Zakaria 9
9
Mwene Zambi makabatwila mavungu enyembo ja Israele
1Wano e maliji ja Mwene Zambi: Habatula kumwesa lamba chifuchi cha Hadrake#9:1 hadrake: ku norde mu Siria. ni limbo lia Damasku#9:1 Damasku: limbo lia wanangana lia Siria. Hi mavungu ja Israele wika ko, alioze ni lie limbo lia wanangana lia Siria kaali a mbala a Mwene Zambi. 2Chifuchi cha Hamate#9:2 HAMATE: mu Siria., chize chasulangana ni Hadrake, chili nichenyi, ni membo ja Tiru ni Sidone#9:2 Tiru ni Sidone: membo ja Afenishia ku mbumbulu ya kalunga lwiji Mediterane, ku norde ya Palestina., ni akwa mana jo eswe kaali nienyi. 3Tiru haamutungila yipanga yakukoleka, haalumbikila prata ni oru yinji ngwe mavu! 4Alioze Mwene Zambi kumakamuchiza yuma yeswe yize ali nayo. Ubite wenyi kumaakaumbila mu kalunga lwiji, ni lie limbo kumaakaliocha. 5Limbo lia Ashkelone kumaakachimona, maakevwa woma. Limbo lia Gaza no kumaakabinda ni lamba. Aekrone no keechi kabwa ni Chuma cha kusa mbunge. Gasa kumaakatokesa mwanangana wo, mu Ashkelone mumukabwa mwahululu. 6Atu a ku mavungu akuchinga maakatwama mu Ashdode#9:6 Ashkelone… EKRONE… GAZA… ASHDODE: membo awana a ku membo ja Afilistia atano hehi ni mbumbulu ya kalunga lwiji Mediterane, ku chitokelo cha Yuda.. Mwene Zambi kanambe ngwenyi: “Mungukakehesa Afilistia wano, akwa kulengumuka. 7Keechi kalia nawa yifwo ni e manyinga jayo, chibwe yakulia yikwo ya chijila. Masalila eswe kumaakabwa a ku mbunga ya atu jami, kumaakabwa ngwe yoze jimo a ku vungu lia Yuda. Ekrone no maakabwa a ku mbunga ya atu jami, ngwe chize abwile Ajebuse#9:7 Ajebuse: vungu lize te atwama ku Yerusaleme hatangu. David yaakumba, yaapwisa enyembo jenyi.. 8Mba mungukafunga chifuchi chami ni kukinda tujita akwo kunjila mo. Chichi katayiza atu akalu kubinjisa nawa atu jami. Hinalimwena cho yami mwene chize atu jami haanamono lamba.”
Mwanangana yoze makeza
9Yenu akwa Zione#9:9 zione: hanji che chifuchi, hanji limbo lia Yerusaleme. , wahililenu, wahililenu!
Yenu akwa Yerusaleme kololokenu ni uwahililo!
Talenu, mwanangana wenu kaneza kuli yenu!
Mukwa kukumba wakangana,
hindu mukwa kulikehesa, kanendela hali chimbulu,
hali mwana yoze wasemukine kuli chimbulu.
10Mwene Zambi kanambe ngwenyi:
“Mungukachiza matemba a jita mu Israele,
mungukachiza tuvwalu mu Yerusaleme;
mata a jita mungukaamakwona.
Mwanangana wenu makaneha uhwimino mukachi ka mavungu;
makayula chize ku umwe kalunga lwiji ndoo ku mukwo,
chize ku lwiji Ufrateze ndoo ku songo lia hashi.”
Mwene Zambi makahuzulula atu jenyi
11Mwene Zambi kanambe ngwenyi:
“Mumu ha Usendo wami ni yenu
uze nakolesele ni manyinga a milambu,
mungukatusula atu jenu
akakatuke mu wina wa undungo uze kuushi meya.
12Yenu njize hilukenu,
hinwabwa ni shindakenyo ha kusa ko mbunge.
Hilukenu ku chifuchi chenu cha uhwimino.
Ngunanulweze ngwami,
mungunukundulula yisuho yaali
ni kunuwahisa ha lamba lize nwamwene.
13Mungunana Yuda ngwe uta wa kajita
ni Israele ngwe mivwi,
akwa Zione ngwe mikwale,
akase jita ni malunga ja Gresia.”
14Mwene Zambi makasoloka helu lia atu jenyi;
makasa mivwi yenyi ngwe mihenyo.
Mwene Zambi makahumuna chitavwi;
makendela mu chijimbi cha ku sude.
15Mwene Zambi Mukwa Ndundo Jeswe makafunga atu jenyi,
no maakonona akwa kole jo;
e manyinga maakapukumuka ngwe manyinga a milambu
waze haazujila ha chilumbilo mu musenge.
16Muze lie tangwa alio hilieza,
Mwene Zambi makalamwina atu jenyi,
ngwe chize kafunga akulamwina mapanga jenyi ku utoji.
Kumaakahenya mu chifuchi chenyi
ngwe mawe a ndando yinji ha chipangula.
17Muchikabwa chifuchi chibema chahiana!
Akweze maakatakama ha kulia mbuto ni kunwa vinyu yacho.
Currently Selected:
Zakaria 9: CHK1970
Highlight
Share
Copy
Want to have your highlights saved across all your devices? Sign up or sign in
The Bible in Chokwe © Bible Society of the Democratic Republic of Congo and Bible Society of Zambia, 1970, 1991.