MATTHEW 2
2
Mme Nta Ifiɔk Etode Edem Usiak Utin Edise Jesus ye Nte Mary ye Joseph Emende Jesus Efeŋe Eka Egypt
1EDI ke ini Jesus amanade ke Bethlehem obio Judaea ke eyo edidem Herod, sese, mme ɔfiɔk-nkpɔ owo eto ke edem usiaha-utin edi ke Jerusalem, ete, 2Enye emi akamanade nte Edidem mme Jew odu mmɔŋ? koro nnyin ikokut ntantafiɔŋ Esie ke edem usiaha-utin, imonyuŋ idi ndituak ibuot nnɔ Enye. 3Ke adaŋemi Herod edidem okopde ŋkpɔ emi, esit otimere enye, ye kpukpru mbio Jerusalem ye enye. 4Ntre ke enye okot kpukpru ikpɔ oku ye mme scribe obio obon, obup mmɔ ebiet eke Christ akpamanade. 5Mmɔ edɔhɔ enye ete, Ke Bethlehem obio Judaea: koro ntem ke prophet ewet ete,
6Ndien afo Bethlehem, isɔŋ Judah,
Ukprike ukaha ke baba usuŋ kiet ke otu mbɔŋ Judah;
Koro andikara eyeto fi ke esit ɔwɔrɔ,
Emi edikpemede ikɔt Mi Israel.
7Ekem Herod okot mme ɔfiɔk-ŋkpɔ owo ke ndibe, onyuŋ otim obup mmɔ ɔfiɔk ini eke ntantafiɔŋ oro ɔkɔwɔrɔde. 8Enye onnyuŋ ɔdɔŋ mmɔ eka Bethlehem, ete mmɔ, Eka ekotim ebup ebaŋa nsek eyen emi; ndien ema ekut Enye, edi edidɔhɔ mi, man ami ŋko ŋka ŋkatuak ibuot nnɔ Enye. 9Ke mmɔ ema ekokop uyo edidem, mmɔ edaha isaŋ; ndien sese, ntantatfiɔŋ emi mmɔ ekokutde ke edem usiaha-utin ebem mmɔ iso, edi edida ke enyɔŋ ebiet emi nsek eyen oro odude. 10Ke adaŋemi mmɔ ekutde ntantafiɔŋ mmɔ edatesit eti-eti. 11Mmɔ enyuŋ eduk ufɔk ekokut nsek eyen ye eka Esie Mary; enyuŋ eduɔŋɔ ke isɔŋ, etuak ibuot enɔ Enye; ndien ekibɔre ukama-ŋkpɔ-uto mmɔ, esio gold ye ufuɔŋkpɔ ye myrrh, enɔ Enye. 12Ndien sia Abasi etemede mmɔ ke ndap, ete, Ekufiak eka ke ɔtɔ Herod, mmɔ esaŋa ke usuŋ efen enyɔŋɔ obio mmɔ.
13Ekem ke mmɔ ema ekenyɔŋɔ, sese, angel Jehovah ɔbiɔŋɔre Joseph ke iso ke ndap, ete enye, Daha ke enyɔŋ, da nsek eyen ye eka Esie, fehe, ka ke Egypt ke odu do, tutu nnɔ fi uyo; koro Herod ɔmɔŋ oyom nsek eyen oro ndiwot. 14Ndien Joseph adaha ke enyɔŋ, ada nsek eyen ye eka Esie ke okoneyo, ɔnyɔŋ ke Egypt; 15onyuŋ odu do tutu osim ini mkpa Herod: man osu nte Jehovah akadade inua prophet, ɔdɔhɔ ete, Mmokot Eyen Mi ɔwɔrɔ ke Egypt.
16Ekem kini Herod okutde ete mme ɔfiɔk-ŋkpɔ owo ebiaŋa imɔ, enye ayaresit eti-eti, onyuŋ ɔdɔŋ eka ekowot kpukpru nditɔ-iren emi edude ke Bethlehem ye ke kpukpru adaŋa esie, ɔtɔŋde ke nditɔ isua iba tutu osim nsek nditɔ, nte asaŋade ekekem ye ini emi enye okotimde obup mme ɔfiɔk-ŋkpɔ owo. 17Ekem osu nte Jeremiah prophet ɔkɔdɔhɔde ete,
18Ekop mkpo ke Ramah,
Ntuaŋa ye akamba eseme;
Rachel ke atua nditɔ esie;
Inyuŋ inyimeke ndibɔ ndɔŋesit, koro mmɔ miduhe.
19Edi ke ini Herod ama akakpa, sese, angel Jehovah ɔbiɔŋɔre Joseph ke iso ke ndap ke Egypt, ete enye, 20Daha ke enyɔŋ, da nsek eyen ye eka Esie ka ke isɔŋ Israel: koro mmɔ emi ekoyomde uwem nsek eyen oro ema ekpaŋa. 21Ndien Joseph adaha ke enyɔŋ, ada nsek eyen ye eka Esie, edi ke isɔŋ Israel. 22Edi ke adaŋemi enye okopde ete, Archelaus ke ada ubɔŋ ke ibuot ete esie Herod, enyene enye ndik ndika do; edi nte Abasi etemede enye ke ndap, 23enye adaha aka ke isɔŋ Galilee okoduŋ ke obio emi ekerede Nazareth: man osu nte mme prophet ekedɔhɔde ete, Enye edikere Nazarene.
Currently Selected:
MATTHEW 2: ENA
Highlight
Share
Copy
Want to have your highlights saved across all your devices? Sign up or sign in
Efik Old Bible With Sectional Headings © Bible Society of Nigeria, 2013, 2019.