MALACHI 3
3
Isuŋ-Utom Emi Abasi Edidɔŋde Edi
1SESE, ami nyedɔŋ angel mi, ndien enye eyebem mi iso ɔdiɔŋ usuŋ: ndien ɔbɔŋ emi mbufo eyomde, kpa angel ediomi emi enemde mbufo esit, eyebuat mbufo ke temple esie ke idaha kiet. Sese, enye ke edi: Jehovah mme udim ɔdɔhɔ. 2Edi anie ekeme ndiyɔ usen eridi esie? Anie owo ekeme ndida ke ini enye ayararede idem esie? Koro enye ebietde ikaŋ usɔ-gold, onyuŋ ebiet soap mme ɔdiɔŋ-ɔfɔŋ: 3enye onyuŋ etie etem silver onyuŋ anam asana: onyuŋ anam nditɔ Levi esana, onyuŋ ɔdiɔŋ mmɔ nte gold ye silver, man mmɔ ewa uwa enɔ Jehovah nte enende. 4Ndien uwa Judah ye Jerusalem eyenem Jehovah esit, kpa nte ke mme usen eset, ye ke eyo oko. 5Ndien ami nyesaŋa ŋkpere mbufo ke ikpe, nnyuŋ nnim owowo ntiense mbaŋa mbia-idiɔŋ ye mme esin efibe, ye mmɔ eke eŋwɔŋɔde nsu, ye mmɔ eke etukde anam-utom ke utip esie, etuk ebe-akpa ye eyen-akpa, emi enyuŋ efikde esen owo, ndien mibakke mi, Jehovah mme udim ɔdɔhɔ. 6Koro ami ndide Jehovah, ŋkpuhɔkede; ndien isoboke mbufo nditɔ Jacob ima.
7Toto ke eyo mme ete mbufo, mbufo emekabare ekpɔŋ mme ewuhɔ mi, inyuŋ inimke: mbufo ekabare etiene mi, ndien ami nyekabare ntiene mbufo, Jehovah mme udim ɔdɔhɔ. Ndien mbufo ebup ete, Nnyin idida nso ifiak? 8Nte owo okpotuk Abasi, koro mbufo etukde mi? Ndien mbufo edɔhɔ ete, Nnyin ikotuk fi ke nso? Ke ɔyɔhɔ mbak ŋkpɔ duop ye ke edimenere uwa. 9Emeda isuŋi esuŋi mbufo: ndien mbufo ofuri idut emi ekutuk mi.
10Mbufo eda kpukpru ɔyɔhɔ mbak duop edisin ke ufɔk unim-ŋkpɔ, man udia odu ke ufɔk mi, ndien eda emi edomo mi, Jehovah mme udim ɔdɔhɔ, mme ami ndiberekede window heaven nnɔ mbufo, nnyuŋ ŋŋwaŋa nti ŋkpɔ nnɔ mbufo, tutu akaha. 11Ndien nyeduat andita nnɔ mbufo, ndien enye idibiatke aba mbuŋwum iŋwaŋ mbufo: vine ke iŋwaŋ idinyuŋ iforoke ayara inɔ mbufo, Jehovah mme udim ɔdɔhɔ. 12Ndien kpukpru mme idut eyenyuŋ ebat ete ke ɔfɔn ye mbufo: koro mbufo eyedi isɔŋ inemesit, Jehovah mme udim ɔdɔhɔ.
13Jehovah ɔdɔhɔ ete, Mbufo emesɔŋɔ uyo ye ami. Ndien mbufo ke ebup, ete, nnyin idɔhɔ didie idian fi? 14Mbufo ke edɔhɔ ete, Ndinam ŋkpɔ Abasi ɔwɔrɔ ikpikpu: nnyin inyuŋ ikut nso udori, koro inimde item esie, inyuŋ isaŋade mfuhɔ-mfuhɔ ke iso Jehovah mme udim? 15Ndien ke emi nnyin ibat ite ke ɔfɔn ye mbon iseri; enyuŋ efori mme anam-idiɔk ŋko; mmɔ enyuŋ edomo Abasi ŋko, ndien ebɔhɔ. 16Ndien mme abak Jehovah eneme kiet ye kiet: ndien Jehovah akpaŋ utɔŋ, onyuŋ okop, mmɔ enyuŋ ewet ŋwed eriti ke iso esie enɔ mme abak Jehovah ye mme ekere enyiŋ esie. 17Ndien Jehovah mme udim ɔdɔhɔ ete, Mmɔ eyedi ata inyene mi ke usen emi ami ndoride; ndien nyetua mmɔ mbɔm, kpa nte owo atuade eyen esie ke anamde ŋkpɔ ɔnɔ enye mbɔm. 18Ndien mbufo eyetɔŋɔ ntak ekut nte eti ye idiɔk esaŋade isio, ye nte anam ŋkpɔ Abasi ye owo eke minamke ŋkpɔ esie esaŋade isio.
Currently Selected:
MALACHI 3: ENA
Highlight
Share
Copy
Want to have your highlights saved across all your devices? Sign up or sign in
Efik Old Bible With Sectional Headings © Bible Society of Nigeria, 2013, 2019.