Jonah 3
3
Izik Jonah zoz ci Ta̱mu̱ta̱dde̱no̱
1I̱ki̱ya̱k zin zoz ci Manyi Jonah dee, iizek ne, 2“Bit Ninevekte o̱rge̱ ci a̱ddi̱ki̱re̱, kar uwahek ol zoz bali ka̱du̱wa̱ki̱ anna i̱nne̱t ke̱.” 3Izik zin Jonah zoz ci Manyi, kar zin kuk rok Nineveh. Een zin Nineveh orog ci riili ngapali oroot, owo wo̱ye̱ e̱e̱ti̱ i̱i̱nya̱ i̱i̱yo̱ kar ku̱lu̱c orog do̱o̱k. 4Okko i̱i̱te̱ne̱ ci een oo, akate Jonah uwahek ol cik Nineveh zoz ci Ta̱mu̱ta̱dde̱no̱, azi ne, “Eeh! Olli Nineveh, i̱i̱nya̱we̱ cik een moten we̱c ko̱, adittai atin ol ne pid!”
Elemtta ol cik Nineveh zoz ci Ta̱mu̱ta̱dde̱no̱
5Elemtta ol cik Nineveh zoz ci Ta̱mu̱ta̱dde̱no̱. Kar zin ol do̱o̱k ki̱ya̱yo̱, olle cik a̱ddi̱ki̱re̱ rok cikidik kar ki̱ye̱lta̱ gerziten cinne̱ng. I̱ti̱i̱me̱t nege aburkece cik matizak. 6Baling izik alaani kaviyak ne̱ko̱, itinga je̱e̱na̱ lecere cinne kar kaara ru̱u̱m cinne alaanzetu, i̱ti̱m zin ru̱u̱ma̱ni̱ wak een aburkece matizak ko̱. A̱vvu̱ zin lo̱o̱ta̱ todowai. 7I̱tto̱ne̱k zin enne zoz ol cik Nineveh do̱o̱k:
Ku̱du̱wa̱ anna alaani ki ddi̱ki̱rze̱t zoz cu:
“Ma e̱e̱ti̱ imma icima elegje, icima tiin ki eeza atari gi̱i̱ imma; akaka ming adakye icima aud e̱e̱ti̱ maam. 8Anycik ol cik diirik ki elegje ki̱ti̱me̱t ru̱u̱ma̱ni̱ cik een aburkece. Anycik ol do̱o̱k kilaltek Ta̱mu̱ta̱dde̱n kar bo̱do̱k anycik nogo kibilizet mu̱nye̱n ki gerziten. 9Ming kogon naga niko, icima okko atin Ta̱mu̱ta̱dde̱n uhu zinin cinne ngati omozine ngatinna, kar atin naga iróng ka̱da̱i̱.”
10Baling icin Ta̱mu̱ta̱dde̱n kaal cik u̱tu̱gu̱zzo̱ nege ki gool ci ungnek nege kaal cik gerzek lo̱o̱c, alalek enne nogo ci iróng adita nogo ki bali odola enne ke̱.
Currently Selected:
Jonah 3: tex
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.