JENESIS 1
1
1Ragi ni naatulakeana Supe e dawona ki nakoroatelagi go maramana 2Go maramana e pinovinoi go e p̃alo go namaligo e doko narae ni epua go Naata ni Sup̃e e darakovakovagoro narae ni noai maga 3Go Sup̃e e noa Namarama ega vakilina go namarama e pakilina 4Go Sup̃e e punusi namarama naga e p̃ia go Sup̃e e dapotae namarama padua ki namaligo 5Go Supe e soso namarama ki Aleati, go namaligo e soso e ki P̃ogi. Go ragi melu e doko go malip̃ogi e doko, naaleatia sikai.
6Go Sup̃e e noa, Namalopa sikai ega toko m̃aleoputo ni noai maga, go ega tap̃otae noai maga padua ki noai maga. 7Go Sup̃e e mari namalopa, po dap̃otae noai maga waina eu doko etano ni namalopa padua ki noai maga waina eu doko elagi ni namalopa go e dapala nogoe. 8Go Sup̃e e soso namalopa ki Nakoroatelagi. Go ragi melu e doko go malip̃ogi e doko, naaleatia kerua.
9Go Sup̃e e noa, Noai maga ni etano ni nakoroatelagi euga vei tea saisaikiana paki tokora sikai maau, go tea garagara ega vakilina go e dapala nogoe. 10Go Sup̃e e soso tea garagara ki Navanua, go nasaisaikiana ki noai maga e soso e ki Natasi maga. Go Sup̃e e punusi naga e p̃ia. 11Go Sup̃e e noa, Navanua ega sai ki nam̃enau, nataputea waina e pitua ki napatina, go nakau ni nawa waina e dau ki nawana visarasara, waina napatina e doko nap̃alauna, elagi ni navanua, go e dapala nogoe. 12Go navanua e sai ki nam̃enau, nataputea waina e pitua ki napatina visarasara, go nakau waina e dau ki nawana, waina napatina e doko nap̃alauna, e pisarasara. Go Sup̃e e punusi naga e p̃ia. 13Go ragi melu e doko go malip̃ogi e doko, naaleatia ketolu.
14Go Sup̃e e noa, Nasulu maga euga toko namalopa ni nakoroatelagi naga euga tap̃otae aleati padua ki p̃ogi, go euga vei navaivaiana maga, go ragi maga, go naaleatia maga, go natau maga. 15Go euga vei nasulu maga namalopa ni nakoroatelagi naga euga maramalagati maramana, go e dapala nogoe. 16Go Sup̃e e mari nasulu warua dua nasulu waina e p̃arua liu naga ega maraki aleati, go nasulu waina e p̃arua rua naga ega maraki p̃ogi go e mari m̃asoe maga. 17Go Sup̃e e lawo ki da namalopa ni nakoroatelagi naga euga maramalagati maramana, 18Go naga euga maramara dap̃au aleati go p̃ogi, go naga euga tap̃otae namarama padua ki namaligo, go Sup̃e e punusi naga e p̃ia. 19Go ragi melu e doko go malip̃ogi e doko, naaleatia kevati.
20Go Sup̃e e noa, Noai maga euga vura ki navata ni nalo varivari maga waina eu mauri, go manu maga euga tiri elagi ni maramana narae ni namalopa ni nakoroatelagi. 21Go Sup̃e e dawona ki nalo warua maga ni natasi, go sara nalo mauri visarasara waina eu kakaravi, waina noai maga eu dape ra eu laapa, go sara manu visarasara waina eu pilake nalivaruda, go Sup̃e e punusi naga e p̃ia. 22Go Sup̃e e pasa m̃ata ki da, po naga, Kuga vavakawora, po laapa, po mari noai maga ni natasi euga vura, go manu euga laapa navanua. 23Go ragi melu e doko go malip̃ogi e doko, naaleatia kelima.
24Go Sup̃e e noa, Navanua ega tape nalo mauri visarasara maga, katel maga, go tea kakaravi maga, go nalo mila visarasara maga ni navanua, go e dapala nogoe. 25Go Sup̃e e mari nalo mila visarasara maga ni navanua, go katel visarasara maga, go sara nalo visarasara waina eu kakaravi natano, go Sup̃e e punusi naga e p̃ia. 26Go Sup̃e e noa, Tuga mari naatam̃oli euga vei nunugida, euga takiusi gida, go euga maramara dap̃au naika maga ni natasi, go manu maga ni namalopa, go katel maga, go navanua mamau, go sara nalo kakaravi waina eu kakaravi navanua. 27Go Sup̃e e dawona ki naatam̃oli e pei nununa, e dawona ki nia e pei nunu ni Sup̃e e dawona ki da ero pei naanoai go nagoroi. 28Go Sup̃e e pasa mata ki da, go Sup̃e e noa ki da, e naga, Koroga vavakawora, po laapa, po mari navanua ega vura, po marimatua ki nia. Go koroga maramara dap̃au naika maga ni natasi, go manu maga ni namalopa, go sara nalo mauri waina eu kakaravi navanua. 29Go Sup̃e e noa, P̃a leo, a po dua mu sara nataputea waina e pitua ki napatina, waina e doko narae ni navanua mamau, go sara nakau waina nawa ni nakau e doko asa waina e pitua ki napatina ega vei navinaga animu 30Go sara nalo tuavati ni navanua, go sara manu ni namalopa, go sara nalo waina eu kakaravi navanua, waina naatana mauri e doko ara, a po dua ra sara nataputea malakesa ega vei navinaga adeada, go e dapala nogoe. 31Go Sup̃e e punusi sara naleo waina e mari sua ra, go p̃a leo, eu p̃ia lua. Go ragi melu e doko go malip̃ogi e doko, naaleatia kelatesa.
Currently Selected:
JENESIS 1: NTB
Highlight
Share
Copy
Want to have your highlights saved across all your devices? Sign up or sign in
Bible Society of the South Pacific