Atɔ Lɛsunahɛ 1
1
1Ɩnɩgyi atɔá Bulu lɛha Yesu Kristo lɛlɛ suna mʋ asumpʋ tsu tɔá ɩbɛ́ba nkɛ anfɩtɔ ɩwɩ nɩ. Yesu lɔwa Bulu-ɔbɔpʋ lɛba bɛlɛ mʋ́ suna mʋ osumbi Yohane. 2Yohane legyi togyitɔá olowun ɩwɩ adansɩɛ. Olegyi Bulu asʋn amʋ pʋ́ asʋn ánɩ́ Yesu Kristo lɛbla mʋ fɛ́ɛ́ ɩwɩ adansɩɛ ɔnɔkwalɩsʋ. 3Bulu obóyula ɔha ánɩ́ ɔtɛkla mʋ ɔnɔsʋ ɔtɔɩpʋ asʋn wanlɩnhɛ anfɩ suna Kristo ɔpasua amʋ. Obóyula aha ánɩ́ bʋtonu asʋn amʋ, gyi dɩnka mʋ́sʋ ɛ, tsufɛ mʋ́ fɛ́ɛ́ babɩ lafʋn ta.
Kristo Ɔpasua Asienɔ Amʋ Itsiaha
4-5Mɩ Yohane dɛ ɔwʋlʋ anfɩ wanlɩn sɩsɩ Kristo ɔpasua asienɔá mlɩbʋ Asia ɔmátɔ.
Ɔha amʋʋ oletsia, ɔbʋ ɩnʋ, ɔbɛ́laba amʋ mʋa Ɔŋɛ asienɔá bʋlɩɩ mʋ owie obia ansɩtɔ pʋ́ Yesu Kristo bʋgyi mlɩ bʋalɛ, abʋha mlɩ iwilwii. Mʋgyi ɔdansɩyin ɔnɔkwalɩpʋ, ogyankpapʋá ɔlɔkʋsʋ tsu afulitɔ, ɔyɩtɔ awie fɛ́ɛ́sʋ ogyipʋ.
Mʋtɔdwɛ anɩ, ɔlɔpʋ mʋ obugya ka anɩ nwunsʋ ɩkɔ, si anɩ lakpan kie anɩ. 6Alabwɛ anɩ mʋ iwie ogyikpa pʋ́ mʋ igyi ahapʋá abósum mʋ Sɩ Bulu. Numnyam mʋ́a tumi ɩbwɛ mʋ klɛ brɛ fɛ́ɛ́! Amen.
7Kɩ! Ɔna nwʋlʋtasʋ ɔba! Ɔhagyiɔha obówun mʋ. Aha amʋʋ bɔwɔ mʋ pɩa amʋ kʋraa bówun mʋ. Mʋ sʋ ɔyɩtɔ aha fɛ́ɛ́ bósu kʋklʋkʋʋ. Alɩ ɩbɛ́ba nɩ!
8Anɩ Wie Bulu lɛblɩ ɔbɛɛ, “Mɩgyi Alfa mʋ́a Omega. Otumipʋ amʋʋ oletsia, ɔbʋ ɩnʋ, ɔbɛ́ba amʋ nɩ.”
Kristo Lɛ Suna
9Mɩ, mlɩ pio Yohane nɩ. Mɩa mlɩnyɔ dɛ ipian wun Yesu pʋ́ Bulu iwiegyi amʋ sʋ, anɩdɛ ɩklʋn nya lɩɩ kinkin. Bulu asʋn ɔkanda pʋ́ Kristo ɩwɩ asʋnblɩ sʋ balɛ mɩ ya Patmo ɔpʋ nsɩnɛ ɔsʋlʋsʋ. 10Ɛkɛ ɔkʋá igyi anɩ Wie ɛkɛ a, Bulu Ɔŋɛ lɛba mɩsʋ. Nonu ɔmɛ kʋ, ɩlɛlɩn kʋklʋkʋʋ fɛ ɔkpɛ ɔtsawʋlɛ pɛ mɩ ɔma. 11Ɔmɛ amʋ ɔbɛɛ, “Wanlɩn tɔá fʋdewun wa ɔwʋlʋtɔ, afʋpʋya Kristo ɔpasua asienɔ, bʋgyi Efeso, Smirna, Pergamo, Tiatira, Sardis, Filadelfia pʋ́ Laodikea.”
12Brɛá nɛdamli mbɛɛ, ankɩ ɔha ánɩ́ ɔdɛ mɩ asʋn bla a, nowun sika pɛpɛ ɔkandɩɛ-oyiá ɩbʋ abambi asienɔ. 13Ɔha ɔkʋá ɔlɛlɩan Nyankpʋsa-Mʋ-Bi amʋ lɩɩ ɔkandɩɛ-oyi amʋ nsɩnɛ. Ɔlɔwa liga, ɔlɔpʋ sika pɛpɛ ɔfɛ tsan mʋ kantɔ. 14Mʋ nwun pʋ́ mʋ imi fɛ́ɛ́ lofuli fɛ opuli mputɔ ntɛ ɔhrada. Mʋ ansibi aklambi ɛ lɔwankɩ fɛ ogya mpɩmpɩ. 15Mʋ ayabi dɛ ogya kpa fɛ kɔbrɩá bafwɩ mʋ́ lɛ ogyatɔ ɩnʋnʋ. Mʋ ɔmɛ idetsula fɛ ntsuá ɩdɛkpa yi. 16Ɔdɛ ntsrakpabi asienɔ mʋ gyɔpɩtɔ. Ɔdayi ɩya anyɔ klakla lɛdalɩ tsu mʋ ɔnɔtɔ. Mʋ ansɩtɔ ɩhɩɛ dɛwankɩ fɛ ɔpawi. 17Brɛá nowun mʋ a, nemli bun mʋ ayabiasɩ fɛ ɔha wuhɛ, tamɛ ɔlɔpʋ mʋ gyɔpɩ ɩbɩ dɩnka mɩsʋ, blɩ ɔbɛɛ, “Mánya ifu! Mɩgyi Ogyankpapʋ mʋ́a Ɔtrahɛ amʋ nɩ. 18Mɩgyi ɔkɩankpapʋ amʋʋ nowu amʋ nɩ. Kɩ, mbʋ nkpa brɛ fɛ́ɛ́! Mbʋ tumi lowu mʋ́a afulitɔsʋ.
19“Wanlɩn tɔá fawun bɔtsʋn, mʋ́á ɩdɛba sei pʋ́ mʋ́á ɩbɛ́ba ɔma wa ɔwʋlʋ amʋtɔ. 20Ntsrakpabi asienɔ amʋʋ fowun mɩ gyɔpɩtɔ pʋ́ sika pɛpɛ ɔkandɩɛ-oyi abambi asienɔ amʋ asɩ nɩ. Ntsrakpabi asienɔ amʋ igyi ɔpasua asienɔ amʋ abɔpʋ. Ɔkandɩɛ-oyi abambi asienɔ amʋ ɛ gyi ɔpasua asienɔ amʋ.
Currently Selected:
Atɔ Lɛsunahɛ 1: nko
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation