto̱ni̱k ele cinne, “Du̱wa̱ gi̱i̱ ci orong kaanyin.” 8Izoc zin yaatinne kar buweenyinne kize ne, “Inya oo ci Jon Ba̱ti̱ti̱mo̱ uduce cu.” 9Adak zin alaani ele, eci enne u̱du̱wa̱ zoz neci ngati aavtte e̱re̱nno̱wa̱ to. Kar zin enne kutu e̱e̱t ci ebek nonno abunna ming anyahak do̱le̱c gi̱i̱ ci orong zinin cinne ke̱. 10Uk zin aciirenti lagama uk etteda oo ci Joni de̱de̱. 11Kar zin kanyaha oo neci uduca, i̱ki̱ya̱ aanyik do̱le̱c. Uk zin do̱le̱c aanyik yaatinne. 12I̱vi̱ta̱ zin nuyaha cik Joni, o̱o̱tte̱ ele ci Joni oot a̱da̱c. Kar koot ku̱du̱kta̱k Ye̱su̱ zoz necu.
Adaiz Ye̱su̱ ol i̱bbo̱nge̱t tu̱r (5,000)
(Marko 6:30-44; Lu̱ka̱ 9:10-17; Jon 6:1-14)
13Baling izik Ye̱su̱ daiz ci Joni, uk zin enne etted nyatapar kar kuk ngati iróng ol acine nonno. Iziyyet zin ol ming oto enne, kar zin ol kunuwet nonno zoone o̱ro̱gjo̱we̱. 14Baling okko Ye̱su̱ iyowa i̱ba̱ kar kicin koole, atamatek zin enne ol ne̱ke̱ kar kangaru nogo mo̱ri̱zo̱we̱.
15Baling ize yo̱mo̱n, i̱vi̱tta̱k zin nuyaha omoto ki rama Ye̱su̱, kar kizeto ne, “Azan kollen ne̱ko̱, anyik nogo koot o̱ro̱gjo̱we̱ abunna ming ovvo atala da̱i̱ne̱t cigge̱k. I̱llo̱i̱ gi̱i̱ imma ci kadak naga balala ngatu.”
16O̱bo̱de̱k zin Ye̱su̱ nogo, “Ma anyikku ol ne̱ko̱ koot ngamani. Anycik nogo da̱i̱ne̱t u̱gge̱ kadait.”
17O̱bo̱dde̱k zin nuyaha nonno, “Kanyaka umunet tu̱r ki u̱lu̱g rama niko.”
18U̱du̱wa̱k zin Ye̱su̱ nogo, “Anyaktang da̱i̱ne̱t ne̱ko̱ rok ngintu.” 19Kar enne ku̱du̱wa̱k ol ka̱vvu̱to̱ lo̱o̱ta̱ artene. Idima enne umunet tu̱r ki u̱lu̱g ram, kar zin kicin ta̱mu̱-keng, kar zin kala Ta̱mu̱ta̱dde̱n abunna ming a̱mu̱yu̱k da̱i̱ne̱t ne̱ko̱. U̱bu̱nya̱n zin umunet ne̱ko̱ ki u̱lu̱g kizeto idice. Engerek nuyak, kar nuyaha kengertek kollen do̱o̱k. 20Adakto zin ol do̱o̱k e̱le̱zzo̱ ki da̱i̱ne̱t, abarik kacin inyigtai da̱i̱ne̱t, kar nuyaha ku̱lu̱te̱k dho̱ngkwe̱t omoto ki ram. 21E̱e̱ggi̱n ol wak adakce ke̱ i̱bbo̱nge̱t tu̱r bu̱k (5,000) ci iróng ka̱gi̱l rok ngaai ki dooli bu̱k.
Owo Ye̱su̱ maame ta̱dde̱na̱
(Marko 6:45-52; Jon 6:15-21)
22Ataman niko aanyik Ye̱su̱ nuyak waginnek koot i̱bo̱wa̱ o̱o̱we̱ cinne ti̱ti̱me̱ ci golla, imma ngatu aanyik enne koole kazante. 23Ma baling i̱tto̱n enne nogo koot, uk enne biya ta̱dde̱na̱ kar zin kuk kala Ta̱mu̱ta̱dde̱n. Baling ize yo̱mo̱n, a̱vvu̱ enne nginati do̱. 24Baling a̱vvu̱ i̱bo̱ maame orgena, otomowe zin ngooti i̱bo̱ eci enne iime ngoot.
25Baling ize ojon nge̱rre̱ti̱ni̱ ngati orong aala looci, iyowak zin Ye̱su̱ nuyak ngati owoye enne maame ta̱dde̱na̱. 26Baling edenyca nuyaha Ye̱su̱ abarik ming owo maame ta̱dde̱na̱, o̱to̱ngo̱o̱ltte̱ zin lo̱o̱c kar kizeto ne, “Een i̱yo̱ko̱ necu miningit.” Kar zin ku̱tu̱lu̱zzo̱.
27Ma̱i̱je̱ ataman niko, ozozik Ye̱su̱ nogo izek ne, “Anycik zi̱nze̱tti̱ kokkomit, annit Ye̱su̱ icu, ma o̱ngo̱o̱li̱nnu̱ lo̱o̱c gaganiko.”
28Abarizek Peturu nonno, a̱nne̱k ne, “Manyi, ming een i̱nne̱ta̱ de̱de̱, du̱wa̱ka̱ koto anna bu̱k maame ta̱dde̱na̱.”
29A̱nne̱k Ye̱su̱ nonno ne, “I̱jja̱.”
Itinga Peturu i̱bo̱wa̱ oto maame ta̱dde̱na̱ uk ngati Ye̱su̱. 30Abarik baling icin Peturu ngoot, o̱to̱ngo̱o̱le̱ zin kar ki̱tto̱ maam idic idic, u̱tu̱lu̱ zin egereny, “Manyi eelawan!”
31Ma̱i̱je̱ ataman niko, i̱tto̱n Ye̱su̱ a̱zzi̱t kar ka̱gga̱m nonno. Kar kizek ne, “I̱nna̱ ci anyai tu̱we̱ne̱t cidici ko̱, a̱ti̱ko̱nu̱ ki zinin nya?”
32Baling ovvo Peturu ki Ye̱su̱ ottod i̱bo̱, ibil zin ngooti. 33Kar zin ol balik i̱bo̱wa̱ ki̱di̱ngdi̱nga̱ni̱t nonno, azi ne, “E̱e̱ni̱ i̱nna̱ de̱de̱ Ngerrti Ta̱mu̱ta̱dde̱no̱.”
Angaru Ye̱su̱ ol wak omori Gennesareta
(Marko 6:53-56)
34Etteddit zin Ye̱su̱ ki nuyak ciginnek nyatapar i̱vi̱tta̱k orog ci een zara Gennesaret. 35Baling i̱ye̱zta̱ olli o̱rgu̱ Ye̱su̱, i̱tto̱ni̱t zin zoz kuk o̱ro̱gjo̱we̱ veelek. Anyakttak zin ol nonno ol cik omori ki̱ki̱ya̱ kangaru. 36Ilalek nege Ye̱su̱ kar ol cik omori ku̱u̱me̱t ru̱u̱m cinne, imma ol balik u̱u̱me̱t nonno ubunntta, i̱zze̱c mo̱ri̱zo̱wa̱ dakdak.
Currently Selected:
Ma̱te̱yo̱ 14: tex
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.